1 Afòn 7 - ŊWÀʼ NYÙY

Fòn Solomon báʼrí ntoʼ rə

¹ Fòn Solomon‑eè bàʼrì sá ntoʼ rə, a kí‑iì lì wun kiyá nshòv sitaár e ghvə̀m, é bo wù maysi.

² Wù‑uù bòm lav ye vé‑eè yoŋ ji kóv Lebanon, a vida vi dzə̀ kóy nshòv sitàn e mbaà, a mbvə̀ʼ dzə̀ kóy nshòv sibaà e ghvə̀m e kimbéʼ ki. Vida vee kóʼ é yuv ví wáa dzə kóy saàmbà e kimbéʼ ki. Vitóm vee kicí ké *sidar vi‑iì dzə̀ ŋgoo sitaár, a ŋgoo ye mòʼón kér vitóm nshòv sitàn e ghvə̀m.

³ Vé‑eè neèr vimàʼ ve kù‑uù dzəə̀n kicí ké sidar e kitu ke vitom foo fèy, e bàʼrì mewón me lav e kitu wo, e sàŋ kikfə́v kee fó yuúyuv e kicí ké sidar ki.

⁴ Mboòmè se awundu si‑iì dzə̀ ŋgoo sitaár sitaár mbìv sibaà, a wundu wùmòʼ kiʼ wùmòʼ.

⁵ Shuu se sí‑iì nəə e lav sidzə̀m wùn à sé awundu si‑iì kér mboòmè si, aá náŋsín, e kaàrí sho, aàwundu vee mbìv sibàá kù‑uù kiʼnìnè.

⁶ Wù bóm ŋgày vitom, a vida vi dzə̀ kóy nshòv sibaà e ghvə̀m e kimbéʼ ki, mbvə̀ʼ wáa dzə kóy saàmbà e kimbéʼ ki, aá kfən tìír vitóm e cí lav fo mbìy, e sə̀ŋ kitú ke lav, kí wíy fó.

⁷ Wù bóm ŋgày kàvàʼ fo wù‑uù dzə́, tínen nsaʼ si, e sə̀tí wún lav e shibáʼáy shee kicí ké sidar ki, e kèʼ fo nsaàlav, e kòʼ mèé e kikfəv.

⁸ Wù báʼrí rə́ə yee lav a dzə̀ é maàndzə ye yì‑iì dzəə̀n é bǎm lav nsaʼ, a wù ku bàʼrì réŋréŋ moo símóʼ sí. Wù báʼrí sá ye wiiy ntoʼ woo wan Fòn woó Ejiv réŋréŋ bey.

⁹ Vé‑eè baʼrì kibaʼrì kìn kidzə̀m, à virə́v vé maàndzə ŋgày vi shó, shetì tíy ye juŋe e sòó, à fó mbìy, à fó bàm, réŋréŋ mo mfìʼ yee shó dzəə̀n, e bó a yiì kibaʼrì sho, e bàʼrì bèy, e kèʼ fo kinsə̀ŋ, e kòʼ mèé e káy lav.

¹⁰ Vé‑eè wáy kinsə̀ŋ e vimà vé tiy ye tavkíné, a símóʼ sí dzə̀ kóy e baà e kimbéʼ ki fó vidà, símóʼ sí kóy e baà baà.

¹¹ Á wáyí, á bòm fó yuv a dzə̀ e tíy ye juŋe ye vé‑eè fiʼ, bó a shètì, á nèn neèr aŋkoytì e kitu wo, a dzə̀ vee kicí ké sidar ki.

¹² Vé‑eè bóm tíy, kóʼ ŋgoo sitaár, á nèn neèr ŋkoytì e kitu wo. Á kù‑uù bòm maàndzə ŋgày wùn à maàndzə yeé mvə̀m lav cù, à kibuʼ ke kí nəə e lav cù ki, a dzə̀ é dzəə fóo fèy.

Hiram woo ŋgaà fèr

¹³ Fòn Solomon lò, e tòóy wír woó Taya wùmòʼ, a yír rəə́ dzə̀ Hiram,

¹⁴ a dzə̀ ŋgaà fèr, wo wù kér vifií vé lìm yee kisha kee *brons ki. Ŋkfə tàr wov‑iì dzə̀ wír woó Taya, wo wù‑uù kiìn sá lim yee kisha kee brons ki, a yè wov dzə̀ wír woó ram Navtali. Hiram‑eè dzə̀ wir vifiì, a wù kì fer yee fèr e kisha kee brons ki féyì. Wù nèn wìy, a lìm fo Fòn Solomon, e yiì lim ye vé‑eè wayin e wun kiwo e dzə̀m.

Vitóm vee vibaà vee kisha kee brons ki

¹⁵ Wù‑uù fèr vitóm vee kisha kee brons ki vibaà. Vida ve kee kimòʼón vi‑iì dzə̀ kóy e kweè e kimbéʼ ki, a móo kaarí, e tar dzə̀ kóy e taár. Kitóm ki‑iì dzə̀ kintosòŋ, a kisər kfə́ kí dzə̀ wón wo akweè. Vitóm vidzə̀m vi‑iì dzə̀ réŋréŋ.

¹⁶ Wù kfə̀n‑eè fèr tán sí sibaà e kisha kee brons ki ji á neer á e kitu ke vitom fèy, a vida vi dzə̀ kóy e mòʼón e ntàm si sibaà sibaà.

¹⁷ Tán sin si‑iì kér nsáŋtí woo wo lálán wùn à wo ashàŋ, aá wáy virə́ʼ saàmbà e wǔn tan see shoon.

¹⁸ Wù kfən fèr nshwìnin vitùʼtúʼ vé *grenadin, e nàŋsín, ví kaárí nsáŋtí virə́ʼ vibaà, e fíʼ a shèŋrì tán se sí dzəə̀n é kitu ke vitom.

¹⁹ Vitóm ve ví‑iì yíi a tiy e shuù lav cù vìn vi dzə̀, a tán sí‑iì dzə̀ é njà vàv se kikùʼ ké shàʼ, a vida vi dzə̀ kóy e fur,

²⁰ a sí kér vitúʼtúʼ ghii baà baà, aá bárír é kirə̀ʼ ke gvəmén kí é ghaa nsáŋtí woo fó.

²¹ Hiram fèr vitóm vìn bey, e tìír e shùu kibùʼ ke lav cù, e shù yír ke kí‑iì tíy e mbìv yee tsə́n ji Jakin, e shù yír keé mbìv yee kuy ji Boas.

²² Ví ku nèn a tiy fo wùn à vitú vév veé njà vàv se kikùʼ ké shàʼ vi. Á bèy, lim yeé vitome nèn mày.

Mbǐʼ mendzə̀v wo kuʼùné woo kisha kee brons ki

²³ Hiram nèn fèr mbǐʼ mendzə̀v wo kuʼùné woo kisha kee brons ki, aá yoŋ ji Rìbà Ndzə̀v, a wú dzə̀ é kiŋkar, a móo liysín sə́rí dzə̀ kóy e baà e kimbéʼ ki. Vida vi wáa dzə kóy e ntàm se kiwo si sibaà, a móo kaarí, e tar dzə̀ kóy saàmbà e kimbéʼ ki.

²⁴ Vé‑eè fèr vitém e wùn wó, ví kaárí sár sər, e tàr, a ví dzə̀ ŋgoo sibaà, aá tón, e làŋsìn e wǔn mbìʼ.

²⁵ Vé‑eè tìír mbìʼ vən e kitu ke anàʼ nshòv sibaà e ghvə̀m ve vé‑eè fèrìn e kisha kee brons ki. Anàʼ vee ataári‑iì kiʼ kuy, a vee ataári kiʼ fo shùy yii nəə, a vee ataári kiʼ tsə́n, a vee ataári kiʼ fo shùy yii tó. Anàʼ vìne‑eè tìím, e siìr vinyè vév fó mvəm.

²⁶ Kisər ke mbìʼ kí‑iì dzə̀ é mbvə̀ʼ kiwo, a shúu dzə̀ moo wó bàr bèy, à moo kibuushì ké kikùʼ ké shàʼ. Mendzə́v mè‑eè lo mè nə̀ə́ shó agalon nsə̀kì ghvə̀m.

Vitiir ve mbìʼ sí

²⁷ Hiram kfə̀n‑eè fèr sá vitiir ve mbìʼ símóʼ sí e ghvə̀m, a dzə̀ e kisha kee brons ki. Kitiir kee kimòʼón ki‑iì dzə̀ kóy e mòʼón fo vida, a mbvə̀ʼ kù dzə̀ sá kóy e mòʼón. Vida ve koʼón ví wáa dzə kintoʼnìn ke koy e ntàm kiwo e fur.

²⁸ Vé‑eè fèr vitiir ve mbìʼ, ví wáa ker wún sí, a wún sí kér mboòmè si.

²⁹ Vé‑eè sàŋ nsáŋtí é wùn sí, a dzə̀ abvərə̀ʼ wùn aànàʼa, à wo *vifa veé yuv ve ví kér vav si, e sàŋ nsáŋtí wùmòʼ é mboòmè see fó yuv wùn à see fó sar si, a wù ndzə́m mboòmè si ndzə́mén.

³⁰ Vitiir vìn vi‑iì kér kár si sikweè sikweè wùn à ntuŋ si, aá ku fèr e kisha kee brons ki, a kitiir kimòʼón kimòʼón ki kér mbìʼ wo wú‑uù tíy sho e mvəm wó, a ntom si dzə̀ é kor see sikweè se sí‑iì tóm mbìʼ. Vitóm vìn vi‑iì dzə̀, aá fér nsáŋtí shó wún e dzə̀m.

³¹ Kitú ke kitiir ki‑iì dzə̀ buú sikweè, aá tóʼ shuu woó kiŋkar fo mvəm, a dzə̀ wo mbìʼí yíi a tiy sho. Wú‑uù shoò ntàm se kiwo sitaár, sə́rí sóŋén ntàm se kiwo sibaà, aá sáŋ nsáŋtí é wùn wó.

³² Kár si‑iì dzə̀ fó sar sikweè, a ntuŋ si dzə̀ é kilàŋsìn wùn à wúné. Vida ve kar vi‑iì dzə̀ ntàm se kiwo sitaár.

³³ Sí‑iì dzə̀ moo kár se kitentén ke səŋ nyám se ŋkoʼ bèy. Ntuŋ se shuù və́ wùn à vintaà və́ ví, à vifá ve vintaà vi‑iì nəəkin shó vi‑iì dzə̀, aá tón e kisha kee brons ki.

³⁴ Vé‑eè wàyrí vintaà vikweè e kor see sikweè, see fó sar, ví wáa dzə kilàŋsìn wùn à vitiir vi,

³⁵ kitú ke kitiir ki‑iì dzə̀, aá júŋ sə́r, e kaàrí, a wú kóʼ ntàm kiwo.

³⁶ Vintaà wùn à mbìv sé wùn sí‑iì kér nsáŋti vifa veé yuv ve ví kér vav si wùn à wo abvərə̀ʼə́, à wo viyaŋ. Vé‑eè yiì ansáŋtí vin mo kintóʼ ki fəən, e kfə̀n yiì sa wo ndzəmén, e kaàrí wún shó, e tàr.

³⁷ Á mo Hiram‑eè fèrìn vitiir e ghvə̀m, ví wáa dzə réŋréŋ, mbom yev wùn à vifaaŋè ví wáa dzə sa réŋréŋ.

³⁸ Wù kfən fèr mbìʼ sí e ghvə̀m e kisha kee brons ki, a dzə̀ ji mbìʼ e mòʼón e kitiìr kimòʼón, a vikuʼùy vé shùu mbìʼ ví dzə̀ kóy e fur. Mbìʼ wo mòʼóne‑eè li mendzə́v agalon ghii baà.

³⁹ Wù nèn tìír vitiir e mbìy lav cù, e tìír vee vitàn e mbìv ye yì kiʼ tsə́n, e tìír vee vitàn e mbìv ye yì kiʼ kuy, e nèn tìír mbìʼ wo kuʼùné é kor lav cù wo wú kiʼ tsə́n.

Vifá vidzə̀m veé lav cù

⁴⁰ Hiram kfə̀n‑eè fèr sá kíŋ sí wùn à viŋkwaà vi, à vighín ví, e nèn lò, e màysì lim yee Nyùy Tǎr lav ye Fòn Solomon‑eè foon ji wù lim e dzə̀m. A vifá ve wù‑uù fèrìn ví dzə̀ jii:

⁴¹ Vitóm vibaà, tán seé njà kighìn see sibaà é kitu ke vitom, nsáŋtí wo baán wo wù sə́ti tán see shooy.

⁴² Vitúʼtúʼ ví‑iì dzə̀ ghii kweè, a dzə̀ ve á tatin wùn à nsáŋtí wo baán ji á sheŋri tán seé njà kighìn se sí‑iì dzəə̀n é kitu ke vitom sho, a yee mòʼóne kér vitúʼtúʼ ŋgoo sibaà sibaà.

⁴³ Vímóʼ ví jii, vitiir vee ghvə̀m wùn à mbìʼ sév sí,

⁴⁴ à mbìʼ wo kuʼùné wùn aànàʼ vee nshòv sibaà e ghvə̀m ve wú‑uù tíy e kitu wo,

⁴⁵ à kíŋ sí, à visoó vi, à vighín ví. Hiram‑eè fèr vifá veé lav cù vìn vidzə̀m e kisha kee brons ke kpuún kí, e nèn fò e Fòn Solomon.

⁴⁶ A fòn‑eè sùúy, á fèr vifá vìn a dzə̀ é mboʼ ndzə̀v yeé Jordan, e ntìntìn Sukkot wùn à Tsaretan, fo vé‑eè yii ton visha.

⁴⁷ Wù yòʼ‑oò lo fìʼ vidzəəsì vé vifa vìn, bìʼ fo ví‑iì kùʼùn é ŋàŋ. Á bèy, la á yòʼ dzəə kìíy mo vidzəəsì vé kisha kee brons vi dzəə̀n.

⁴⁸ Solomon‑eè fèr sá vifá vee Nyùy Tǎr mvə̀m lav vidzə̀m. Wù‑uù fèr kíy cù wùn à kidàŋ ke kiban ke cù ki. Vifá vìn vidzə̀m, aá fér e *kisha ke mbàm ke baar kí.

⁴⁹ Wù kfən fèr vitiir ve làm e kisha ke mbàm ke baar kee wúntí kíwun, e nèn tìír e mbìy kirə̀ʼ kee jeéy kí, vee vitàn fo mbìv ye yì kiʼ tsə́n, vee vitàn fo mbìv ye yì kiʼ kuy. Wù kfən fèr nsáŋti vibuùshì wùn à lam si, à vimfar vi, kidzə̀m e kisha ke mbàm ke baar kí.

⁵⁰ Wù‑uù fèr abàr wùn à vimfar ve á ndzə́mer və́y shó vi, à vighín ví, à vikáŋ ve kilay ví, à vikáŋ ve á fəər káy se və̀y shó vi, e fèr kidzə̀m e kisha ke mbàm kee wúntí kíwun ki. Wù kfən fèr apincir ve vé‑eè keerì shuu se lav sho, wo wú‑uù nəə fo mvəə́mvəm fo dzəə̀n kirə́ʼ kee jeéy kí féyì, à wo wú fəə́ e ndzəə, a wù ku fèr a dzə̀ e kisha ke mbàm ke baar kí.

⁵¹ Á bèy, Fòn Solomon nèn màysì lim yee Nyùy Tǎr lav cù e dzə̀m, e nèn lì vifá ve tàr wov Davir‑iì lèmèn ne jeéy ji vé Nyùy Tàr, e wìy sho, e wày é vitàv veé lav cù. Vifá vìn vi‑iì dzə̀ jii, kisha ke mbàm ke fəvír kí wùn à ke baar kí, à vighín ví.