1 Afòn 2 - ŊWÀʼ NYÙY

Fòn Davir tír kpú e Solomon

¹ Fòn Davir yú a wù sí méʼ mentsə̀m me kpu, e nèn tòóy wán və Solomon, e tìr kpú sho.

² Wù‑uù tír, suuy jii, «M sí lo, a màʼtì kitú ke nsay. Kúr shilív shí, a dzə ji lumèn.

³ Á yiì vinyo ve Nyùy Tàr woo Nyùy wò yòŋèn ví, a ghan e wun mbòv, a yu sáʼ rə́, a yunín nsər sə́. Kú a jùmrì vinyo ve wù tínen vi vidzə̀m, à ntò se vinyò si mo sí dzəə̀n é Ŋwàʼ Nsər wo Mooser‑iì saŋen, é vinyo vé vi wìy a ghan kijuŋ, a fə̀m dzə̀ ka, aà fə̀m dzə̀ feé.

⁴ Aà yúnin Nyùy Tàr, bo wù wíy yiì kinyo ke wù‑uù kàʼàn mo shó jii, a wón vée wìy a tiír kiwuú, a fìʼ, a ghan e mǒ mbòv shilív shimòʼón, a tiír vifií e mǒ wùn, bo rám yée yòʼ wíy buŋ wír wo wù wáa dzə e kàvàʼ woó Isray.

⁵ «Ké Joav woo wan Tsəruyia, wówò kitú ké, à kì kinyo ke wù‑uù mùmèn e mò, mo wù‑uù lovtin áàmfòómé veé Isray vee Abner woo wan Ner wùn Amasa woo wan Jeter. Rə́r sí‑iì mày, a sí máy ne, Joav yúyrí áwune ji ŋkfə́tir kinyò keé shùu rər, aáwune yòʼ‑oò kér jay. Lèn və̀n, a m kù dzəə́ lim ŋgeʼlàʼ, yén ŋgeʼ bìʼ jay və.

⁶ Yòʼ dzə̀ à mèŋ kinyo kée yiì e wun. Mo wù fə̀m dzə̀nèn ne, lá à yòʼ biìmé, é wù kpú kpú ye juŋe.

⁷ «Yii bèy, ku dìn koŋ yé ye ruú e wón Barsilay woó Gileadi. Á leéy fo áwune. Áwune‑eè dìn koŋ ye ruú e mò é ghan se mò‑oò léʼ fər wò woo Absalom.

⁸ «Ké Shimey woo wan Gera, Gera woo wìy fó Bahurim e nsay Benjamin, wù‑uù kuùrì mo féyì e kishiíy ke mò‑oò du e Mahanayim. Yii bèy, e kishiíy ke wù‑uù wìyìn, e yèn mo é ndzəv yee Jordan, mò‑oò yiì kilìʼ ke tavín kí e Nyùy Tǎr yir ji m yòʼ wíy yuyrí a wun.

⁹ Lèn və̀n, lá à yòʼ màʼtì ji wù dzən, e dù e sày e fúv sí kitu. À dzə̀ wír, aà kér vifií. Yòʼ dzə̀ à mèŋ kinyo kée yiì.»

Fòn Davir láy

¹⁰ Fòn Davir nèn lày, á lìtì wun e Ŋkàlaʼ Davir.

¹¹ Wù‑uù sàʼ Isray kiyá mkweè. Wù‑uù sàʼ é Hebron kiyá saàmbà, e sàʼ é Jerusalem kiyá nshòv sitaár e mtaár.

¹² Á bèy, Solomon nèn lì kirə́ʼ ké tàr wov Davir, á kóʼór wun e kàvàʼ, sáʼ rəə́ tuúy.

Kpú Adonija

¹³ Adonija wo yè wov‑iì dzəə̀n Haggit nèn lò dù, e yèn Batsheba woo yìy à Solomon. Batsheba dzə́r shó jii, «Wiy ye à wìyìn yíne dzə̀ ye réŋé á?» Wù biímé ji dzə̀ á ye réŋé.

¹⁴ Wù kfə́n a dzə̀sì, a suúy jii, «M kér kinyo kée suúy e wò.» Batsheba nèn biìmé ji wù wàá suúy.

¹⁵ Wù nèn sùúy jii, «Kí à kì ji vifon vìn vi‑iì dzə̀ vém, a wìr dzə̀m woó Isray‑iì kì ji fòn dzə̀ á mo. Yii bèy, vinyo vi kúvsín, vifon vi nèn dù a dzə̀ e fər wom, bìʼ fo dzəə̀n mo Nyùy Tàr‑iì koŋè.

¹⁶ Kee lèn ki, m wáa ker kinyo kimòʼón ke m lón wò sho. Kii wò, lá à yòʼ shàʼnín.» Batsheba dzə́r jii, «Kinyo kee shó ki dzə̀ ji ka?»

¹⁷ Wù suúy jii, «Ku lòn Fòn Solomon ji wù ku màʼtì a Abishag woo lò fó Shunem, é wáa dzə wíiy wom. A yòʼ dzə̀ fòn tèn kinyo ké.»

¹⁸ Wù biímé jii, «M yíi sə wò, e suŋnín e fòn.»

¹⁹ Á bèy, Batsheba nèn dù, e yèn fon ji wun súŋnín á e wun e Adonija yir. Fòn nèn lò e yuv, e səə̀sí yè wov, e shàʼtì, e nèn kòʼ e wun kàvàʼ. Wù suúy ji á wiy e kikoʼtìn ki, é yè wov dzəʼəm á sho. Á wìy sho, wù nèn dzə̀ʼə̀m e fòn ghaŋ.

²⁰ Wù suúy e fòn jii, «M kér shinyorìn she m taʼ, e lon a fon sho. Lá fòn yòʼ a tèn.» Fòn suúy jii, «Yòŋ ri kifá ke à taʼ lon ki. Yòʼ dzə̀ m tèn kinyo ké.»

²¹ Wù nèn sùúy jii, «Fòn ku sùúy, aá fó á Abishag woó Shunem e Adonija woo fər fòn, é wù wáy á e lav ji wiíy.»

²² Fòn suúy e Batsheba jii, «Aà taʼ ji m fó Abishag ji wiiy Adonija, kí bo bèr ne ji à yoŋ ji m fó vifon sho. Kí wù dzə̀ fə́r wom woo ŋgàywìr, a Abiyatar woo taà cù wun Joav woo wan Tsəruyia tíy e wun mbìv.»

²³ Fòn Solomon nèn lìʼ e Nyùy Tǎr yir jii, «A Adonija dzə̀ làa yòʼ kpu fo wun shuù, Nyùy kù màʼ ŋgeʼ e mǒ kitu, e kfə̀n dzə̀sì.

²⁴ Mo Nyùy Tàr dzəə̀n shó, wo wù‑uù koʼorin mo é kàvàʼ ji njìlaʼ tàr wor Davir, e kfə̀n fò mo kfəə́ mo wù‑uù kàʼàn, bo á kér fóo yuyrí Adonija lán.»

²⁵ Fòn Solomon nèn tsə̀nsí Benaya woo wan Jehoyiada, wù dù, e ndzə̀n Adonija, e yùyrí.

Á júm Abiyatar, e yùyrí Joav

²⁶ Fòn Solomon nèn sùúy e Abiyatar jii, «Lò a dù e wò kirə̀ʼ é Anatot. À kì kér fóo kpu, yii bèy, m yòʼ‑óò yúyrí wò lèn, bìʼ fo wò‑oò béʼ ŋkùv mensàŋ Nyùy Tàr woo Taà Ndzə, aà dzə̀ vèn tàr wor Davir. À kfə̀n‑eè yén sa ŋgeʼ se wù‑uù yéné.»

²⁷ Fòn Solomon nèn jùm Abiyatar fo wù wáa dzə taà cù Nyùy Tàr, kí nen ghèén e kinyò ke Nyùy Tàr‑iì suuyin kùm Eli wùn à kfə́ə rəə́ é Shilo.

²⁸ Joav yú kinyo ke kí kooyin Adonija, e nèn nyèŋ, e dù fo kibàn ké Nyùy Tàr kí dzəə̀n, e bàm loŋ se kiy cù, a ker. A wù nyéŋ bèy, bìʼ fo wù‑uù tóm a dzə̀ Adonija. Yii bèy, wù yòʼ‑oò ló a tom Absalom.

²⁹ Fòn Solomon yú ji Joav nyèŋ á ne, e dù e shùu kibàn, a dzə a e ghaa kiy cù, wù nèn tsə̀nsí Benaya woo wan Jehoyiada ji wù du, e yùyrí a wun.

³⁰ Benaya nèn dù e shùu kibàn, e sùúy e Joav jii, «Fòn tooy wò.» Wù bìnèr jii, «Àáy, m yíi kpu fèn.» Benaya nèn dù, e naàrì kinyo ke Joav suuyin e fòn.

³¹ Fòn yóŋ jii, «Dù ri, e yiì mo wù suuyin. Dùu, e yùyrí wun, e dzəə̀mè. Á bèy, áà nèn tsə̀ʼ lǒn jay mensə fo vèr à tàr wór lav. Jay və̀n dzə̀ yúyrí ye Joav‑iì yuyrin wír vee là jay.

³² Nyùy Tàr wíy siìr lǒn mensə me wìr ve wù‑uù yuyrin kisáŋ e wun kitu. Wù‑uù yùyrí wír abaà, a bó tàr wor Davir yòʼ kì fó fo, a wír vìne‑eè dzə̀ wír vee jwáʼ, a liì wov bóŋ, e shaà wo Joav. Wù‑uù yùyrí Abner woo wan Ner wo wù‑uù wám vé rər veé Isray, e kfə̀n wìy yùyrí Amasa woo wan Jeter wo wù‑uù wám vé rər veé Juda.

³³ Lǒn mensə me wìr ve Joav‑iì yuyriné kù wíy a dzə e wùn à rám rəə́ kitu ghán sidzə̀m. Yii bèy, fo Davir kiliŋ wùn à kfə́ə rəə́, à lav rə, à vifon və́ ví, Nyùy Tàr ku yiì, é nyaáŋ wáa dzə aáwuné mvəm ghán sidzə̀m.»

³⁴ Benaya woo wan Jehoyiada nèn kòʼ, e ndzə̀n wun, e yùyrí. Á nèn dzəə̀mè e wun laʼ, e woʼ.

³⁵ Fòn nèn lèm Benaya woo wan Jehoyiada ji wù wáa wam a vé rərí e Joav kiliŋ, e kfə̀n lèm Tsadok ji taà cù e Abiyatar kiliŋ.

Kpú Shimey

³⁶ Fòn nèn tòóy Shimey, e sùúy sho jii, «Bóm lav yè e Jerusalem fèn, a dzə sho. Lá à yòʼ wìy fəə̀ ŋkàlaʼ rə̀n, e dù e kirə̀ʼ.

³⁷ Aà wìy lìysín Kiwoóy ké Kidron, à nèn a kiíy ji à kù sì á ŋkfə e kishiíy fóo fèy, bo kù tàʼ wò kpú yé e wó yée.»

³⁸ Shimey biímé jii, «Nyàr, bo mo woo kwǎn fòne kù yíi a yiì a mo taàtá wom woo fon waà yòŋèn.» Shimey nèn bònén, a dzə e Jerusalem.

³⁹ Viyá vi shaà vitaár, akwǎn Shimeyi nyéŋ abaà, e dù, e yèn Akish woo wan Maaka, a yì‑iì dzə̀ fon woó Gat. Shimey nèn lò, e yù ji akwàn və́ viyi dzə̀ á e Gat,

⁴⁰ e nèn ŋàʼáy, e kùr kimbèʼbìy kfə́, e dù e Gat, e yèn Fòn Akish ji wun taʼ a akwàn və́. Wù tàʼ, e yèn, e nèn lì, e kfə̀n shó.

⁴¹ Kí tó e Fòn Solomon kitùʼùr ji Shimey fəə̀ á ne Jerusalem, e dù a e Gat, e kfə̀n á kfənén é bàm.

⁴² Fòn toóy Shimey, e sùúy sho jii, «Bó m yòʼ‑oò lo sùúy ji à kan yír Nyùy, m kfən shìvìr ji kishiíy ke à wíy lò fo fèn, e dù e kirə̀ʼ, bo à kù sì ŋkfə à? Kí wò‑oò sùúy e mò ji kinyo ke m yòŋèn kí dzə̀ kijuŋ, aà waà yíi a yiì mo kí dzəə̀n.

⁴³ Kòóy ka lèn, bo à yáʼáy kilìʼ ke wò‑oò yiìn e Nyùy Tàr, e kfə̀n ŋwày jí yem.»

⁴⁴ Fòn kfən sùúy e Shimey jii, «À kì e wò vifii vinyo vidzə̀m ve wò‑oò bùʼùn e tàr wor Davir. Nyùy Tàr yíi siìr vinyo vee shooy e wò kitu,

⁴⁵ e nèn səə̀vì mo, e yiì, é sáʼ Daviri wáa tiy fo, e wìy dù, e mày.»

⁴⁶ Fòn nèn yòŋ Benaya woo wan Jehoyiada, wù fəə́ fó ndzə, e ndzə̀n Shimey, e yùyrí. Á bèy, sáʼ Fòn Solomone nèn tùúy.