Yohani 6 - Ulufingo Ulupya

U Yesu akubalyesya abantu 5,000

¹ Pisinda pache u Yesu akaloboka Inyanja iya Galileya (pamo inyanja iya Tibeliya ukuyana na mumo yikwitiziliwa.)

² Ichilundilo ichikulu icha bantu chikamukonka pakuti bakennya ivimanyilo vivyo akabombagha pa babine.

³ U Yesu akakwela pighamba nukwikala pasi na bamanyili bache.

⁴ Akabalilo aka Lusekelo ulwa Pasa kakaba papipi.

⁵ Bo u Yesu atalankannya akennya ichilundilo ichikulu icha bantu chikwiza kukwache, po akamulalusya u Filipu akati, “Nkimba tungaghula kwiyi ichakulya ichakukwana ukubalyesya abantu bosi banaba?”

⁶ Akanena ichi pakumuyela bulo u Filipu pakuti akamanyila zila izyakubomba.

⁷ U Filipu akamwamula akati, “Ukuti umuntu wesi alabuke panandi bulo, zikulondiwa isalabazya izyakuchila 200 pisiku lyoka zizyo umuntu angapokela pisiku lyoka.”

⁸ Umumanyili wache weka, yuyo akaba we Andeleya, uwamwabo uwa Simoni Pitala akanena nawe akati,

⁹ “Alipo yumo umulumendo pano, yuyo ali ni vibama fayivi ivya malezi nu tuswi tubili. Loli vinivi vitangabakwana abantu bosi banaba?”

¹⁰ U Yesu akababuzya akati, “Mubabuzye abantu bikale pasi.” (Palapala pakabapo isote ilyinji.) Po abantu bosi bakikala pasi. Abanavuli bene bakabapo 5,000.

¹¹ U Yesu akasenda ivibama, akamupalizya u Chala nukubagabila abantu babo bakikala pasi palapala. Akabomba sona bunubu ni iswi zila, po bosi bakalya ukuyana na mumo bakalondelagha.

¹² Bo bikuta, u Yesu akababuzya abamanyili bache akati, “Musebe utubululusya kokuti katakabepo nakamo akakutaghiwa.”

¹³ Po bakaseba utubululusya tosi, bakizuzya ividudunga 12 nu tubululusya utwa vibama fayivi ivya malezi, vivyo vikasyala bo abantu balya.

¹⁴ Bo abantu bennya ichimanyilo chicho u Yesu akabomba, bakati, “Naloli uyu mulaghuzi, yuyo akwiza muchisu ichapasi!”

¹⁵ Bo u Yesu azyaghannya ukuti bakulonda ukwiza pakumulema ukuti bamwimike pakuba we Mwene, akanyokela sona kwighamba nukwiyekela mwene.

U Yesu akwenda pamizi

¹⁶ Bo kwanda pakwila, abamanyili aba Yesu bakikila kunyanja

¹⁷ nukukwela mubwato. Bakaloboka inyanja nukubuka mu Kapelinahumu. Ubusiku bukafika bo u Yesu achili pakwiza kukwabo.

¹⁸ Inyanja yikasambuka pachifukwa icha kuputa kwa mpepo iyakoghofya yila.

¹⁹ Bo benda ubutali ubwa mamita 5,000 pamo 6,000, bakamwennya u Yesu akwenda pamizi, akupalamila ku bwato, po ubogha bukabalema nkani.

²⁰ U Yesu akababuzya akati, “Mutakanyilaye! Nene.”

²¹ Panapo bakahoboka nukumukwezya mubwato, sona umwalubilolubilo ubwato bukafika kwisila kuko bakabukagha.

Abantu bakumulonda u Yesu

²² Ilyandabi, ichilundilo icha bantu chicho chikasyalikila kwisila ilya nyanja chikazyaghannya ukuti bukabapo ubwato boka mpela pabuzilo bula. Bakamanya ukuti u Yesu atakabuka poka na bamanyili bache, loli ukuti bakanyamuka bulo bene.

²³ Amabwato aghanji ghagho ghakafumila mu Tibeliya, ghakafika pabuzilo bubo abantu bakalyelapo ivibama bo u Mwene avisaya.

²⁴ Po bo ichilundilo icha bantu chennya ukuti u Yesu na bamanyili bache batalipo, chikakwela mu mabwato nukubuka mu Kapelinahumu pakumulonda u Yesu.

U Yesu we chibama ichipela ubumi

²⁵ Bo abantu bamwagha u Yesu kwisila ilinji ilya nyanja, bakamulalusya bakati, “Wee Mumanyisi, nkimba ukiza liyi kuno?”

²⁶ U Yesu akamula akati, “Naloli inkubabuzya ukuti amwe mutakandonda pachifukwa chakuti mukennya ivimanyilo, loli pachifukwa chakuti mukalya ivibama nukwikuta.

²⁷ Mutakabombaye imbombo ukuti mubanje ni chakulya chicho chikunanganika, loli bombela ichakulya chicho chikupa ubumi ubwa bwila na bwila. Ichi chakulya chicho u Mwana uwa Muntu akwiza pakubapa pakuti u Chala Uwise we yuyo abikitepo papache ichimanyilo ichakusimikizya.”

²⁸ Po bakamulalusya bakati, “Nkimba tungabomba ichoni ukuti tubombe imbombo zizyo u Chala akulonda ukuti tubombaye?”

²⁹ U Yesu akamula akati, “Imbombo zizyo u Chala akulonda ukuti mubombaye zyakuti mumusubilaye yuyo akamutuma.”

³⁰ Bakamulalusya sona bakati, “Nkimba ichimanyilo choni chicho ungabomba ukuti tuchennye nukukusubila? Nkimba ukwiza pakubomba ichoni?

³¹ Abanyenya bitu bakalyanga ichakulya chicho bakachitizyanga ukuti umana munkolongo mula ukuyana na Masimbo aghakuti, ‘Akabapa ivibama ivya kumwanya ukuti balye.’ ”

³² U Yesu akanena nabo akati, “Naloli inkubabuzya ukuti atakaba we Mozesi yuyo akabapa ichibama ichakufuma kumwanya awe; loli we Tata yuyo akabapa ichibama ichanaloli ichakufuma kumwanya.

³³ Pakuti ichibama chicho u Chala akupa we yuyo akwika kumwanya nukuchipa ichisu chapasi ubumi.”

³⁴ Bakanena nawe bakati, “Mwene, utupanje bwila ichibama chinichi.”

³⁵ U Yesu akababuzya akati, “Ane ne chibama ichipela ubumi. Umuntu wesi yuyo akwiza kukwane atakwiza pakubapo nalumolumo ni zala, sona umuntu wesi yuyo akunsubila atakwiza pakubapo nalumolumo ni nyota.

³⁶ Inkababuzya ukuti, napapo mwanyennya, loli mutakunsubila.

³⁷ Bosi babo Utata wane akumpa bakwiza kukwane, sona bosi babo bakwiza kukwane ntakwiza pakubasula,

³⁸ pakuti intikite kumwanya pakubomba ubwighane bwane nu bwane, loli nizite pakubomba ubwighane ubwa yuyo akantuma.

³⁹ Po ubwighane ubwa yuyo akantuma bwakuti ntakataghepo nayumo mu bantu babo ampiye, loli ukuti imbazyusye bosi pisiku ilyabumalilo.

⁴⁰ Pakuti zizyo Utata wane akulonda zyakuti abantu bosi, babo bakumwennya u Mwana nukumusubila, babanje nubumi ubwa bwila na bwila. Po ane inkwiza pakubazyusya pisiku ilyabumalilo.”

⁴¹ Pa ichi aba Yuda bakanda pakwilumbusya pachifukwa chakuti u Yesu akati, “Ane ne chibama chicho chikika kumwanya.”

⁴² Po bakati, “Nkimba uyu ate we Yesu u Mwana uwa Yosefu, yuyo uwise nu nyina tubamenye? Nkimba akunena buli-buli ukuti akika kumwanya?”

⁴³ U Yesu akabamula akati, “Mutakilumbusyanje mwebenebene.

⁴⁴ Ataliko nayumo umuntu yuyo angiza kukwane nanti Utata yuyo akantuma, atakumuwesela kukwane. Po nane inkwiza pakumuzyusya pisiku ilyabumalilo.

⁴⁵ Abalaghuzi bakasimba bakati, ‘Bosi bakwiza pakumanyiziwa nu Chala.’ Umuntu wesi yuyo akwivwa zizyo u Chala akunena nukumanyila kukwache, we yuyo akwiza kukwane.

⁴⁶ Ichi chitakung'anamula ukuti nayumo umuntu yuyo amwenizyepo Utata, loli mwene yuyo afumite kwa Chala, we yuyo amwenizyepo Utata.

⁴⁷ Naloli inkubabuzya ukuti yuyo akusubila ali nabo ubumi ubwa bwila na bwila.

⁴⁸ Ane ne chibama ichipela ubumi.

⁴⁹ Abanyenya binyu bakalya umana munkolongo, loli bakafwa.

⁵⁰ Ichi chibama chicho chikwika ukufuma kumwanya, ichakuti umuntu wesi yuyo akulya ichibama chila atakafwanje.

⁵¹ Ane ne chibama ichipela ubumi chicho chikika ukufuma kumwanya. Nanti umuntu wesi akulya ichibama chinichi, akwiza pakubangako bwila na bwila. Ichibama chicho inkwiza pakumupa gho mubili wane, chicho inkupa ukuti ichisu chapasi chibanje nubumi.”

⁵² Po aba Yuda bakanda pakudalinkana benebene. Bakalalusya bakati, “Nkimba umuntu yunuyu akwiza pakutupa buli-buli umubili wache ukuti tulyanje?”

⁵³ U Yesu akanena nabo akati, “Naloli inkubabuzya ukuti nanti mutakulya umubili uwa Mwana uwa Muntu, sona nanti mutakung'wela ibanda lyache, mutakwiza pakuba nubumi mumwinyu.

⁵⁴ Umuntu wesi yuyo akulya umubili wane nukung'wela ibanda lyane, ali nubumi ubwa bwila na bwila. Po nane inkwiza pakumuzyusya pisiku ilyabumalilo.

⁵⁵ Pakuti umubili wane cho chakulya ichanaloli, sona ibanda lyane cho chakung'wela ichanaloli.

⁵⁶ Umuntu wesi yuyo akulya umubili wane nukung'wela ibanda lyane, akwikala mumwane, po nane inkwikala mumwache.

⁵⁷ Ngati mumo Utata umumi akantumila nukuti ane ne mumi pachifukwa icha Tata, umwakuyana bulo umuntu wesi yuyo akundya, wepe akwiza pakuba nubumi pachifukwa icha nene.

⁵⁸ Chinichi cho chibama chicho chikika kumwanya. Chitayanite ni chibama chicho abanyenya binyu bakalya nukufwa pisinda pache. Loli bosi babo bakulya ichibama ichi bakwiza pakubangako bwila na bwila.”

⁵⁹ U Yesu akanena zinizi bo akumanyizya munyumba iyakwiputilamo mukaya aka Kapelinahumu.

Amazyu amapela bumi ubwa bwila na bwila

⁶⁰ Abamanyili bache abinji bakivwa zinizi nukuti, “Ubumanyisi ubu bupalapala nkani. Nkimba we wenu yuyo angabwivwisya?”

⁶¹ Bo u Yesu azyaghannya ukuti abamanyili bache bakwilumbusya pazinizi, akanena nabo akati, “Nkimba zinizi zikubavulazya mumoyo ghinyu?

⁶² Po zikwiza pakuba buli-buli bo mukwennya u Mwana uwa Muntu akukwela pakubuka kuko akabanga pakwanda?

⁶³ Umuzimu uwa Chala we yuyo akupa ubumi, amaka agha buntu ghate ni mbombo nayimoyimo. Amazyu ghagho nanena namwe ghakubapa u Muzimu uwa Chala nubumi.

⁶⁴ Loli balipo bamo mumwinyu babo batakusubila.” (Pakuti u Yesu akazimanyila zila ukwandila ko kubwandilo babo batakwiza pakusubila, sona na yuyo akwiza pakumubika munyobe izya balwani.)

⁶⁵ Po akati, “Ichi cho chifukwa inkababuzya ukuti nayumo umuntu yuyo angiza kukwane nanti Utata atakumwitikizya.”

⁶⁶ Pachifukwa chinichi, abakonki bache abinji bakanyokela kwisinda nukuleka pakwenda sona nawe.

⁶⁷ U Yesu akabalalusya abamanyili bache 12 bala akati, “Nkimba namwe bulo mukulonda pakubuka?”

⁶⁸ U Simoni Pitala akamwamula akati, “Wee Mwene, nkimba tungabuka kwa wenu? Awe uli nagho amazyu amapela bumi agha bwila na bwila.

⁶⁹ Losi ulu tukusubila nukumanya ukuti awe we Muzelu yuyo afuma kwa Chala.”

⁷⁰ U Yesu akabamula akati, “Inkabasala amwe 12. Nkimba mute momumo? Loli weka mumwinyu we Satana!”

⁷¹ Akamunenagha u Yudasi, umwana uwa Simoni Sikaliyoti. Pakuti u Yudasi napapo akaba wabamo mu bamanyili 12 bala, akaba we yuyo uwakumubika u Yesu munyobe izya balwani.