1 Afòn 15 - ŊWÀʼ NYÙY

Fòn Abijam woó Juda

¹ Vé‑eè kòʼór Abijam ji fon woó Juda, a dzə̀ kiyá ke Fòn Jeroboam woo wan Nebat‑iì sí sáʼ e Isray ji kiyá nshòv waamé e ghvə̀m.

² Abijam‑eè sàʼ vifon viyá vitaár, a wù dzə́ e Jerusalem. Yír yè woví‑iì dzə̀ Maaka woo wan Abishalom.

³ Abijam‑eè bùʼtì vinyo réŋréŋ mo tàr wov‑iì bùʼtìn fó mbìy. Bó shilív sə́ shí yòʼ‑oò ló a tiy e Nyùy Tàr woo Nyùy və́ wùn shidzə̀m mo shé tàr wov Davir shi‑iì tíyí.

⁴ Yii bèy, bìʼ Davir, Nyùy Tàr woo Nyùy və‑əə̀ lo lèm sáʼ e rám rəə́. Wù‑uù shòʼ wán və Abijam ji wù wáa saʼ a e Jerusalem, e kfə̀n yiì, Jerusalem wáa tiy kitávín.

⁵ Nyùy‑iì yiì bey, bìʼ fo Davir‑iì yii vinyo ve ví wáa gheén Nyùy Tàr, e làa yòʼ a ten fó a yunín nsər sə́, e kèʼ mo wù‑uù dzə̀ʼə̀mèn, e wìy dù, e kpù. Kù mày kinyo ke wù‑uù jayin e Uria woo wír woó Hit.

⁶ A rə́r se Rehoboam wùn Jeroboam‑eè maʼ si kù‑uù maʼ màʼàn ghán sidzə̀m se Abijam‑eè sáʼ vifon.

⁷ Ké vinyò vímóʼ ví vee Fòn Abijam mvə̀m saʼ, à kinyo kidzə̀m ke wù‑uù yiìn kí, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

⁸ Fòn Abijam‑eè lày, á lìtì wun e Ŋkàlaʼ Davir. Asa woo wán və nèn yì vifon, a saʼ e tàr wóv ntaʼ.

Fòn Asa woó Juda

⁹ Vé‑eè kòʼór Asa ji fon woó Juda, a dzə̀ é kiya ke Fòn Jeroboam‑eè sáʼ e Isray ji kiyá mbaà.

¹⁰ Wù‑uù sàʼ vifon kiyá nshòv mòʼón e mkweè, a wù dzə́ e Jerusalem. Yìy à yè wov‑iì dzə̀ Maaka woo wan Abishalom.

¹¹ Fòn Asa‑aà yii vinyo ve ví wáa gheén Nyùy Tàr, kù réŋréŋ mo tàr wov Davir‑iì yii.

¹² Wù‑uù jùm vilum wùn à vikǐy kineŋe veé virə̀ʼ vé cù, e fə̀ə́r fo wòŋ, e kfə̀n shàʼàr mebvə̀m medzə̀m me afon ve vé‑eè dzəə̀n fó mbìyi‑iì fèrìn, e màʼày.

¹³ Wù tsə́ʼ sá Maaka woo yè wov fó ntaʼ yaà yeèfòn, bìʼ wúr nyùy woo *Ashera ye wù‑uù fèrìn, a dzə̀ kifá ke koʼoyín kí. Wù gwàtì wúr yee shooy, e tòn e kiwoóy ké Kidron.

¹⁴ Fòn Asa yiì vinyo vìn, a bó wù yoʼ kètì virə́ʼ fo vé‑eè cu anyùy kisaŋe. Yii bèy, shilív sə́ shí kú a tiy shidzə̀m e Nyùy Tǎr wùn ghán sidzə̀m, e dù meé mo sáʼ rəə́‑əə̀ duùn, e jòʼsì.

¹⁵ Wù‑uù lì vifá ve tàr wov‑iì shavin ji vé Nyùy vee jeéy ví, e dù, e wày e Nyùy Tǎr lav cù, e kfə̀n wày sá ve wúnwun kitú kfə́‑əə̀ shavin, a dzə̀ *kisha ke mbàm ke fəvír kí wùn à ke baar kí, à vifá ve ker vímóʼ ví.

¹⁶ Fòn Asa‑aà ló a màʼ rə́r wùn Fòn Baasha woó Isray ghán sidzə̀m, aá kù maʼ bèy, e dù meé mo sáʼ yéví‑iì duùn, e jòʼsì.

¹⁷ Fòn Baasha woó Isray‑iì kòʼ, e nə̀ə́ rə́r é Juda, e nèn kèʼ, a bàʼrì kiláʼáy ké rər é Rama ji wun sə́tí á dzə́ə fo wìr nəə́ é Juda, e yèn Fòn Asa, e kfə̀n sə̀tí fo wìr fəə́ fó Juda.

¹⁸ Fòn Asa nèn lì kisha ke mbàm ke fəvír kí wùn à ke baar ke kí‑iì berin e Nyùy Tǎr lav cù, à ke kí‑iì berin é ntoʼ ki, e tùm atǎr ntoʼ və́ shó ji á du, e fò e Ben‑Hadad woo fon woó Siiria. Ben‑Hadad‑iì dzə̀ wan Tabrimmon woo wan Hesion, a wù‑uù dzə́ e Damaskus. Wù lòo tum bèy, e tiìsí jii,

¹⁹ «Wùn wun koó á viŋkar, a dzə kintatì mo atàr véví‑iì dzə́. Á bèy, wun nén a tsənsí a fómo və̀n e wun, a dzə̀ á kisha ke mbàm ke fəvír kí wùn à ke baar kí. Wù ku dù, e bvə̀ə́r a viŋkar ve wùn Fòn Baasha woó Isray, é wù fiʼ fəə̀ á fo wun nsay.»

²⁰ Fòn Ben‑Hadad dù, e biìmé nshù Fòn Asa, e kù nèn tsə̀nsí amfòómé və́ wùn à vé rərí, á dù, e nə̀ə́ rə́r é ŋkà se laʼ seé Isray, e tòn Ijon wùn à Dan, à Abel‑Bet‑Maaka, à ŋguùŋè kibàŋ keé Galeli, à nsay Navtali e dzə̀m.

²¹ Fòn Baasha yú kinyo kìn, e nèn yàr fó a bàʼrì kiláʼáy é Rama, e nèn lò fo fo, e dù, a dzə e Tirsa.

²² Fòn Asa nèn fò sáʼ, yí ghánén Juda e dzə̀m, la kirə́ʼ kí yòʼ bèr. Á béʼéy tíy wùn à vicí ve toʼón ví fó Rama ve Fòn Baasha‑aà yii kibaʼrì sho. Fòn Asa nèn lì vifá vìn, e dù, e yiì kibaʼrì sho e Geba wo wù dzəə̀n é nsay Benjamin, e kfə̀n yiì sa kímóʼ kí é Mispa.

²³ Ké vinyò vímóʼ ví vee Fòn Asa mvə̀m saʼ, à mo vitaáví və́ ví‑iì dzəə̀n, à vinyo vidzə̀m ve wù‑uù yiìn ví, à ŋkà se laʼ se wù‑uù bomen sí, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda. Wù‑uù dzə̀n, wuú rəə́ nèn a yar.

²⁴ Fòn Asa‑aà lày, á litì wun aàtàr vəə́ ghaŋ e Ŋkàlaʼ Davir woo tàr wov. Jehoshafat woo wán və nèn yì vifon, a saʼ e tàr wóv ntaʼ.

Fòn Nadav woó Isray

²⁵ Yì‑iì dzə̀, a Fòn Asa sí sáʼ Juda ji viyá vibaà, á kóʼór Nadav woo wan Jeroboam ji fon woó Isray. Wù‑uù sàʼ viyá vibaà.

²⁶ Wù kù‑uù yii sa vinyo ve ví wáa bir Nyùy Tàr mo tàr wov‑iì yii, domsì wír veé Isray, aá yii sa.

²⁷ Baasha woo wan Ahija woó kfəə Issakar‑iì shèm e Fòn Nadav bàm, e yùyrí wun e Gibbeton wo dzəə̀n ŋkàlaʼ e nsay Filistia, a Nadav wùn à wír veé Israyi kì dù ne, e gìm fó ji á ton.

²⁸ Baasha‑aà yùyrí wun, a Fòn Asa woó Juda sí sáʼ ji viyá vitaár. Wù yúyrí bey, e nèn yì vifon, a saʼ e wun ntaʼ.

²⁹ Kù mo wù kèʼèn a saʼ vifon, e nèn yùyrí rám Fòn Jeroboam e dzə̀m. Wù yòʼ‑oò lo màʼtì wir mòʼón fo e tin, kù réŋréŋ mo Nyùy Tàr‑iì yòŋèn e ŋgaà və lìm woo Ahija woó Shilo.

³⁰ Kí‑iì kòóy ben bìʼ fo Fòn Jeroboam‑eè ŋaʼarin dòʼshwiiy Nyùy Tàr woo Nyùy wìr veé Isray e vinyò ve bi ví ve wù‑uù buʼtì, kfə̀n domsì sa wír veé Isray, aá yii.

³¹ Ké vinyò vímóʼ ví vee Fòn Nadav mvə̀m saʼ, à kinyo kidzə̀m ke wù‑uù yiìn kí, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

³² A Fòn Asa wùn Fòn Baasha woó Isray kù‑uù rə́si maʼ a dzə̀ rə́r ghán sidzə̀m, e dù meé mo sáʼ yéví‑iì duùn, e jòʼsì.

Fòn Baasha woó Isray

³³ Vé‑eè kòʼór Baasha woo wan Ahija ji fon wo wù wáa saʼ woŋ Isray e dzə̀m, a Fòn Asa sí sáʼ e Juda ji viyá vitaár. A Baasha sáʼ a dzə̀ Tirsa, e sàʼ vifon kiyá nshòv sikweè e mbaà.

³⁴ Wù kù‑uù yii sa vinyo ve ví wáa bir Nyùy Tàr mo Jeroboam‑eè yii, domsì wír veé Isray, aá yii sa.