Yohani 5 - Ulufingo Ulupya

U Yesu akumupozya umuntu pachiziba

¹ Pisinda pache u Yesu akabuka mu Yelusalemu ku lusekelo ulwa Chiyuda.

² Mu Yelusalemu mulamula papipi nu Mulyango uwa Ng'ozi mukaba ichiziba chicho chikazyunguliliwa ni ntanda fayivi, chicho mu Chihebeli bakatinji Betizada

³ Muntanda zila mukalambalala abantu abinji nkani ababine, abafwamaso, babo bafuye ivinama na balemazu.

⁵ Pakasi pa bantu ababine bala, akabapo yumo yuyo akabinagha amaka 38.

⁶ Bo u Yesu amwennya alambalaye nukumanya ukuti abina akabalilo akatali nkani, akamulalusya akati, “Nkimba ukulonda pakupola?”

⁷ Umubine yula akamula akati, “Wee Mwene, inte nu muntu uwakundwibika muchiziba ichi bo amizi ghakuyingana. Pakuti bo inkuti indwibemo, inkwagha uyunji adwibitemo kale.”

⁸ U Yesu akamubuzya akati, “Nyamuka, nyamula ichibonde chako, endagha.”

⁹ Panapo na panapo umuntu yula akapola, akanyamula ichibonde chache nukwanda pakwenda. Zinizi zikabombiwa Pisiku Ilyakutuzya,

¹⁰ po abalaghili aba Chiyuda bakamubuzya umuntu yuyo akapola ukuti, “Ilelo Lisiku Ilyakutuzya, sona Indaghilo zyitu zitakwitikizya ukuti unyamule ichibonde chako.”

¹¹ Akabamula akati, “Umuntu yuyo akampozya akambuzya akati, ‘Nyamula ichibonde chako, endagha.’ ”

¹² Bakamulalusya bakati, “Muntu wenu yuyo akubuzizye ukuti unyamule ichibonde chako nukwenda?”

¹³ Loli umuntu yuyo akapola atakamumanya umuntu yuyo akamupozya pachifukwa chakuti u Yesu akepapo pakuti pabuzilo bula pakaba ichilundilo icha bantu.

¹⁴ Pisinda pache u Yesu akamwagha mu Nyumba iya Chala nukumubuzya ukuti, “Ivwa kuno, ilelo wapola, utakabombe sona imbibi, ukuti ichintu chimo ichibibi chingakuwila.”

¹⁵ Umuntu yula akabuka nukubabuzya abalaghili aba Chiyuda ukuti umuntu yuyo akampozya akaba we Yesu.

¹⁶ Po aba Yuda bakanda pakumuvwima u Yesu pachifukwa chakuti akabomba imbombo iyakupozya iyi Pisiku Ilyakutuzya.

¹⁷ U Yesu akabamula akati, “U Tata akubomba imbombo akabalilo kosi, po nane bulo imbaghiye pakubomba imbombo.”

¹⁸ Pachifukwa ichi, abalaghili aba Chiyuda bakalondagha nkani pakumughogha u Yesu pakuti chitakaba chifukwa chene ichakuti akanangannya ululaghilo ulwa Isiku Ilyakutuzya, loli pachifukwa ichakunena ukuti u Chala akaba we wise, po pakubomba bunubu akipela mwene ukuyana nu Chala.

Ubulaghili ubwa Mwana uwa Chala

¹⁹ Po u Yesu akabamula akati, “Naloli inkubabuzya ukuti u Mwana atangabomba nachimo pamwene. Loli akubomba zyene zizyo ennya Uwise akubomba. Pakuti zizyo Uwise akubomba zyo zizyo u Mwana wepe akubomba.

²⁰ Pakuti Uwise amughanite u Mwana nukumulanjizya vyosi vivyo akubomba umwenecho. Akwiza pakumulanjizya ni mbombo inkulu nkani ukuchila na zinizi, po mwebosi mukwiza pakuswigha.

²¹ Ngati mumo Uwise akuzyusizya abafwe nukubapa ubumi, umwakuyana bulo wepe u Mwana akubapa ubumi babo akulonda ukubapa.

²² Uwise atakumulonga nayumo umuntu, loli amupiye u Mwana ubulaghili bosi ubwakulongela,

²³ ukuti bosi bamuchindikaye u Mwana ukuyana na mumo bakumuchindikila Uwise. Umuntu wesi yuyo atakumuchindika u Mwana, atakumuchindika nu Wise bulo yuyo akamutuma.

²⁴ “Naloli inkubabuzya ukuti bosi babo bakwivwa amazyu ghane nukumusubila yuyo akantuma, bali nubumi ubwa bwila na bwila. Batakwiza pakulongiwa, loli balobokako kubufwe nukwinjila mubumi.

²⁵ Naloli inkubabuzya ukuti akabalilo kakwiza, sona kizite kale, kako abafwe bakwiza pakwivwa izyu ilya Mwana uwa Chala, po bosi babo bakulyivwa bakwiza pakuba nubumi.

²⁶ Ngati mumo Uwise mbwibwi iyabumi, umwakuyana bulo amupeleye nu Mwana wache pakuba mbwibwi iyabumi.

²⁷ Sona amupiye nu Mwana ubulaghili ubwakulongela pakuti we Mwana uwa Muntu.

²⁸ Mutakaswighaye pachinichi, akabalilo kakwiza kako bosi abafwe bakwiza pakwivwa izyu lyache,

²⁹ nukwepamo mumapumpa ghabo. Bosi babo babombite inyiza bakwiza pakuzyuka kubufwe nukuba nubumi, sona babo babombite imbibi bakwiza pakuzyuka kubufwe nukulongiwa.”

Abasimiki aba Yesu

³⁰ “Intangabomba nachimo pane mwene. Inkulonga bulo namumo u Chala akumbuzizya, po ubulongi bwane bwanaloli pakuti ntakubomba ubwighane bwane, loli ubwighane ubwa yuyo akantuma.

³¹ “Nanti nkwisimikizya ne mwene, ulusimikizyo lwane lute lwanaloli.

³² Loli alipo yumo uwakunsimikizya, sona izimenye ukuti ulusimikizyo lwache lulo akunsimikizya lwanaloli.

³³ Amwe mukatuma intumi kwa Yohani Uwalozyo, po umwene ulusimikizyo lwache lukaba lwanaloli.

³⁴ Kute kokuti inkweghamila ulusimikizyo ulwa muntu, loli inkubabuzya zinizi ukuti mupokiwe.

³⁵ U Yohani akaba ngati yo nyale, yiyo yikaka nukulama, sona mukalondagha ukwilagha ulukozyo lwache pakabalilo akanandi bulo.

³⁶ Loli ulusimikizyo lulo indi nalo lukulu ukuchila ulwa Yohani. Pakuti imbombo zizyo Utata wane akampa ukuti imalizye, imbombo zizyo indi pakubomba, zyo zizyo zikusimikizya ukuti Utata antumite.

³⁷ Sona Utata yuyo akantuma we yuyo akunsimikizya. Amwe mutivuyepo nalumolumo izyu lyache, pamo ukuchennyapo icheni chache,

³⁸ lyope nizyu lyache litalimo mumwinyu pakuti mutakumusubila yuyo akamutuma.

³⁹ Mukumanyila akiza Amasimbo pakuti mukwinong'ona ukuti momumo mukwiza pakubwaghamo ubumi ubwa bwila na bwila. Po Amasimbo ghanagha gho ghagho ghakunsimikizya.

⁴⁰ Loli amwe mukukana ukwiza kukwane ukuti mubanje nubumi.

⁴¹ “Intakulonda amapalo agha bantu.

⁴² Loli imbamenye namumo mubeleye, sona izimenye ukuti mutamughanite u Chala mumoyo ghinyu.

⁴³ Ane nizite nu bulaghili ubwa Tata wane, loli amwe mutampokelite. Loli nanti yumo akwizila mu bulaghili ubwache nu bwache, amwe mukwiza pakumpokela.

⁴⁴ Nkimba mungasubila buli-buli, nanti mukuchindinkana mwebenebene, loli mutakwiyula pakuba nu muchizi uwakufuma kwa Chala mwene na mwene bulo?

⁴⁵ Mutakinong'onaye ukuti ane inkwiza pakubasusya kwa Tata, awe. U Mozesi yuyo mukumusubila, we yuyo akwiza pakubasusya amwe.

⁴⁶ Nanti mwamusubiye u Mozesi, ngali mwansubiye nane pakuti umwene asimbite nizya ane.

⁴⁷ Loli nanti mutakuzisubila zizyo akasimba, nkimba po mungazisubila buli-buli zizyo nkunena?”