Yuda 1 - Ulufingo Ulupya

Ukulamuka

¹ Ane ne Yuda umubombi uwa Yesu Kilisitu, sona nu mukamu uwa Yakobo. Inkubasimbila abantu babo bitiziwa nu Chala, babo baghaniwe nu Chala u Tata nukusungililiwa nu Yesu Kilisitu.

² U Chala abapelele ichisa nukubapa umutende nu lughano umwakwizula.

Nizya bamanyisi abamyasi

³ Mwee bamanyani bane abaghaniwa, inkalondagha nkani pakubasimbila nizya bupoki bubo twebosi tuli nabo. Loli ilelo nadumula ukuti imbasimbile koka bulo pakubalaba ukuti mulwe nkani inkondo pakulwimila ulwitiko lulo u Chala abapiye abantu bache.

⁴ Pakuti abantu bamo babo batakumunyila u Chala bakinjila pakasi papinyu umwakusita ukumanyikwa, abantu babo bakunyongannya ichisa icha Chala witu, ngati po chintu chimo chicho chikubapa ubusatuke ubwakubombela ivintu ivinyazu. Abantu banaba bakumukana u Yesu Kilisitu u Mwene witu Uwamaka mwene. Kale Amasimbo ghakalaghula nizya lufundo lulo bapokela.

⁵ Napapo muzimenye kale zinizi, nkulonda imbakumbuzye namumo u Mwene akabapokela abantu bache aba Izilayeli ukufuma mu Ijiputi. Loli pisinda pache akabanangannya abantu babo batakamusubilagha.

⁶ Mukumbukaye abantumi aba kumwanya babo batakikutisiwa nu bulaghili, loli bakabuleka ubuzilo bwabo bubo u Chala akabapa. Po bapinyiwe muchisi kusi kuchisu ni mpingu izya bwila na bwila mupaka pisiku lilyo u Chala akwiza pakubalonga abantu.

⁷ Mukumbuke sona u Sodomu nu Gomola, nu twaya utupalamani, tuto abantu bache bakalowa nukubomba ivintu ivibibi. Abantu banaba bakafundiwa nu moto uwa bwila na bwila pakuba chifwanikizyo ichakubasoka abantu bosi.

⁸ Umwakuyana bulo, bope abantu banaba bakughanyazya amabili ghabo pakukonka ivisetuka vyabo. Bakubusamula ubulaghili ubwa Chala nukubutuka ubuchindamu ubwa vipeliwa ivya kumwanya.

⁹ Nu Mikayeli bulo, usongo uwa bantumi aba kumwanya, atakabomba zinizi, bo akudalinkana nu Satana nizya muvimba uwa Mozesi. U Mikayeli atakajimba pakumulonga u Satana na mazyu aghantuko, loli akati, “U Mwene akuchemele.”

¹⁰ Loli abantu banaba bakutuka ni vintu vyosi vivyo batavimenye, ivintu vivyo bavimenye na mahala ghabo vivyo vikubanangannya.

¹¹ Ichighune chabawile pakuti bakonka izila iya Kayini. Pachifukwa icha ndalama, bakananga ukuyana na mumo akanangila u Balamu. Bakamusambukila u Chala ukuyana na mumo u Kola akamusambukilila, po bakwiza pakunangika ngati we yuyo.

¹² Abantu banaba bakunyazya ulusekelo lwinyu ulwa bupoka. Bakulya poka namwe umwakusita isoni, sona bapafu. Bayanite bulo na mabingu ghagho ghakuputiwa ni mpepo, loli ghatakwiza ni vula. Bayanite bulo na makwi ghagho ghatakwela ivikomwa napapo kabalilo kache, sona ghagho ghanyunkuliwe nukufwila zila.

¹³ Bayanite bulo na mayigha aghakoghofya agha panyanja ghagho ghakufumya itatafulu ilya mbibi zyabo. Bayanite bulo ni ntondwa zizyo zikwenda-kwenda bulo. U Chala abasungiye ubuzilo ubwa chisi ichakoghofya nkani icha bwila na bwila.

¹⁴ Akaba we Enoki uwa nkulilo iya seveni ukwandila pa Adamu, yuyo akalaghula nizya bantu banaba ukuti, “Ennya, u Mwene akwiza na bantumi aba kumwanya abasita kubelengiwa

¹⁵ pakubalonga abantu bosi. Akwiza pakudumula ukuti abantu bosi babo batakumwiputa u Chala banangite, pachifukwa icha mbombo zyabo, sona ni chifukwa icha mazyu aghantuko ghagho bamunenela.”

¹⁶ Abantu banaba bamilumbuzyo, sona bakubapakazya abanji inongwa. Bakukonka ivinyonywa vyabo ivibibi, na bamituvyo sona bakubapala abantu abanji, umwakuti bachaghe chicho bakulonda.

Ukubasoka abantu nukubalingannya

¹⁷ Loli bamanyani bane abaghaniwa, mukumbukaye zizyo abatumiwa aba Mwene witu u Yesu Kilisitu bakababuzya kale.

¹⁸ Bakababuzya bakati, “Mumasiku aghabumalilo, abantu abalobezyo bakwiza pakuboneka, babo bakukonka ivinyonywa vyabo ivibibi.”

¹⁹ Abantu banaba bakupela ukugabinkana, babo bakukonka bulo ivinyonywa ivya muchisu ichapasi, sona bate nu Muzimu Umuzelu.

²⁰ Loli bamanyani bane abaghaniwa, endelela pakuzengana mwebenebene palwalo ulwa lwitiko lwinyu ulupaghuliwa. Mwiputaye ukwendela mu maka agha Muzimu Umuzelu.

²¹ Mwikalaye mulughano ulwa Chala, bo mukulindilila u Mwene witu u Yesu Kilisitu ukuti abape ubumi ubwa bwila na bwila ukwendela mu chisa chache.

²² Mubapelelaye ichisa abantu babo bakwilamwa,

²³ loli mubapokaye abantu abanji pakubipula pamoto. Sona abantu abanji mubapelelaye ichisa, loli mubombaye nu bogha, sona mughabengaye na menda ghabo bulo, ghagho ghanyaziwe ni mbibi zyabo.

Amazyu aghalusayo

²⁴ U Chala amenye pakubasunga ukuti mutakawe, sona akubafisya pamaso pa buchindamu bwache, bo muhobokite sona na basita chilema nachimochimo.

²⁵ U Chala mwene we yuyo Mupoki witu ukwendela mwa Yesu Kilisitu u Mwene witu. Apokelaye ubuchindamu, nu bumwene, na maka, nu bulaghili ukwanda ilelo mupaka bwila na bwila! Ameni.