1 Afòn 16 - ŊWÀʼ NYÙY

¹ Nyùy Tàr nen lò, e tùm Jehu woo wan Hanani fo Baasha wùn, wù dù, e yòŋ ji Nyùy suuy a jii,

² «À yòʼ‑oò dzə̀ kifá fo mbìy, yii bèy, m kóʼór wò ji kilìmbìy ke wìr vém veé Isray. À nén a yiì vinyo ve bi ví moo Fòn Jeroboam, e kfə̀n dòmsì wír vém veé Isray, á wáa yiì vinyo ve bi ví. Vinyo vév ve bi ví ŋàʼár ne dòʼshwíiy wom.

³ Á bèy, m yíi laàr kfə́ə yé mo mò‑oò laàrìn kfə́ə Fòn Jeroboam woo wan Nebat.

⁴ Wìr woo wò kfəə wíy kpu e mvə̀mlaʼ, é jwí si kfə́r dzə́n rə́, wù kpú e kwaʼ, é menə́n mè wáa sàʼ dzə́n rə́.»

⁵ Ké vinyò vímóʼ ví vee Fòn Baasha mvə̀m saʼ, à vinyo ve wù‑uù yiìn ví, à mo vitaáví və́ ví‑iì dzəə̀n, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

⁶ Fòn Baasha‑aà lày, á lìtì wun e Tirsa, wan və woo Ela nèn yì vifon, a saʼ e wun ntaʼ.

⁷ Á kinyo ke kí‑iì yiìn, é bo Nyùy Tàr túm *ŋgaà ntum və Jehu woo wan Hanani, wù dú, e tiìsí kinyo kfə́ e Fòn Baasha wùn à kfə́ə rəə́. Kí‑iì dzə̀ ji wù buʼtì a vinyo vinín e Nyùy Tǎr si. Yòʼ kù‑uù jòʼsì cáʼ vinyo və́ ve bi ví ve ví‑iì dzəə̀n moo vé Fòn Jeroboam ve ví‑iì ŋaʼarin dòʼshwiiy Nyùy. Dòʼshwiiy Nyùy‑iì ŋàʼáy sá bìʼ laar ye Fòn Baasha‑aà laàrìn kfə́ə Jeroboam e dzə̀m.

Fòn Ela woó Isray

⁸ Vé‑eè kòʼór Ela woo wan Baasha ji fon woó Isray, a Fòn Asa sí sáʼ Juda ji kiyá nshòv ntuùfú e mbaà. Ela wáa saʼ e Tirsa. Wù sáʼ viyá vibaà,

⁹ Simri nèn kèʼ, a woŋ wuú rə́. Simri‑iì dzə̀ mfòómé wo wù wám kintoʼnìn ke *vitentén vé rər. Wáa dzə e kishiíy kímóʼ kí, a Ela kuúŋe meluʼ e Arsa laʼ e Tirsa,

¹⁰ Simri tó fó ndzə, e gwàr, e yùyrí, e nèn yì vifon, a saʼ e wun ntaʼ. Kí‑iì kooy bèy, a sì kiyá kee ji nshòv saàmbà e mbaà mo Fòn Asa woó Juda‑aà kèʼèn a saʼ.

¹¹ Simri‑iì kèʼ, e lòo saʼ, e nèn laàr kfə́ə Baasha e dzə̀m. Wù‑uù laàr afə́r Baasha adzə̀m, e kfə̀n laàr sa ŋkar sə́ sidzə̀m.

¹² Wù yúyrí kfə́ə Baasha e dzə̀m, kù mo Nyùy Tàr‑iì yòŋèn ne e Baasha, e shaà fo ŋgaà ntum və Jehu.

¹³ Baasha wùn wan və Ela‑aà ŋàʼár dòʼshwiiy Nyùy Tàr woo Nyùy wìr veé Isray bìʼ anyùy kisaŋe ve vé‑eè ghvə́mé, kfə̀n domsì wír veé Isray, aá yii vinyo ve bi ví.

¹⁴ Ké vinyò vímóʼ ví vee Fòn Ela mvə̀m saʼ, à kinyo kidzə̀m ke wù‑uù yiìn kí, á sàŋ é Ŋwàʼ Vinyò ve Afòn veé Isray.

Fòn Simri woó Isray

¹⁵ Simri‑iì kèʼ sáʼ e Isray e kiya kee ji nshòv saàmbà e mbaà mo Fòn Asa‑aà kèʼèn, a saʼ Juda. Wù wáa saʼ Isray e Tirsa, e sàʼ, a dzə̀ vishiíy saàmbà. Wù‑uù kèʼ sáʼ, a vé rər veé Israyi dú ne, a kìʼ Gibbeton woo kirə́ʼ ké wìr veé Filistia e rə́r sí.

¹⁶ Áwune nèn lò, e yù ji Simri wòŋ ne a wuú fòn, e yùyrí. Kù é kishiíy fóo fèy, vé rər veé Isray adzə̀me nèn kù kòʼór kév a dzə̀ Omri woo mfòómé wov ji fon wo wù wáa saʼ Isray.

¹⁷ Omri wùn à wìr woó Isray e dzə̀m nèn lò fo Gibbeton, e kòʼ é Tirsa, e gìm fó e rə́r sí.

¹⁸ Mo Simri yenen ji á sí ton a ŋkàlaʼ Tirsa, wù nèn dù, e nə̀ə́ e kirə̀ʼ ke tavín kí é mvə̀m ntoʼ, e wày və́y shó, e shwì.

¹⁹ Kin ki‑iì kòóy bìʼ vinyo və́ ve bi ví ve wù‑uù yii, a ví bír Nyùy Tàr. Wù‑uù jùmrì liì a dzə̀ wo Jeroboam, e ghàr kinyo ke bi ke Jeroboam‑eè yii, domsì wír veé Isray, aá yii sa.

²⁰ Ké vinyò vímóʼ ví vee Fòn Simri mvə̀m saʼ, à wóŋ ye wù‑uù wóŋ wuú fòne, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

Fòn Omri woó Isray

²¹ Wír veé Israyi nèn lò, e jàvsìn, a dzə mbìv sibaà. Mbìv yìmòʼ wáa tàʼ ji á kóʼór á Tibni woo wan Ginat ji fon, a mbìv yìmòʼ bínsi a dzə̀ Omri.

²² Wír ve vé‑eè tóm Omrìi nèn ghàʼ ve vé‑eè tóm Tibni woo wan Ginat. Á nèn yùyrí Tibni, e bìysí Omri ji fon.

²³ Wù nèn kèʼ a saʼ wír veé Isray, a sì ji kiyá nshòv mòʼón e mtaár mo Fòn Asa‑aà kèʼèn, a saʼ Juda. Omri‑iì sàʼ Isray kiyá nshòv sibaà e ghvə̀m. Wù‑uù sàʼ viyá vee ntuùfú fó mvə̀m viya fèn, a wù dzə́ e Tirsa,

²⁴ e nèn yùn gwan woó Samaria, e bàʼrì láʼ fo, e bòm kay, e kaàrí sho. Wù‑uù yùn gwan və̀n fo Shemer e *kisha ke mbàm ke fəvír kí akilu msaàmbà, e nèn shù yír laʼ ji Samaria wo dzəə̀n meŋkfə́m me wìr wo wù‑uù kér fó.

²⁵ Omri‑iì yii vinyo ve ví wáa bir Nyùy Tàr, a ví shaá vé afòn ve vé‑eè saʼan ne fo wun mbìy.

²⁶ Wù kù‑uù yii vinyo ve bi ví moo Jeroboam woo wan Nebat, domsì wír veé Isray, aá cu anyùy kisaŋe, e nèn ŋàʼár dòʼshwiiy Nyùy Tàr, Nyùy wìr veé Isray, bìʼ vinyo ve bi ví ve áwune‑eè yii.

²⁷ Ké vinyò vímóʼ ví vee Fòn Omri mvə̀m saʼ, à vitaáví və́ ve wù‑uù din vi, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

²⁸ Fòn Omri‑iì lày, á lìtì wun e Samaria, Ahav woo wán və nèn yì vifon, a saʼ e wun ntaʼ.

Fòn Ahav woó Isray

²⁹ Vé‑eè kòʼór Ahav woo wan Omri ji fon woó Isray, a Fòn Asa woó Juda sí saʼ ji kiyá nshòv waamé e mtaár. Ahav wáa dzə e Samaria, bó a saʼ Isray, e sàʼ kiyá nshòv sibaà e mbaà.

³⁰ Ahav‑iì yii vinyo ve vi wáa bir Nyùy Tàr, e shaà afon adzə̀m ve vé‑eè saʼan ne e wun mbìy.

³¹ Bó yòʼ kù jòʼsì vinyo ve bi ví ve wù‑uù yii moo Jeroboam woo wan Nebat. Wù kfə̀n‑eè wày Jesebel woo wan Fòn Etbaal woó Sidon e lav ji wiiy ntoʼ, e nèn kèʼ a cù nyùy woo *Baal.

³² Wù nèn lò, e bòm lav Baal e Samaria, e bòm kíy cù nyùy woo Baal e mvəm wó.

³³ Wù fér sá wúr nyùy woo *Ashera, e tùúy, e kfə̀n a yiì vinyo ve bi ví vinín vée ŋaʼár dòʼshwiiy Nyùy Tàr woo Nyùy wìr veé Isray sho, e shaà afon veé Isray ve vé‑eè saʼan ne e wun mbìy.

³⁴ Yì‑iì dzə̀ é ghan se wù‑uù sáʼa, Hiel woó Betel báʼrí Jeriko. Hiel‑iì wày kinsə̀ŋ, e lày wán və mbìy woo Abiram. Wù bóm kay, e lòo wayrí shuu si, e lày wán və bàm woo Seguv. A vinyo vìn vi‑iì kòóy a dzə mo Nyùy Tàr‑iì yiìn ne sùúy, e shaà fo Joshua woo wan Nun.