Yohani 17 - Ulufingo Ulupya

U Yesu akubiputila abamanyili bache

¹ Bo u Yesu amala pakunena zinizi, akennya kumwanya nukuti, “Wee Tata, akabalilo kakwana. Umuchindikaye u Mwana wako, umwakuti u Mwana akuchindikaye awe.

² Pakuti ukamupa ubulaghili ubwakulaghilila abantu bosi, umwakuti abape ubumi ubwa bwila na bwila bosi babo ukamupa.

³ Nanti abantu bakumanye awe, we Chala wemwene uwanaloli, sona nukumumanya u Yesu Kilisitu, yuyo ukamutuma, bakwiza pakuba nubumi ubwa bwila na bwila.

⁴ Ane inkakuchindika muchisu ichapasi pakumalizya imbombo yiyo ukampa ukuti injibombe.

⁵ Wee Tata, losi ulu umpe ubuchindamu pamaso papako, ubuchindamu bubo inkaba nabo poka nawe, bo ichisu chapasi chichili pakupeliwa.

⁶ “Nakuvumbula awe ku bantu babo ukampa pakasi pa bantu aba muchisu ichapasi. Bakaba bako, po awe ukampa ane. Bivwila amazyu ghako,

⁷ sona losi ulu bazimenye ukuti vyosi vivyo ukampa vifumite kukwako.

⁸ Pakuti inkabapa amazyu ghagho ukampa, po bakaghapokela. Naloli bazimenye ukuti ane inkafuma kukwako, sona bakusubila ukuti awe wewe ukantuma.

⁹ “Ane nkubiputila babo ukampa pakuti bako. Intakubiputila abantu aba muchisu ichapasi.

¹⁰ Vyosi vivyo indi navyo vyako, sona vyosi vivyo uli navyo vyane, sona ubuchindamu bwane bukubonekela mumwabo.

¹¹ Losi ulu inkwiza kukwako, ntakwiza pakwikala sona muchisu ichapasi umu awe, loli abene bali muchisu ichapasi. Tata Umuzelu, ubasunge akiza na maka agha itabwa lyako, itabwa lilyo ukampa, umwakuti babanje muntu weka ukuyana na mumo awe nane tuli weka.

¹² Pakabalilo kako nkikalagha nabo, inkabasunga akiza na maka agha itabwa lyako, itabwa lilyo ukampa. Inkabasunga akiza, po nayumo umuntu yuyo asobelitepo, loli mwene yuyo zikamubaghila ukuti ananganike, umwakuti Amasimbo ghakwanilisiwe.

¹³ Po losi ulu inkwiza kukwako. Loli nkunena zinizi bo inchili indi muchisu ichapasi, umwakuti babanje nu buhobosu bwane ubwakufikapo mumoyo ghabo.

¹⁴ Ane inkabapa amazyu ghako, loli abantu aba muchisu ichapasi chikababenga pakuti bate ba muchisu ichapasi ukuyana na mumo ane inte ne uwa muchisu ichapasi.

¹⁵ Intakulaba ukuti ubefyemo muchisu ichapasi awe, loli ukuti ubapoke ku Mubibi yula.

¹⁶ Bate ba muchisu ichapasi, ukuyana na mumo ane inte ne uwa muchisu ichapasi.

¹⁷ Ubapaghule nu bwanaloli bwako ukuti babanje bazelu. Amazyu ghako ghanaloli.

¹⁸ Ngati mumo ukantumila muchisu ichapasi, umwakuyana bulo, nane nabatuma muchisu ichapasi.

¹⁹ Pachifukwa icha babo nkwiyipa kukwako nu moyo ghosi, umwakuti naloli bope babanje bapaghuliwa.

²⁰ “Intakubiputila bene banaba, loli nkubiputila sona na babo bakwiza pakunsubila pachifukwa icha bulumbilili bwabo.

²¹ Nkubiputila ukuti bosi babanje muntu weka. Wee Tata, ubapelaye ukuti babanje mumwitu ukuyana na mumo awe uli mumwane, nane indi mumwako. Babanje muntu weka, umwakuti abantu aba muchisu ichapasi basubile ukuti awe wewe ukantuma.

²² Inkabapa ubuchindamu bubo ukampa, umwakuti babanje weka ukuyana mumo ane nawe tuli weka.

²³ Ane mumwabo, awe mumwane, umwakuti babanje weka umwakufikapo ukuti abantu aba muchisu ichapasi bazimenye ukuti awe wewe ukantuma, sona ukuti ubaghanite ukuyana na mumo unganiye.

²⁴ “Wee Tata, nkulonda ukuti abantu babo umpiye babanje nane kuko indi, umwakuti bangennya ubuchindamu bwane, bubo ukampa pakuti ukangana bo ni chisu chichili pakupeliwa.

²⁵ Wee Tata umugholosu, abantu aba muchisu ichapasi batakumenye awe, loli ane inkumenye, sona aba bazimenye ukuti awe wewe ukantuma.

²⁶ Itabwa lyako ndifumusizye kukwabo, po inkwiza pakwendelela pakulifumusya, umwakuti ukungana kuko unganite nako kubanje na mumwabo bulo, sona ukuti nane imbanje mumwabo.”