Yohani 3 - Ulufingo Ulupya

U Yesu nu Nikodemu

¹ Kukabako umulongozi yumo uwa Chiyuda yuyo akaba we Nikodemu, uwa kabukatila aka ba Falisayi.

² Ubusiku bumo akabuka kwa Yesu nukunena nawe ukuti, “Wee Labi, tuzimenye ukuti awe we mumanyisi yuyo atumiwe nu Chala. Ataliko nayumo umuntu yuyo angabomba ivimanyilo vivyo ukubomba nanti u Chala ate nawe.”

³ U Yesu akamula akati, “Naloli inkukubuzya ukuti nayumo umuntu yuyo anginjila mu Bumwene ubwa Chala ukusita ukupapiwa sona.”

⁴ U Nikodemu akamulalusya akati, “Umuntu usongo angapapiwa buli-buli sona? Naloli atanginjila sona mulwanda ulwa nyina nukupapiwa akabubili.”

⁵ U Yesu akamula akati, “Naloli inkukubuzya ukuti nayumo umuntu yuyo anginjila mu Bumwene ubwa Chala, ukusita ukupapiwa sona kumizi, na ku Muzimu Umuzelu.

⁶ Umuntu akupapiwa ku mubili na bapapi bache, loli akupapiwa ku muzimu nu Muzimu Umuzelu.

⁷ Utakaswighaye pachifukwa chakuti nkukubuzya ukuti ubaghiye pakupapiwa sona.

⁸ Impepo yikuputa kosi kuko yikulonda, ukwivwa bulo ichongo chicho yikupanga, loli utakumanya na kuko yikufuma pamo kuko yikubuka. Momumo zibeleye sona nu muntu wesi yuyo apapiwe nu Muzimu Umuzelu.”

⁹ U Nikodemu akalalusya akati, “Zingaba buli-buli?”

¹⁰ U Yesu akamula akati, “Awe we mumanyisi umumanyikwe mu Izilayeli, loli utazimenye zinizi?

¹¹ Naloli inkukubuzya ukuti aswe tukunena zizyo tuzimenye, tukuzisimikizya zizyo tuzyenizye, loli nayumo umuntu mumwinyu yuyo akulupokela ulusimikizyo lwitu.

¹² Nanti mutakusubila ivintu ivya muchisu ichapasi vivyo inkubabuzya, po mungasubila buli-buli nanti inkubabuzya ivintu ivya kumwanya?

¹³ Nayumo umuntu yuyo afikiteko kumwanya, loli mwene u Mwana uwa Muntu, yuyo akika kumwanya.

¹⁴ “Ngati mumo u Mozesi akayipayikila injoka iya chela pikwi munkolongo mula, umwakuyana bulo wepe u Mwana uwa Muntu abaghiye pakupayikiwa,

¹⁵ kokuti umuntu wesi yuyo akumusubila abanje nubumi ubwa bwila na bwila.

¹⁶ Pakuti u Chala akabaghana nkani abantu aba muchisu ichapasi, umwakuti akabapa u Mwana wache mwene na mwene, kokuti umuntu wesi yuyo akumusubila atakafwanje, loli abanje nubumi ubwa bwila na bwila.

¹⁷ U Chala atakatuma u Mwana wache muchisu ichapasi ukuti abanje mulongi, loli ukuti abanje Mupoki wabo.

¹⁸ “Umuntu wesi yuyo akumusubila u Mwana atakulongiwa, loli yuyo atakumusubila alongiwa kale pachifukwa chakuti atamusubiye u Mwana mwene na mwene uwa Chala.

¹⁹ Iyi yo nongwa iya kubalongela: Ulukozyo lwizite muchisu ichapasi, loli abantu bachighanite nkani ichisi ukuchila ulukozyo pakuti imbombo zyabo mbibi.

²⁰ Umuntu wesi yuyo akubomba ivintu ivibibi alubengite ulukozyo, po atangiza pabuzelu pakuti atakulonda ukuti imbombo zizyo akubomba zibonekele pabuzelu.

²¹ Loli umuntu wesi yuyo akubomba ubwanaloli akwiza pabuzelu kokuti ulukozyo lungalanjizya pabuzelu ukuti amwivwila u Chala pakubomba zizyo abomba.”

U Yesu nu Yohani

²² Pisinda pache u Yesu na bamanyili bache bakabuka muchigaba icha Yudeya, kuko akikalako nabo kwa kabalilo nukozya.

²³ U Yohani wepe akozyanga mu Ayinoni, papipi nu Salimu pakuti pabuzilo bula pakabapo amizi aminji. Abantu bakabukagha kukwache, po akabozyanga.

²⁴ Izi zikabombiwa bo nu Yohani atabikiwe mujele.

²⁵ Abamanyili bamo aba Yohani bakanda pakudalinkana nu mu Yuda yumo panyiho izyakwiswefya.

²⁶ Po bakabuka kwa Yohani nukunena nawe ukuti, “Wee Mumanyisi, wamukumbuka umuntu yuyo ukaba nawe kwisila ilinji ilya Yolodani, yuyo ukamunenagha? Ilelo ali pakozya, sona umuntu wesi akubuka kukwache.”

²⁷ U Yohani akamula akati, “Ataliko nayumo umuntu yuyo angaba nacho chimo, ukusita u Chala pakumupa.

²⁸ Amwe mwe bakaboni bane ukuti inkanena ukuti, ‘Ane inte ne Kilisitu, loli natumiwa bulo muntazi mumwache.’

²⁹ Yuyo asenda we yuyo we mwenecho uwa mukolo. Loli umumanyani uwa mwenesendwa we yuyo akwimilila papipi nukuteghelezya. Akuhoboka nkani bo akwivwa amazyu agha mwenesendwa. Bunubu nane ihobokite nkani.

³⁰ Umwene abanje wapamwanya, loli ane imbanje wapasi.”

Yuyo akufuma kumwanya

³¹ Yuyo akufuma kumwanya wapamwanya ukuchila bosi. Yuyo akufuma muchisu ichapasi uwa muchisu, sona akunena ivya muchisu ichapasi, loli yuyo akufuma kumwanya wapamwanya ukuchila bosi.

³² Umwene akuzisimikizya zizyo azyenizye nu kuzyivwa. Loli nayumo umuntu yuyo akulupokela ulusimikizyo lwache.

³³ Loli umuntu wesi yuyo akulupokela ulusimikizyo lwache akusimikizya ukuti u Chala wanaloli.

³⁴ Pakuti yuyo u Chala amutumite akunena amazyu agha Chala, pachifukwa chakuti u Chala akumupa u Muzimu Umuzelu ukusita ukumamilizya.

³⁵ Uwise amughanite u Mwana sona abikite ivintu vyosi munyobe zyache.

³⁶ Umuntu wesi yuyo akumusubila u Mwana ali nubumi ubwa bwila na bwila, sona wesi yuyo atakumusubila u Mwana atakwiza pakuba nubumi, loli u Chala akwiza pakumufunda.