1 Afòn 17 - ŊWÀʼ NYÙYElija tiír wuú 1 *Ŋgaà ntum Nyùy woo Elija nèn lò wìy, e yèn Fòn Ahav. Elija‑aà dzə̀ wír woó Tishbe, a dzə̀ ntèʼ é Gilead. Wù suúy e Fòn Ahav jii, «Mo Nyùy Tàr woo Nyùy wìr veé Isray dzəə̀n shó, wun woo Nyùy wo m lo ntum sə́, bó wuú kìn ŋweʼe yòʼ wíy tum e nsay, a bó m suúy.» 2 Nyùy Tàr yiì lò, e sùúy e Elija woo ŋgaà ntum və jii, 3 «Lò fo à dzəə̀n, e dù, e làáy e ghaa wàn ndzə̀v woo Kerit wo wù dzəə̀n é mbìv Jordan yee fo shùy yii tó. 4 À yíi a no mendzə́v fó wàn ndzə̀v fey. M yòŋ ne e viŋaʼ vi ji ví yíi a yiír a wò fo.» 5 Elija ku nèn yiì mo Nyùy Tàr kì yòŋèn, e dù, a dzə e ghaa wàn ndzə̀v woo Kerit wo wù dzəə̀n é mbìv Jordan yee fo shùy yii tó. 6 Wù nèn a no mendzə́v fó wàn ndzə̀v fey, a viŋaʼ vi wiy e kibán ki wùn à nyàm vijàvndzə vidzə̀m, wiy sho aŋkuùr adzə̀m. Elija wùn wiiy ŋkfə woó Tsarefat 7 Shintàm shi lòo dàr, wàn ndzə̀v və̀y yúm, bìʼ fo wuú yòʼ‑oò dzəə lò shèm é nsay. 8 Nyùy Tàr nèn sùúy e Elija jii, 9 «Ŋáʼáy, e dù e Tsarefat e Sidon, a dzə fo. M yòŋ ne e wiíy ŋkfə wùmòʼ wo wù dzəə̀n fó ji wù wáa leéy a fo wò.» 10 Á bèy, wù nèn ŋàʼáy, a dù e Tsarefat. Wù meé é shùu kày yeé ŋkàlaʼ, e yèn wiíy ŋkfə və̀y, a wù táyri meŋkaʼ. Wù suúy shó jii, «Wáy mendzə́v mè e kifa, e wìy sho, é m nó.» 11 Wiiy ŋkfə və̀y lòo dù ji wun du, e wìy e mendzə́v mè, Elija jáŋ, e sùúy sho jii, «Á wìy sa e kibán ki.» 12 Wù bìnèr jii, «Mo Nyùy Tàr woo Nyùy wò dzəə̀n shó, m yoʼ fèr kifá gheéy. Kù jòʼsì sí shiŋkfə̀ŋ ye yí dzəə̀n é mbìʼ wùn à shiŋgvə́r she shí dzəə̀n é kiŋgà shí. M táyri meŋkaʼ bèn ji m du, e fèr a kifá ke yi sho, é vèr wàn wom yí, e bó a kpu.» 13 Elija suúy shó jii, «Lá à yòʼ a fàn, dùu, e yiì mo à yòŋèn. Yii bèy, tòmbìy tòvtí shibanèn shi, e wìy sho, e fò e mò, bó a tàʼ ké vèn wan wò. 14 Nyùy Tàr woo Nyùy wìr veé Isray yòŋ jii, ‹Bó meŋkfəŋ mè yòʼ wíy mày fo mbìʼ, a bó meŋgvə́r mè yòʼ wíy mày fo kiŋgà, e wìy dù meé mo mómò woo Nyùy Tàr wíy yiì, é wuú ló.› » 15 Wiíy ŋkfə və̀y nèn dù, e yiì mo Elija kì suuyin e wun. Á bèy, viyíkìr vi nèn a dzə vishiíy vidzə̀m ve wiíy və̀y wùn à kfə́ə rəə́, à Elija wáa yi. 16 A bó meŋkfəŋ mè yòʼ‑oò lo ghàn sìíy bùŋ fó mbìʼ, a bó meŋgvə́r mè yòʼ‑oò lo ghàn sìíy bùŋ fó kiŋgà. 17 Ghán sí lòo koʼtí, wàn wiíy ŋkfə və̀y nèn gbù yàsí. Yàsí nèn lò, e tàvkír tavkín, kiyoy ke wan kí nèn mày. 18 Wù nèn sùúy e Elija jii, «Wìr Nyùy, à yiì kin e mò ben bìʼ ka? Wò‑oo wiy fen ji à kuúmé vinyo vém ve bi ví e Nyùy, e kfə̀n yiì, é wan wom kpú a?» 19 Elija suúy ji wù fó á wán e wun. Wù wìy sho, Elija sə́ fó koy wo, e kòʼ shó e lav yee fó yuv fo wù‑uù shiiyì, e neèr e wun kikun, 20 e nèn a toŋ kitávín e Nyùy Tàr jii, «Éè Nyùy Tàr woo Nyùy wom, à màʼ ŋgeʼ ye tavín e wiiy ŋkfə və̀n bèn bìʼ ka? Wù‑uu leey fo mò kijuŋ, à yií, wan və kpú à?» 21 Elija nèn nàsì wún e wǎn kitu akàŋ ataár, e bùnrì Nyùy Tàr jii, «Éè Nyùy Tàr woo Nyùy wom, ku siìr kiyoy ke wan və̀n ki é bàm.» 22 Nyùy Tàr nèn yù bunrì Elija, e yiì kiyoy ke wan kí kfə́n é bàm, wù kóʼór. 23 Elija nèn lì wán fó lav yee fó yuv, e sə̀y shó, e nə̀ə́ sho e lav, e fò e yè wov, e sùúy sho jii, «Wan wò və̀ne, leéy, wù sì e tin.» 24 Wiíy və̀y suúy e Elija jii, «M kìíy ne lèn ji à dzə̀ wir Nyùy, a jì ye yì fəə́ fo wò shuù dzə̀ rú jí Nyùy.» |
© 2022 CABTAL