1 Afòn 14 - ŊWÀʼ NYÙY

Kpú wan Jeroboam

¹ Wáa dzə e ghan sin, Abija woo wan Fòn Jeroboam nèn gbù yàsí.

² Fòn Jeroboam suúy e wiiy ntoʼ jii, «Dù, e kùv wúné, e làa yòʼ dzə́ə a shwinín wiiy ntoʼ, e nèn dù e Shilo, e yèn Ahija woo *ŋgaà ntum Nyùy wo wù‑uù suuyin ji m wíy a dzə a fon wó a saʼ wír vìn.

³ Lì ntuʼ se kiban si e ghvə̀m wùn à vifá ve kaŋén ví, à kikàr ke vilù ki, e dù, e yèn wun sho, é wù suúy e wò kinyo ke kí yíi koóy wán.»

⁴ Wiiy ntoʼ ku nèn yiì mo fòn kì suuyin, e dù fo Ahija wùn e wun laʼ e Shilo, a Ahija yòʼ dzəə́ yén virə́ʼ, bìʼ fo wù‑uù dzə̀nèn ne, sí rəə́ wáa səəné.

⁵ Yii bèy, a Nyùy Tàr kì sùúy ne e Ahija jii, «Wiiy ntoʼ lo, e wìy, e dzər e wò kinyo kee kùm wán və, bìʼ fo wù joyì. Wù dzə́rí, áà nèn sùúy e wun kinyo ke m lo, e yòŋ e wò. Wù yíi wìy, a dìn ji yòʼ dzə̀ á wun.»

⁶ Á bèy, Ahija yiì yù nsən sə́ se wuù é shùu lav, e nèn yòŋ jii, «Wiiy ntoʼ, á nəə́ e lav. Shií wo à wáa lìtì kitú ké yòʼ dzə̀, bìʼ fo á tumen mo fo wò wùn e sáʼka wo bi.

⁷ Dù ri, e sùúy e Fòn Jeroboam jii, Nyùy Tàr woo Nyùy wìr veé Isray suuy a jii, ‹Mò‑oò shàv wò fo wírí mvəm, e lèm wò ji kilìmbìy ke wìr vém veé Isray.

⁸ Mò‑oò fàr sáʼ fo Davir kfəə, e fò e wò ji à wáa saʼ a mbìv yìmòʼ. Yii bèy, la à yòʼ a dzə moo ŋgaà lìm wom woo Davir wo wù‑uù yúnin nsər sém, jumrì mo wùn à shilív sə́ shí shidzə̀m, kfə̀n yii kinyo ke kí gheen mo.

⁹ À buʼtì ké a dzə̀ vinyo e shaà afon ve vé‑eè saʼan ne fo wò mbìy. À fèr ne anyùy kisaŋe wùn à mebvə̀m mee kisha ki, e lì mo, e màʼày fo bàm, e yiì, kilòŋ kém kí wáa shwiíy.

¹⁰ Bìʼ bey, m yíi màʼ ŋgeʼ e wò kfəə. M yíi yuyrí wan bàm woo lumèn e dzə̀m fo wò kfəə, kìn dzə̀ wan kwàn, kìn dzə̀ wan nsay. M yíi tòn kfə́ə yé, wò woo Jeroboam mo wìr tòn jáŋ nàʼ yí shwí, e bò.

¹¹ Jwí si wíy a kfər wir kfəə yé e dzə̀m wo wù wíy kpu e ŋkàlaʼ, é vilùŋŋgùrúʼ ví wáa kfər wo wù kpuun é kwaʼ.› Á mo Nyùy Tàr waà suuyì.»

¹² Ahija yòŋ bèy, e nèn sùúy e wiiy ntoʼ jii, «Fo ké ki, á kfən e bàm e wò laʼ. À yíi laʼ kiwuú é ŋkàlaʼ, é wàn nèn kpù.

¹³ Wír veé Israyi yíi dzəə̀mè wun, e dìy kpú rə́, bìʼ fo kù jòʼsìn wun e Jeroboam kfəə, wo Nyùy Tàr woo Nyùy wìr veé Isray yenen, a wù yii vinyo ve ví wáa gheén wun.

¹⁴ «Nyùy Tàr wíy koʼór fon woo ji kòʼór a wun. Wù wíy á saʼ wír veé Isray, e laàr kfə́ə Jeroboam, é sáʼ rəə́ sə́ʼsí.

¹⁵ Nyùy Tàr wíy màʼ ŋgeʼ e Isray, é wù wáa dzə moo ŋkiʼ wo wù yaʼ e ndzəv. Wù wíy tsə̀ʼ Isray fo nsay ye juŋ ye wù‑uù foon áàtǎr atàr véví rə̀n, e taʼár, aá du, e shaà ndzə́v yee Yufret. Kí kù wíy a dzə bèy, bìʼ fo áwune‑eè fèrìn wúr sé nyùy woo *Ashera, a ghvəm, e nèn ŋàʼár dòʼshwiiy Nyùy Tàr.

¹⁶ Wù kù wíy màʼày Isray máʼayin bìʼ vinyo ve bi ve Jeroboam yii, domsì wír veé Isray, aá jáy sa.»

¹⁷ Wiiy ntoʼ Fòn Jeroboam nèn nànèn, a dù e Tirsa. Kù mo wù meen, a yaʼáy kikur ke shùu lav, wàn nèn kpù.

¹⁸ Wír veé Israyi dzəə̀mè wun, e dìy kpú rə. Kí ku kòóy réŋréŋ mo Nyùy Tàr kì tumen ŋgaà ntum və woo Ahija, wù tiísí.

Kpú Jeroboam

¹⁹ Ké vinyò vímóʼ ví vee Fòn Jeroboam mvə̀m saʼ, moo rə́r se wù‑uù màʼàn, à sáʼ ye wù‑uù sáʼáa, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

²⁰ Fòn Jeroboam‑eè sàʼ kiyá nshòv sibaà e mbaà, e nèn lày, á lìtì wun. Wan və woo Nadav nèn yì vifon, a saʼ e tàr wóv ntaʼ.

Á kóʼór Rehoboam ji fon woó Juda

²¹ Ké Rehoboam woo wan Solomon wo wù‑uù sáʼ vifon e Juda ki dzə̀ jii, wù‑uù kèʼ sáʼ, a wù sì kiyá nshòv mòʼón e mkweè. Wù‑uù sàʼ kiyá nshòv saàmbà e ghvə̀m, a wù sáʼ a dzə̀ é Jerusalem wo dzəə̀n ŋkàlaʼ ye Nyùy Tàr‑iì shoʼon ji rə́ə fó mvə̀m ràm seé Isray sidzə̀m. A yír yìy à Rehoboame dzə̀ Naama, a dzə̀ wan wìr Ammon.

²² Wír veé Judàa‑aà dzə̀, a vé‑eè yii vinyo ve ví wáa bir Nyùy Tàr é ŋàŋ, e nèn ŋàʼár dòʼshwiiy Nyùy Tàr, e shaà mo atàr véví‑iì ŋáʼarì.

²³ Áwune‑eè bàʼrì virə́ʼ vév vé cù, e tùúy sə́y se anyùy, e fèr wúr sé nyùy woo Ashera, e tìír aàgwan ve darkìné adzə̀m, e kfə̀n tìír e sar se vici ve rəŋsìn ví.

²⁴ A bó yòʼ jòʼsì kee shooy. Yì‑iì dzə̀ é virə̀ʼ vé cù vìn, a vilum wùn à vikìy vee vé kineŋe dzə̀ fó, néŋ kineŋ wùn à wír ve á wiy foo. Wír veé Judàa ku nèn a yiì joonè e dzə̀m wo vitúm ve Nyùy Tàr‑iì jùmèn fó nsay foo fèy vi‑iì yii.

²⁵ Fòn Rehoboam‑eè sàʼ, kí meé viyá vitàn, Fòn Shishak woó Ejiv nəə́ Jerusalem e rə́r sí,

²⁶ e kùúy káv woo Nyùy Tǎr lav cù wùn à woó ntoʼo. Wù‑uù lì kifá kidzə̀m, e dù sho, e lì sa aŋkèe rər ve Fòn Solomon‑eè fèrìn e *kisha ke mbàm ke baar kí.

²⁷ Fòn Rehoboam nèn sìíy, e fèr lèn a dzə̀ aŋkeè vee kisha kee *brons ki, á lì kirə́ʼ ké viy. Wù lì vee shooy, e fò e vilìmbìy ve nsheèlav se sí‑iì shiy shúu kibùʼ woó ntoʼ.

²⁸ Fòn‑eè lóo dù e Nyùy Tǎr lav, anshìyi kù bèʼèy, a tsəə̀né wun sho. Du bèy, á kfə̀n shó e bàm, e nèn siìr e kitàv ké anshìy.

²⁹ Ké vinyò vímóʼ ví vee Fòn Rehoboam mvə̀m saʼ, à kinyo kidzə̀m ke wù‑uù yiìn kí, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

³⁰ A Fòn Rehoboam wùn Fòn Jeroboam‑eè dzə̀, aá maʼ rə́r là meemè.

³¹ Fòn Rehoboam wìy lày, á lìtì wun aàtàr vəə́ ghaŋ e Ŋkàlaʼ Davir. Yè wov‑iì dzə̀ Naama woo wan wìr Ammon. Abijam woo wán və nèn yì vifon, a saʼ e tàr wóv ntaʼ.