Yohani 20 - Ulufingo Ulupya

U Yesu azyuka kubufwe

¹ Pandabindabi nkani, bo lyachila Isiku Ilyakutuzya, bo kuchili nukucha, u Maliya Magadalena akabuka kwipumpa nukwagha ukuti ibwe lyefeziwepo pamulyango wipumpa.

² Po akamuchimbilila u Simoni Pitala nu mumanyili uyunji yuyo u Yesu akamughana nkani nukubabuzya ukuti, “Bawefizyemo umuvimba uwa Mwene mwipumpa, tutamenyeko na kuko baghubikite.”

³ Po u Pitala nu mumanyili uyunji yula bakabuka kwipumpa.

⁴ Bosi babili bakachimbilagha loli umumanyili uyunji yula akachimbila nkani ukuchila u Pitala. Akaba wakwanda ukufika kwipumpa.

⁵ Akinama nukwennya amenda amazelu ghene ghagho bakamunnyembetelela nagho, loli atakinjila mukasi.

⁶ U Simoni Pitala yuyo akamukonkagha akafika nukwinjila mwipumpa. Akennya amenda amazelu ghagho bakamunnyembetelela nagho ghali mulamula,

⁷ ni chitambala chicho bakamupinya u Yesu kumutu. Chitakaba poka na menda amaswepu ghala, loli chikinnyenga chene palubazu.

⁸ Po umumanyili uyunji yuyo akanda pakufika kwipumpa, wepe akinjila. Akennya nukusubila.

⁹ Pakuti bakaba bachili pakughivwisya Amasimbo ghagho ghakuti u Yesu abaghiye pakuzyuka kubufwe.

¹⁰ Po abamanyili bala bakanyokela kukwabo.

U Yesu akumubonekela u Malya Magadalena

¹¹ U Maliya akimilila kuzi kwipumpa, akalilagha. Bo achili akulila, akinama nukunanamizya mwipumpa

¹² akabennya abantumi babili aba kumwanya bavwalite amenda amazelu, bikaye papo umuvimba uwa Yesu ghukaba, weka kumutu uwamwabo ku vinama.

¹³ Bakamulalusya bakati, “Wee mukolo, nkimba ukulila ichoni?” Akabamula akati, “Bamwefizyemo u Mwene wane, sona intamenyeko na kuko bamubikite!”

¹⁴ Bo anena zinizi, akaghalabuka nukumwennya u Yesu imiliye palapala, loli atakamumanya ukuti we Yesu.

¹⁵ U Yesu akamulalusya akati, “Wee mukolo, choni chicho ukulila? Nkimba ukumulonda we wenu?” U Maliya akinong'onagha ukuti akaba mulindilili uwa mughunda, po akamubuzya akati, “Wee Mwene, nanti wewe umunyamuye, mbuzya kuko umubikite ukuti imbuke nukumusendako.”

¹⁶ U Yesu akamubuzya akati, “Maliya!” U Maliya akaghalabuka nukunenela mu Chihebeli ukuti, “Laboni!” (Kokuti, “Mumanyisi.”)

¹⁷ U Yesu akamubuzya akati, “Utakampalamasye pakuti inchili pakukwela kumwanya kwa Tata. Loli kababuzye abakamu bane ukuti, ‘Inkunyokela kumwanya kwa Tata wane, yuyo namwe we ghuso winyu, sona u Chala wane, yuyo namwe we Chala winyu.’ ”

¹⁸ Po u Maliya Magadalena akabuka nukubabuzya abamanyili bala ukuti amwennya u Mwene, sona akababuzya ukuti u Mwene akanena zinizi kukwache.

U Yesu akubabonekela abamanyili bache

¹⁹ Pisiku ilinji, bo lyachila Isiku Ilyakutuzya, pakabalilo aka pachamabwila, abamanyili bakakomana poka munyumba. Inyiyi zikaba nyighalile nkani, pachifukwa chakuti bakabanyilagha abalaghili aba Chiyuda. Po u Yesu akiza nukwimilila pakasi papabo nukuti, “Umutende ghubanje namwe!”

²⁰ Bo amala pakunena zinizi, akabalanjizya inyobe na mumbazu mwache. Abamanyili bakizula nu buhobosu bo bamwennya u Mwene.

²¹ U Yesu akanena nabo sona akati, “Umutende ghubanje namwe. Ukuyana na mumo Utata akantumila, po momumo nane inkubatumila.”

²² Bo anena zinizi, akabaputila umuyi nukuti, “Pokela u Muzimu Umuzelu.

²³ Nanti mukubahobokela abantu imbibi zyabo, naloli bakuhobokeliwa, loli nanti mutakubahobokela imbibi zyabo, naloli batakuhobokeliwa.”

U Yesu nu Tomasi

²⁴ U Tomasi (yuyo akitiziwanga ukuti we Didimo), weka mu bamanyili 12 bala, atakaba poka na bamwabo bo u Yesu iza.

²⁵ Po abamanyili abanji bala bakamubuzya bakati, “Twamwennya u Mwene!” U Tomasi akanena nabo akati, “Pene papo nennya amabala agha mizumali munyobe zyache nukughalema ni nyobe zyane, sona nukubika inyobe yane mumbazu zyache, ntakwiza pakusubila.”

²⁶ Bo pachilapo usabata weka abamanyili bakakomana sona munyumba, u Tomasi akaba poka nabo. Inyiyi zikaba nyighalile nkani, loli u Yesu akiza, akimilila pakasi papabo nukuti, “Umutende ghubanje namwe.”

²⁷ Po akamubuzya u Tomasi akati, “Bika akafingwi kako pano nukwenelezya inyobe zyane. Gholosya inyobe yako nukuyibika mumbazu zyane. Leka ukwilamwa, loli subila.”

²⁸ U Tomasi akamwamula akati, “Mwene wane, sona nu Chala wane.”

²⁹ U Yesu akamubuzya akati, “Nkimba ukusubila pachifukwa chakuti wanyennya? Basayiwa babo bakusubila bo batanyenizye.”

Ifundo iya buku ili

³⁰ U Yesu akapela ivyika ivyinji pamaso pa bamanyili bache, vivyo vitasimbiwe mwibuku linili.

³¹ Loli ivi visimbiwe ukuti musubile ukuti u Yesu we Kilisitu, u Mwana uwa Chala sona nukuti nanti mwamusubila mubanje nubumi.