1 Afòn 6 - ŊWÀʼ NYÙY

Fòn Solomon báʼrí lav cù

¹ Wáa dzə e ŋwee woo baà wo á yoŋ ji Siv, e kiya ke Solomon‑eè sí sáʼ ji viyá vikweè, wù nèn kèʼ, a bàʼrì lav cù Nyùy Tàr, a sì kiyá kishóv mwaamé é ghiì kweè (480) mo wír veé Israyi‑iì loòn fó Ejiv.

² Lav cù Nyùy Tàr ye Solomon‑eè baʼrì rə̀n‑eè dzə̀ kóy nshòv sitàn e ghvə̀m fo vikùʼùy, a mbvə̀ʼ dzə̀ kóy e tàn, a vida vi dzə̀ kóy saàmbà e kimbéʼ ki.

³ Shúu kibùʼ wo wú nəə e lav cùu wáa dzə kóy e tàn fo vikùʼùy réŋréŋ mo mbvə̀ʼ lav cù dzəə̀n, a mbvə̀ʼ kibùʼ dzə̀ kóy e baà e kimbéʼ ki.

⁴ Lav cù rə̀n‑eè kér awundu, aá fáŋkír fó mvəm, e dòrkír fo ndzə.

⁵ Vé‑eè bòm mewón me lav, e làŋsìn e wǔn lav cù fo ndzə e virəv vee fó ghaŋ wùn à ké bàm kí.

⁶ Mewón me lav mèn mè‑eè dzə̀ ŋkèʼ sitaár, yìmòʼ e yìmǒʼ kitu, a ŋkèʼ yee shó kér mfìʼ rə fó mbvə̀ʼ. Mbvə̀ʼ ŋkèʼ yee fó sar‑iì dzə̀ kóy e mòʼón e ntàm si sibaà, ye ŋkèʼ yee fó kintìntìn wáa dzə kóy e mòʼón e kimbéʼ ki, a ye ŋkèʼ yee fó yuv nèn dzə̀ é mbuù ntàm sibaà fó koy e baà. A dzə̀ jii, Fòn Solomon‑eè bóm kirə́v ké lav cù, kí kóʼ mee e ŋkèʼ yìmòʼ, kí wàa ker nsèʼ e dzəə ye vintaà vi neem é kitu wo, e làa yòʼ dzə́ə nəəkír e wǔn lav cù.

⁷ Vé‑eè baʼrì lav cù, náŋsin tíy búʼú, a dzə̀ é bií tiy, bìʼ fo á yòʼ‑oò taʼ e yu kikum ke hama, kìn ké ntóŋ, fə̀m à ké kishà kiné kí fo vé‑eè bóm lav cù.

⁸ Fo mewon me lav meé ŋkèʼ si, shúu‑uù nəə e ŋkèʼ yee fó sar, a dzə̀ é mbìv lav cù ye yì kiʼ tsə́n, e bó a tosín, a koʼ e ŋkèʼ see fó yuv, a dzə̀ dzə́ə ye seʼtìn.

⁹ Fòn Solomon bóm wúntí lav cù, e màysì, e nèn neèr vintaà ve kikfəv, a dzə̀ kicí ké *sidar, e sàŋ kikfə́v, a dzə̀ e kicí ké sidar ke toʼón kí.

¹⁰ Wù nèn bòm mewón me lav mee fó ghaŋ, a ŋkèʼ mòʼón mòʼón dzə̀ kóy e ntàm si sibaà fó koʼ e yuv, a vintaà ve kici vé sidar vi neém, e làŋsìn e wǔn lav cù.

¹¹ Nyùy Tàr nèn sùúy e Solomon jii,

¹² «Nsàv lav cù ye à baʼrì rə̀n dzə̀ jii, aà lò, a yu sáʼ yém, a jùmrì kinyo ke m tinen, a yunín nsər sém, à yiì mo sí suuyì, bo m yíi yiì, é kinyo ke mò‑oò kàʼàn tàr won Davir sho ki gheén, a dzə̀ e wò kiwo,

¹³ a kí dzə̀ jii, m wíy a dzə e lav cù fèn, a dzə e wír veé Israyí mvəm, e làa yòʼ wìy màʼtì áwune vee wír vém.»

¹⁴ Á bèy, Solomon nèn bàʼrì lav cù, e màysì.

Á náŋsín mvəm lav cù

¹⁵ Fòn Solomon‑eè sə̀tí virə́v vee fó mvəm, e kèʼ fo nsaàlav, e kòʼ mèé e kikfəv, e kicí ké sidar ke toʼón kí, e nàŋsín nsaàlav e kicí ké dzəʼə̀y ke toʼón kí.

¹⁶ Wù tínén mvəm lav cù fo bàm, kóy e tàn, fóo wáa dzə kirə́ʼ kee jeéy kí féyì ji kikìkìŋ ke Nyùy, e nèn sə̀tí wún lav, e kèʼ fo nsaàlav, e kòʼ mèé e kikfəv e kicí ké *sidar ki.

¹⁷ Mvə̀m lav ye yì‑iì dzəə̀n fó mbìy kikìkìŋ ke Nyùy‑iì dzə̀ kóy e ghvə̀m fo medà.

¹⁸ Vé‑eè bàrír kicí ké sidar ke toʼón kí mvəm lav cù e dzə̀m, la tíyí yòʼ a yensín. Á kfən yiì nsáŋti vitem ve ŋgìʼ wùn à wo vibuùshì é vici fóo fèy.

¹⁹ Vé‑eè nàŋsín kikìkìŋ ke Nyùy fo bàábàm é mvə̀m lav cù fo vé‑eè yíi tiír ŋkùv mensàŋ Nyùy Tàr.

²⁰ Kirə́ʼ kee jeéy kee fó bàábàm kin ki‑iì dzə̀ kóy e tàn fo vidà ve koʼón ví, kóy e tàn fo mbvə̀ʼ, kóy e tàn fo vikùʼùy, aá láʼtí *kisha ke mbàm ke baar kí kee wúntí kíwun fo wùn sí, e kfə̀n làʼtí e wǔn kiy cù wo á barisin kicí ké sidar e wùn wó.

²¹ Mvə̀m lav cù‑uù dzə̀, aá láʼtí sá kisha ke mbàm ke baar kí shó, kee wúntí kíwun, shuu wo wú nəə e mvə̀m lav yee fó mvəmé wáa dzə, aá láʼtí kisha ke mbàm ke baar kí shó, e nèn tàŋsìn asháŋ é shuù foo fèy, aá fér e kisha ke mbàm ke baar kí.

²² Vé‑eè láʼti kisha ke mbàm ke baar kí é mvə̀m lav cù, e làʼtí, e dù mèé mo yì‑iì màyìn, e màysì, e làʼtí sa e kiy cù wo wú‑uù dzəə̀n é kirə̀ʼ kee jeéy kí kee fó bàábàm.

²³ Vé‑eè fèr nshwìnin vifa veé yuv vímóʼ ví vibaà e kicí ké *oliv ki, a ví kér vav si, ví wáa tiy e kirə̀ʼ kee jeéy kí kee fó bàábàm, a vida vév ví dzə̀ kóy e baà baà e kimbéʼ ki.

²⁴ Vav ye mòʼóne‑eè dzə̀ kóy e ntàm se kiwo si sibaà. Móo lò fo shóy vàv yímóʼó, e dù meé e yímóʼó, vida vi‑iì dzə̀ kóy e baà e kimbéʼ ki.

²⁵ Vav sév sí kù‑uù dzə̀ réŋréŋ bìʼ fo mbom yev‑iì dzəə̀n e mòʼón, mfìʼ yev e mòʼón.

²⁶ Vida ve koʼón ví wáa dzə sa mfìʼ e mòʼón, a dzə̀ kóy e baà e kimbéʼ ki.

²⁷ Vé‑eè tìír vifá vìn e mvə̀m kirə̀ʼ kee jeéy kí kee fó bàábàm é lav cù, a vav sév sí násí wún. Vav sév see fó ghaŋ si‑iì kum wún sé lav, a see fó kintìntìn si kumnìnè.

²⁸ Vé‑eè laàrì wún vifa vìn e kisha ke mbàm ke baar kí.

²⁹ Vé‑eè yiì nsáŋti vifa veé yuv, à wo viyaŋ, à wo vibuùshì ve ví bùyìn ne e virəv veé lav cù, e kù yiì bèy e ŋgày, e yiì e kinshèr kee fó mvəə́mvəm.

³⁰ Vé‑eè laàrì nsaàlav e dzə̀m e kisha ke mbàm ke baar kí, yeé ŋgày, à yee fó mvəə́mvəm.

³¹ Vé‑eè fèr shuu wo wú nəə e kirə̀ʼ kee jeéy kee fó mvəə́mvəm, wú wáa ker kór e tàn, a kitú ki dzə̀ kishóvtín, nshìy si wáa dzə sibaà, aá fér e kicí ké oliv ki.

³² Á bùʼ nsáŋtí shó woo wo *vifa veé yuv ve ví kér vav si, à nsáŋti viyaŋ wùn à wo vibuùshì, e nèn laàrì kidzə̀m e kisha ke mbàm ke baar kí.

³³ E kibùʼ ke kí nəə e nsaàlav ye kuʼùn, á fèr mboòmè e kicí ké oliv ki, a kibuʼ ki dzə̀ kór e kweè, mbìv sidzə̀m réŋréŋ.

³⁴ Shuu si‑iì nəə fo sibaà, a wo mòʼón mòʼóne kér nshìy sibaà sibaà, aá fér e kicí ké dzəʼə̀y kí, a sí mvəʼə̀m sidzə̀m,

³⁵ aá búʼ nsáŋti vifa veé yuv ve ví kér vav si shó, à wo viyaŋ, à wo vibuùshì ve ví bùyìn ne, e nèn laàrì e kisha ke mbàm ke baar kí.

³⁶ Fòn Solomon nèn gìŋ maàndzə yee fó mvəm e tíy ye buʼúné akur ataár, e màysì kur wo mòʼón e kicí ké sidar ki.

³⁷ Fòn Solomon‑eè wày kinsə̀ŋ ke lav cù Nyùy Tàr e ŋwee woo Siv, wo yì‑iì dzəə̀n ji ŋwee woo baà fó kiya, a wù sí sáʼ ji viyá vikweè.

³⁸ Wáa dzə e kiya ke wù‑uù sí sáʼ ji kiyá nshòv mòʼón e ghvə̀m e ŋwee woo Bul, wo yì‑iì dzəə̀n ji ŋwee waamé fó kiya, á màysì lav cù wùn à kifá kfə́ kí kidzə̀m mo kí‑iì kér fó a dzə. Fòn Solomon‑eè bàʼrì lav cù kiyá saàmbà.