1 Afòn 1 - ŊWÀʼ NYÙY

Fòn Davir dzə́n, e kòŋrí

¹ Fòn Davir wìy dzə̀n, e kòŋrí, nsheèlav sə́ sí wáa kfəvsí wun e bvə̀ràŋgí, a wù yòʼ fə̀m yú lum.

² Nsheèlav si nèn lò, e bùn wun, e sùúy sho jii, «Nyàr, vèr‑íì taʼ á wánlè ŋgòn wo wù wáa ker fon, a leéy a fo wun, e kfə̀n a neèm, a koytí a wun, é wún fòne wàá wáa lùm.»

³ Á bèy, á nèn a tàʼ woŋ Isray e dzə̀m ji á koóy á wánlè ŋgòn wo juŋ. Á yén Abishag woó Shunem, e nèn lì, e wìy sho, e fò e fòn.

⁴ Wánlè ŋgòn və̀n‑eè bòŋ é ŋàŋ. Wù nèn a ker fon, a leéy fo fo. Yii bèy, la fòn yòʼ a lì.

Adonija táŋ vifon

⁵ Adonija woo wan ntoʼ wo yè wov‑iì dzəə̀n Haggit nèn lò, a koʼór kitú kfə́, a suúy jii, «M yíi a dzə fon.» Á bèy, wù nèn bàʼtí *viténtén vé rər, à vé koʼo, à wíri mtàn ve á wáa nyeŋ e wun mbìy.

⁶ Adonija wáa dzə, a bó tàr wov yòʼ‑oò lo ghàn sìíy a sə̀r wun fo vinyò ve wù‑uù yii ji wù sà yii bèn bìʼ ka á? Wù kfə̀n‑eè kér mbom ye juŋ feyì, a vé‑eè dzə̀ə́ wun e Absalom bàm.

⁷ Adonija nèn wìy dù, e yèn Joav woo wan Tsəruyia, e sùŋnín sho, e kfə̀n sùŋnín e taà cù woo Abiyatar, áwune nèn biìmé ji á lo, e tom a wun.

⁸ Yii bèy, bó Tsadok woo taà cù wùn à Benaya woo wan Jehoyiada, à Natan woo *ŋgaà ntum Nyùy, à Shimey, à Rey, à wír Davir ve tavkíné yòʼ‑oò lo tòm Adonija.

⁹ Wáa dzə e kishiíy kímóʼ kí, Adonija cù Nyùy aànjìi wùn aànàʼa, à vinsòŋ ve anàʼ vi é kirə̀ʼ ke á yoŋ ji Tíy Yò, e ghaa ntoò ndzə̀v yeé En‑Rogel. Wù‑uù bì afə́r və́ adzə̀m ve dzəə̀n wón ntoʼ wùn à wír veé Judàa adzə̀m ve yì‑iì dzəə̀n atǎr ntoʼ.

¹⁰ A wù yòʼ‑oò lo bì Natan woo ŋgaà ntum Nyùy, kìn Benaya, kìn wír fòn ve tavkíné, kìn fə́r və Solomon.

¹¹ Natan nèn dù, e bì Batsheba woo yìy à Solomon jii, «À kì ji Adonija woo wan Haggit kòʼór ne kitú kfə́ ji fon, a bó taàtá wòsən woo fon yòʼ kì á?

¹² Yuúrí, mo‑óò tír wò mo dzə̀ à sə̀ kitú ké, e kfə̀n sə̀ sá ké wan wò Solomon.

¹³ Dù lèn və̀n, e bùn Fòn Davir, e dzə̀r shó ji bó taàtá wò woo fon yòʼ sà‑aà kàʼ wò woo wánlè və, e lìʼ ji Solomon woo wan wò wíy yi vifon a, a kù wíy dzə̀ʼə̀m wun e wun kàvàʼ a? Adonija sà ghàn kfə́ é le lèn, bó a dzə ji fon a?

¹⁴ À du, lóo suŋnín e fòn bèn, é m nèn nə̀ə́, a tomrí kinyo ke à suuyì.»

¹⁵ Batsheba nèn dù e ntoʼ, e nə̀ə́ e faáy kishiíyí, a Abishag woó Shunem leey fo fòn, bìʼ fo wù‑uù dzə̀nèn ne e ŋàŋ.

¹⁶ Batsheba kóʼtí fó mbìy, e gvə̀ʼə́r kitú, e làʼ fo nsay e fòn si. Fòn dzə́r jii, «À taʼ ji m yée le e wò?»

¹⁷ Wù suúy jii, «Nyàr, fòn‑eè lìʼ á vèr wun, mo woo wánlè və e Nyùy Tàr woo Nyùy fòn yir ji Solomon woo wán wom wíy yi a vifon e ghan se fòn làyìn á ne.

¹⁸ Adonija kòʼór a ne kitú kfə́ lèn ji fon, a bó taàtá wom woo fon yòʼ waà kì.

¹⁹ Wù yiì a ne cu aànàʼa wùn a vinsòŋ ve nyàm vi, aànjìi agháʼán, a wù bì á ne wón ntoʼ adzə̀m, e bì Abiyatar woo taà cù, e bì sá Joav woo mfòómé. A wù yoʼ bì á Solomon wo wù yú kfə́ a dzə̀ fo fòn.

²⁰ Wìr dzə̀m woó Isray shòvtí ne a sí, a leéy a taàtá wom woo fon ji wù tóʼ á wír wo fòn wíy lày, é wù yí á vifon.

²¹ Nyàr, a kí bùŋ fó bèy, bo taàtá wom woo fon wíy lày, é vèr wan wom nèn a dzə a vé vibàné.»

²² Mo Batsheba kù súŋnin wùn fòn bèy, Natan woo *ŋgaà ntum Nyùy nèn wìy e ntoʼ.

²³ Á nèn bùn fon ji Natan woo ŋgaà ntum Nyùy waà sì. Wù ku nèn nə̀ə́, e làʼ kitú fo nsay e fòn si,

²⁴ e bùn fon, e dzə̀r jii, «Fòn sà‑aà lo sùúy ji wíy yi Adonija vifon a, a wíy dzə̀ʼə̀m wun e kàvàʼ e ghan se fòn làyìn ne a?

²⁵ M dzə́r a bèn, bìʼ fo wù sə̀y á ne lán, e yiì cu aànàʼa wùn a vinsòŋ ve nyàm vi, aànjìi agháʼán, a wù bí á wón ntoʼ adzə̀m, e bì amfòómé, kfə̀n bì Abiyatar woo taà cù. Áwune waà sí yíkir a lèn, nóninè, aá ndzə́ʼ a jii, ‹Nyùy fó Fòn Adonija dzəʼə̀m ye dáa.›

²⁶ A bó Adonija yoʼ bì á mo woo ŋgaà lìm fòn. Wù yoʼ bì sáa Tsadok woo taà cù, à Benaya woo wan Jehoyiada, à Solomon woo ŋgaà lìm fòn.

²⁷ Sà kù‑uù sìysì taàtá wom woo fon kinyo ke njìlaʼ və kin, e bóo lìtì fo aŋgàa lìm və́ə á?»

Fòn Davir kóʼór Solomon ji fon

²⁸ Fòn Davir nèn sùúy jii, «Vèn jaŋ Batsheba.» Á nèn tòóy, wù wìy, e tìím e fòn si.

²⁹ Fòn nèn yiì kilìʼ jii, «Mo Nyùy Tàr dzəə̀n shó e tin, a wù bòyìr ne mo fó ŋgeʼ sidzə̀m,

³⁰ bo m sí yii lán kinyo ke mò‑oò kàʼàn ne wò, e lìʼ e wun woo Nyùy Tàr woo Nyùy wìr veé Isray yir ji wíy yi a wan wom woo Solomon vifon. Kù wíy dzə̀ʼə̀m a wun e kàvàʼ, e yi ntaʼ wom.»

³¹ Batsheba nèn tsə̀m ndzəə́, e làʼ kitú fo nsay, e sùúy jii, «Nyùy Tàr fó taàtá wom woo fon dzəʼə̀m ye daadàa.»

³² Fòn Davir nèn tòóy Tsadok woo taà cù, à Natan woo *ŋgaà ntum Nyùy, à Benaya woo wan Jehoyiada. Á wìy,

³³ fòn suúy aáwune jii, «Vèn li atǎr ntoʼ vémé, e yòŋ é wan wom Solomon kóʼ kimbèʼbìy ké nyàmŋkoʼ kém, é vèn áwune sə́y é dàn woó Gihon,

³⁴ é Tsadok woo taà cù wùn Natan woo ŋgaà ntum Nyùy yóʼ wun fo ji fon woó Isray. Á maysì, aá nèn a toŋ sóŋ, a ndzəʼ jii, ‹Nyùy fó Fòn Solomon dzəʼə̀m ye dáa.›

³⁵ Vèn ndzə́ʼ bèy, á nèn tsəə̀né wun, e wìy sho fèn, é wù dzəʼəm e mǒ kàvàʼ, e yì vifon vém, bìʼ fo m shoʼon ne wun ji wù wáa saʼ a woŋ Isray wùn à woó Judàa.»

³⁶ Benaya woo wan Jehoyiada bínsí jii, «Kí kú a dzə bèy, é Nyùy Tàr woo Nyùy taàtá wom woo fon ku wày sá kiwó sho.

³⁷ Nyùy Tàr kú a dzə wùn Solomon mo wù‑uù dzəə̀n wùn taàtá wom woo fon. Wù ku yiì, é sáʼ Solomone tuúy, e shaà yé taàtá wom woo fon.»

³⁸ Tsadok woo taà cù wùn à Natan woo ŋgaà ntum Nyùy, à Benaya woo wan Jehoyiada, aànshìy fòne nèn kòʼór Solomon e Fòn Davir kimbèʼbìy ké nyàmŋkoʼ, e tsəə̀né wun, e sə̀y shó e Gihon.

³⁹ Tsadok nèn lì loŋ meŋgvə̀r me yoʼ me wù‑uù wìyìn shó fo kibàn ké Nyùy, e nèn yòʼ Solomon sho. Á nèn tòŋ sóŋ, wìr dzə̀m wáa ndzəʼ jii, «Nyùy fó Fòn Solomon dzəʼə̀m ye dáa.»

⁴⁰ Á ndzə́ʼ bey, e nèn a koʼ e wun bàm, aá tóŋ loŋ si, shéʼri, kfə̀n waáme kitávín, a nsay səʼə̀.

⁴¹ Adonija wùn à wìr dzə̀m wo wù‑uù dzəə̀n fó ŋkàʼ lò ji á maysì a ŋkàʼ, e nèn yù mo kiyor ki kóʼó, Joav yú ji á tóŋ a sóŋ, e dzə̀r jii, «Kiyor ke kí wiy fo mvə̀mlaʼ bèsə ki dzə̀ keé le?»

⁴² Kù mo wù dzə́r bèy, Jonatan woo wan Abiyatar woo taà cù nèn bvə̀y. Adonija nèn jàŋ jii, «Wìr jwáʼ woo moo wò bèn kù dzə̀ wù wàa wìy a dzə̀ e sáʼka wo juŋ.»

⁴³ Jonatan bìnèr jii, «Àáy, sáʼka wo wù dzəə̀n dzə̀ jii, tàr wòsən Fòn Davir kòʼór ne Solomon ji fon.

⁴⁴ Wù tsə̀nsí ne Tsadok woo taà cù wùn Natan woo ŋgaà ntum Nyùy, e kfə̀n tsə̀nsí sa Benaya woo wan Jehoyiada wùn à vé rər ve á shiy fone, á dú, e kòʼór wun e kimbèʼbìy ké nyàmŋkoʼ ke fòn.

⁴⁵ Tsadok woo taà cù wùn Natan woo ŋgaà ntum Nyùy yòʼ ne wun ji fon e Gihon. Áwune lò ne fo fo, a koʼ e mvə̀mlaʼ, a sheʼrí, fóo wáa bìŋrì bìŋrìn. Á fo kiyor ke à yú ki wiyì.

⁴⁶ Solomon sí dzə́ lèn e kàvàʼ.

⁴⁷ Aàtǎr ntoʼo kì dù ne, e beèrì tàr wòsən Fòn Davir, beerì bèy, suuy ji Nyùy fòn ku yiì a, é yír Solomone kúy, e shaà a yé tàr wov Fòn Davir, e kfə̀n yiì saa, é sáʼ rəə́ táv, e shaà yé tàr wov. Fòn kì yuùrí, e nèn gvə̀ʼə́r kitú, e dìn ghvə́m, a wù dzə́ e kikun,

⁴⁸ e sùúy jii, ‹Á wáa burí Nyùy Tàr woo Nyùy wìr veé Isray, wo wù yiìn, wan wom yí vifon lán, a m yén e sí yémé.› »

⁴⁹ Wír ve wùn à Adonija‑aà dzəə̀n fó ŋkàʼá nèn a fàn, a lòkìr amòʼón amòʼón, a wìr du dzə́ə rə, a wìr du rə́ə.

⁵⁰ Adonija nèn fàn Solomon, e lèʼ, e dù, e bàm loŋ se kiy cù.

⁵¹ Kí nèn tò e Solomon kitùʼùr ji Adonija fàn a ne wun, e dù, e bàm á loŋ se kiy cù, a ker, a suúy a jii, «Fòn Solomon ku lìʼ a ji wun yòʼ yíi yuyrí a ŋgaà və lìm.»

⁵² Fòn Solomon suúy jii, «A Adonija din ji wun sì á wír woo réŋ, bo bó ŋgay nəŋ yòʼ yíi tum fo wun kitu. Yii bèy, a wù kfə̀n bùʼ kímóʼ kee kinyo, bo wù kù kér fóo kpu.»

⁵³ Fòn Solomon nèn tsə̀nsí wíri, á dù, e lì Adonija fo kiy cù, e wìy sho. Wù wìy, e bùn Fòn Solomon, wù yóŋ shó jii, «Á dù rì e wò lav.»