1 Afòn 20 - ŊWÀʼ NYÙY

Fòn woó Siiria nəə́ rə́r é Samaria

¹ Fòn Ben‑Hadad woó Siiria nèn lò, e bàʼtí və́ vé rərí adzə̀m. Afone tóm wun nshòv sibaà e mtaár, aá kér *viténtén vé rər, à nyám se ŋkoʼ si. Wù nèn kòʼ, a gìm Samaria e rə́r sí.

² Wù lò, e tsə̀nsí vé ntume é ŋkàlaʼ fo Fòn Ahav woó Isray wùn. Wù lòo tum, e yòŋ ji á du, e sùúy a e Ahav ji wun woo Ben‑Hadad suuy e wun a jii,

³ «Kisha ké ke mbàm ke fəvír kí, à ke baar kí sì kém. Vikìy vé ve juŋe wùn à wón vé ve tavkíné kù sì sá vém.»

⁴ Fòn woó Isray dú, e bìnèr jii, «Taàtá wom woo fon suuy a rú. M fò á ne kifá kém kidzə̀m a e wun, à kitú kém kí shó.»

⁵ Aŋgàa ntume dú, e siì kfə̀n é bàm fo Ahav wùn, e sùúy ji Ben‑Hadad suuy a ji wun kì tsə̀nsí á ne ntum a ji wù fó á kisha kfə́ ké mbàm ke fəvír kí wùn à ke baar kí e wun, e kfə̀n fò á vikìy və́ ve juŋe wùn à wón və́ ve tavkíné.

⁶ Yii bèy lèn, lóo dzə a kibvəə́shí moó ghan sin bèn, é wun tsə́nsí á wír və́, aá wiy, e tàr a ntoʼ rə, e tàr lav se vé wòŋe. Aá lòo tàr, e yèn kifá ke kí gheenen áwune, bo á li a liìn.

⁷ Fòn woó Isray yú bey, e nèn tòóy vé wòŋe adzə̀m, e sùúy aáwune jii, «Vèn leéy, e yèn mo wìr və̀n taʼ shuu vèr wun. Wù‑uu tsə́nsí ntum ji m fó a vikìy vém wùn à wóné e wun, e kfə̀n fò á kisha kém ké mbàm ke fəvír kí wùn à ke baar kí. Mò‑oo biímé.»

⁸ Vé wòŋe wùn à wìr dzə̀m sháʼnín jii, «Nyàr káʼ, lá fòn yòʼ waà yuùrí, lá fòn yòʼ waà biìmé.»

⁹ Fòn nèn sùúy e vé ntum Fòn Ben‑Hadad vìyi jii, «Vèn du, á sùúy e taàtá wom woo fon jii, ‹M yíi yiì a kinyo ke mbìy ki kidzə̀m ke wù kì yòŋèn á e mò woo ŋgaà lìm və. Yii bèy, fo ke wù yòŋèn lèn ki, m yoʼ waà biìmé.› » Aŋgàa ntume nèn lò, e dù, e tiìsí.

¹⁰ Fòn Ben‑Hadad sii tsə̀nsí vé ntume fo Fòn Ahav wùn jii, «M yíi laàr Samaria, e yèr e dzəə ye bó yòʼ dzə̀ wìr fə̀m a ker kibvər kée ŋèʼ e kiwo. A m dzə̀ là fóo yiì mo m yòŋèn ben, anyùyi kù màʼ ŋgeʼ e mǒ kitu, e kfə̀n dzə̀sì.»

¹¹ Fòn Ahav bìnèr jii, «Lá wìr wo wù dzəə́ fəə́ rə́r fəə́n yòʼ a binsí nsiì moo wír wo wù màʼàn ne a, e kfə̀n é bàm.»

¹² Fòn Ben‑Hadad yú binèr làm rən, a wùn aàfon ve vé‑eè tóm wune nó meluʼ aáwuné vibàn, wù nèn fò sáʼ jii, «Vèn báʼtí, e nə̀ə́ rə́r sí.» Áwune nèn bàʼtí, e taàmé ŋkàlaʼ e rə́r sí.

Fòn Ahav tón Fòn Ben‑Hadad

¹³ *Ŋgaà ntum Nyùy nèn wìy fo Fòn Ahav wùn, e sùúy jii, «Nyùy Tàr suuy jii, ‹Lá à yòʼ a fàn mànjòŋ wo wù beéme və̀n. M yíi way e wò kiwo lán, áà nèn kìíy ji m dzə̀ á Nyùy Tàr.› »

¹⁴ Fòn Ahav nèn dzə̀r jii, «Shúu rər wó mbìyi yíi a dzə ala?» Ŋgaà ntum Nyùy bìnèr jii, «Nyùy Tàr suuy a ji wónlě nsùm ve tavkín ve á dzəə̀n áàmfòómeé sari yíi a dzə shúu rə́r mbìyi.» Fòn Ahav kfən dzə̀r jii, «Yíi wam la rə́r, é bo sí keʼ.» Ŋgaà ntum Nyùy bìnèr jii, «Yíi wam a wun woo fon.»

¹⁵ Á bèy, Fòn Ahav báʼtí wónlě nsùm nshòv sibaà e mtaár e ghiì baà (232) ve yì‑iì dzəə̀n vé rər ve tavkíné ve vé‑eè dzəə̀n áàtàá mfòómeé sar. Wù kfən bàʼtí mànjòŋ woó Isray wír nsə̀kì saàmbà,

¹⁶ á nèn fəə̀ rə́r e ntìntìn shùy, a Ben‑Hadad wùn aàfon vee nshòv sibaà e mtaár ve vé‑eè tóm wune dzə́ aáwuné vibàn, nó, jiŋkìr jìŋkìn.

¹⁷ Vé rər vee wónlě nsùm ve tavkín víyi fəə́ rə́r fó mbìy. Vé ŋkiy ve Fòn Ben‑Hadad kì fəəriné nen wìy, e sùúy e wun jii, «Vé rərí sí fəə́ fo Samaria, wiyì.»

¹⁸ Wù nèn fò sáʼ jii, «Kìn á wiy a dzə̀ fóo lon nyaáŋ, kìn á wiy a dzə̀ rə́r. Vèn koòrí áwune, e wìy sho atin.»

¹⁹ Wónlě nsùm ve tavkín víyi nèn kèʼ, a nəə́ rə́r fó mbìy, a mànjòŋ woó Isray jumrì fo bàm,

²⁰ a wìr yúyri wír wo wùn wun funènè. Wír veé Siiriàa yú ntéŋ, a leʼ, a wír veé Israyi nyoorì fo bàm kibí kibí. Fòn Ben‑Hadad sòsìn ji cóʼ, e lèʼ é kitu ke nyàmŋkoʼ wùn à vé koʼ ámóʼó.

²¹ Fòn Ahav woó Isray fəə́, e faàsì nyám se ŋkoʼ wùn à viténtén vé rər ví, e yùyrí wír veé Siiria e dzəə ye tavín.

Fòn Ahav kfən tòn Siiria

²² *Ŋgaà ntum Nyùy kfən wìy lò, e dù, e yèn fon woó Isray, e sùúy sho jii, «Á wàá báʼtí á kijuujùŋ, e yèn ó ji á sà lo, e yèe le á, bìʼ fo fòn woó Siiria wíy nəə́ a wun e rə́r sí é kimgbù ke wuu.»

²³ Wù wáa suúy bèy, aàtǎr ntoʼ Fòn Ben‑Hadadi‑iì sìíy ne, e sùúy e wun jii, «Anyùy wìr veé Israyi dzə̀ anyùy veé agwan. Á kifá ke kí‑iì yiìn á, é bo wír veé Israyi táv, e ghàʼ á áwune. Fòn wàá ku màʼtì lèn, aáwune tám a dzə̀ é mboʼ ji bó áwune yòʼ sà‑áà gháʼ wír veé Isray a?

²⁴ Kinyo ke kí dzəə̀n kí dzə̀ á ji á tsəʼ á afon, e lèm a dzə̀ á amfòómé, aá wáa wam a rə́r.

²⁵ Fòn báʼtí á vé rərí moo ve wù‑uù làyìn á bèy, e siìr nyamŋkoʼ e nyàmŋkoʼ, e siìr kiténtén ke səŋ nyám si e kímóʼ kí. Á bèy, aáwune nèn tàm é mboʼ ji bó áwune yòʼ sà‑áà ton wír veé Isray a?» Fòn Ben‑Hadad biímé nshù yev, e nèn a baʼtí.

²⁶ Nèn a dzə e kimgbù ke wuu, Fòn Ben‑Hadad wùn à wír veé Siiriàa báʼtí rə́r, e kòʼ é Afek ji á funen á wír veé Isray.

²⁷ Wír veé Israyi báʼtí sá, e lì vifá ve rər, e nèn a dù ji wùn áwune wàá tárnín. Wír veé Israyi‑iì tàm e wír veé Siiriàá ŋkìʼnìn, virə́ʼ vibaà moo meŋgoo me bvəy bèy, wír veé Siiriàa sáŋrí kév gwaáné e fur.

²⁸ Ŋgaà ntum Nyùy nèn wìy, e yèn Fòn Ahav woó Isray, e sùúy sho ji Nyùy Tàr suuy a jii, «Mo wír veé Siiriàa yoŋ mo ji Nyùy woó agwan, a yòʼ dzə̀ woó mboʼ, m lo, e way ŋkfə̌n wìr vìn e wò kiwo, áà nèn kìíy ji m dzə̀ á Nyùy Tàr.»

²⁹ Wír veé Siiria wùn à veé Israyi nèn tàm, a kìʼnìn, kishiíy saàmbà. Wáa dzə e kishiíy ke kí‑iì meen ji saàmbà, rə́r sí tsə́ŋén, wír veé Israyi yúyrí wír veé Siiria ve vé‑eè maʼ rə́r é nsay kishiíy kimòʼón wír nsə̀kì wií.

³⁰ Kibér ke wìr ki léʼ, e dù e ŋkàlaʼ yee Afek, kayi dù, e keèsì, e yùyrí áwune wír nsə̀kì nshòv saàmbà e mbaà. Fòn Ben‑Hadad léʼ, e làáy e ŋkàlaʼ, e lav yee fó mvəm.

³¹ Atǎr ntoʼ vəə́ wìy, e sùúy e wun jii, «Vèr yú ji afon veé Israyi dzə̀ á vé mendzə̀ne. Fòn ku màʼtì a, é vèr kúr vinsàʼ ve ndzə̀y é wùn, e ndzə̀m akfəə̀ e věr vilòŋ, e dù, e yèn fon woó Isray, a tàm é wù bávtí á dzəʼə̀m fòn.»

³² Fòn biímé, áwune nèn kùr vinsàʼ ve ndzə̀y, e ndzə̀m akfəə̀ aáwuné vilòŋ, e nèn dù, e yèn Fòn Ahav woó Isray, e sùúy sho jii, «Nyàr, ŋgaà və lìm woo Ben‑Hadad lón a ji fòn ku màʼtì a wun e tin.» Fòn Ahav dzə́r jii, «Wù dzə̀ə́ sho e tin à? Wù fèn dzə̀ fə́r wom.»

³³ Aŋgàa ntume yú bey, e yèn ji vishí vév ví bòŋ a ne, e nèn gìtì, e sə̀ fo fòn shuù jii, «Nyàr, fər fòn woo Ben‑Hadad.» Fòn Ahav nèn yòŋ jii, «Vèn du, e lì wun, e wìy sho.» Á dù, Fòn Ben‑Hadad nèn wìy. Fòn Ahav suúy, wù nəə́ e wun kitentén ke səŋ nyám si.

³⁴ Fòn Ben‑Hadad nèn lò, e sùúy e Fòn Ahav jii, «M lo, e siìr ŋkà se laʼ se tàr wor‑iì faàsìn fo tàr won e wò, áà kfən kòóy kirə́ʼ ké ke way é Damaskus, kù mo tàr wor‑iì kér sa e Samaria.» Fòn Ahav yú bey, e sùúy sho jii, «M lo, e gwàr *mensaŋ wòsò, e bóo màʼtì wò, áà wáa dù.» Wùn wun nèn gwàr mensaŋ, bo wù maʼti, é wù wáa dù.

Ŋgaà ntum Nyùy nyáysí Fòn Ahav

³⁵ Kí‑iì kòóy bey, wìr wùmòʼ fo aŋgàa ntum Nyùyi nèn lò, e dù, e yòŋ e wùmòʼ jii, «Nyùy Tàr yoŋ a ji kii wun, wù wàá ndzə́n á wun. Yii bèy, ŋgaàŋ tén fó ndzən.»

³⁶ *Ŋgaà ntum Nyùy və̀y suúy shó jii, «Mo à tenen fó yunín Nyùy Tàr, bo à lóo dù, é bvərə̀ʼ yúyrí wò.» Kù mo wù màʼtìn wun, a dù, wùn bvərə̀ʼ tárnín, bvərə̀ʼ nèn yùyrí wun.

³⁷ Ŋgaà ntum Nyùy və̀y kfən yèn wùmòʼ, e sùúy sho jii, «Kii wò, ku ndzə̀n mo.» Wù nèn ndzə̀n wun kitávín, e lèmér.

³⁸ Ŋgaà ntum Nyùy və̀y nèn lò, e dù, a shìy fon woó Isray e ghaa dzəə, a wù kúr ne kinsàr ke ndzə̀y e wun si ji lá fòn yòʼ yiì kìíy a wun.

³⁹ Fòn yiì lòo shaà, wù wáa waamé, a suúy jii, «Nyàr, ŋgaà lìm fòn kì dù á e kwaʼ rər, wìr rə̀r wùmòʼ wíy á e wìr rə̀r wo wù kì koon, e sùúy a e mò ji m wáa yen a fo wù léʼ. A wù lòo dzə, e lèʼ, bo m yíi kpu a e wun kiliŋ. Kí búŋ fó bèy, bo m laʼ a e kisha ke mbàm ke fəvír kí akilu nshòv sikweè e mtaár.

⁴⁰ Mo woo ŋgaà lìm fòn nen lòo yiì vinyo vímóʼ ví, wù léʼ.» Fòn bìnèr jii, «Kù sàʼ wò nsaʼ yè, e tìnén. À kù kér fó làʼ mo à yòŋèn.»

⁴¹ Wù nèn gìtì, e bvə̀r kinsàr ke ndzə̀y fó si, fòn nèn kìíy ji dzə̀ á ŋgaà ntum Nyùy.

⁴² Wù suúy e fòn ji Nyùy Tàr suuy a jii, «Mo à màʼtìn wír wo m yòŋèn ji à yuyrí, wù dú, bo à lo, e kpu e wun kiliŋ, é wír vée kpú sá e vəə́ kiliŋ.»

⁴³ Kinyo kìy ki tén fon woó Isray, wù wáa kfən e bàm é Samaria, a wù dzə̀ é nsòv, a kinyo kìy ki jívir wun.