Yohani 16 - Ulufingo Ulupya

¹ “Nababuzya zinizi, umwakuti muleke pakutagha ulwitiko.

² Bakwiza pakubepusya munyumba izyakwiputilamo, sona akabalilo kakwiza kako umuntu wesi yuyo akubaghogha akwiza pakwinong'ona ukuti pakubomba bunubu, akumubombela u Chala.

³ Abantu bakwiza pakubabombela zinizi pakuti batamumenye Utata, sona nane bulo batamenye.

⁴ Nababuzya zinizi, umwakuti bo akabalilo kala kakwana akakuti abene babombe ivintu vinivi, mukakumbukaye ukuti ane inkabasoka. “Loli ukwandila ko kubwandilo ntakababuzya zinizi pakuti inkaba poka namwe.

Imbombo iya Muzimu Umuzelu

⁵ Ilelo nkubuka kwa yuyo akantuma, loli nayumo umuntu uwakundalusya ukuti, ‘Ukubuka kwiyi?’

⁶ Po amoyo ghinyu ghizuye ni chitima pakuti nababuzya zinizi.

⁷ Naloli inkubabuzya ukuti chizapo kukwinyu ukuti ane imbuke pakuti nanti ntakubuka, umwavwilizi atakwiza kukwinyu. Loli nanti nabuka, po inkwiza pakumutuma kukwinyu.

⁸ Sona bo iza, akwiza pakubasimikizya abantu aba muchisu ichapasi ukuti akinong'onele kabo pambibi, ubugholosu, sona na mumo u Chala akwiza pakulongela abantu kate kiza.

⁹ Akinong'onele kabo pambibi kate kiza pakuti batakunsubila;

¹⁰ akinong'onele kabo pa bugholosu kate kiza pakuti nkubuka kwa Tata, po mutakwiza pakunyennya sona;

¹¹ akinong'onele kabo namumo u Chala akwiza pakulongela abantu kate kiza pakuti u Satana, umulaghili uwa chisu ichapasi alongiwe kale.

¹² “Inchili indi nazyo inyinji izyakubabuzya, loli pakabalilo aka mutangazyivwisya.

¹³ Loli bo u Muzimu Umuzelu, yuyo akuvumbula ubwanaloli ubwa Chala iza, akwiza pakubamanyizya ubwanaloli bosi. Atakwiza pakunena nu bulaghili ubwache nu bwache awe, loli akwiza pakunena zizyo akwivwa, sona akwiza pakubabuzya nizya vintu vivyo vikwiza pakuboneka muntazi.

¹⁴ Akwiza pakumpa ane ubuchindamu pakuti akwiza pakusenda zizyo nkunena nukubabuzya amwe.

¹⁵ Vyosi vivyo Utata ali navyo vyane. Ichi cho chifukwa inkanena ukuti u Muzimu Umuzelu akwiza pakusenda zizyo nkunena nukubabuzya amwe.

Ichitima chikwiza pakuba buhobosu

¹⁶ “Pasyala akabalilo akanandi bulo po mutakwiza pakunyennya, loli bo pachilapo akabalilo akanandi bulo mukwiza pakunyennya.”

¹⁷ Abamanyili bache bamo bakanda pakulaluzannya benebene ukuti, “Nkimba akung'anamula ichoni bo akunena ukuti, ‘Pasyala akabalilo akanandi bulo po mutakwiza pakunyennya, sona bo pachilapo akabalilo akanandi bulo mukwiza pakunyennya sona,’ akunena sona akuti, ‘Pakuti nkubuka kwa Tata.’

¹⁸ Nkimba akung'anamula ichoni bo akunena ukuti, ‘Pasyala akabalilo akanandi bulo?’ Aswe tutakuzyivwisya zizyo akunena.”

¹⁹ U Yesu akazyaghannya ukuti abamanyili bache bakalondagha pakumulalusya, po akanena nabo akati, “Inkanena ukuti, ‘Pasyala akabalilo akanandi bulo po mutakwiza pakunyennya, loli bo pachilapo akabalilo akanandi bulo mukwiza pakunyennya.’ Nkimba ivi vyo vivyo mukulaluzannya mwebene?

²⁰ Naloli inkubabuzya ukuti mukwiza pakulila nu kufwifwitila, loli abantu aba muchisu ichapasi bakwiza pakuhoboka nkani. Amwe mukwiza pakuba ni chitima, loli ichitima chinyu chikwiza pakuba buhobosu.

²¹ Nanti umukolo ali papipi pakusayiwa, akulwika pakuti akabalilo kache aka ntamyo kakwana, loli nanti umwana apapiwa, akuluvya intamyo zyache zila pakuti akuhoboka nkani ukuti umwana apapiwa muchisu.

²² Momumo zibeleye namwe, ilelo muli ni chitima, loli inkwiza pakubennya sona. Amoyo ghinyu ghakwiza pakwizula nu buhobosu, ubuhobosu bubo nayumo umuntu atangabafyula.

²³ “Bo isiku lila lyakwana, mutakwiza pakundalusya nachimo. Naloli inkubabuzya ukuti Utata akwiza pakubapa chosi chicho mukulabila mwitabwa lyane.

²⁴ Ukufika pakabalilo aka, mutalabitepo nachimo mwitabwa lyane. Laba, po mukwiza pakupokela, umwakuti ubuhobosu bwinyu bubanje bwakufikapo.

Ukuchipota ichisu chapasi

²⁵ “Nababuzizye muvyili ivintu ivi. Akabalilo kakwiza bo ntakwiza pakunenela muvyili, loli inkwiza pakubabuzya nizya Tata pabuzelu.

²⁶ Bo isiku lila lyakwana, mukwiza pakumulaba mwitabwa lyane. Sona ntakunena ukuti inkwiza pakubalabila kwa Tata,

²⁷ pakuti Utata umwenecho abaghanite amwe. Abaghanite amwe pakuti amwe munganite, sona musubiye ukuti inkafuma kwa Chala.

²⁸ Ane inkafuma kwa Tata nukwiza muchisu ichapasi, po ilelo inkwepamo muchisu ichapasi nukunyokela kwa Tata.”

²⁹ Abamanyili bache bakanena nawe bakati, “Losi ulu ukunena pabuzelu, utakunenela sona muvyili.

³⁰ Losi ulu tuzimenye ukuti uvimenye vyosi; kutakulondiwa sona ukuti umuntu akulaluzye, awe. Ichi cho chifukwa tukusubila ukuti ukafuma kwa Chala.”

³¹ U Yesu akabamula akati, “Nkimba losi ulu mukusubila?

³² Akabalilo kakwiza, sona kakwana kale, bo mukwiza pakusata, umuntu wesi kukaya kache nukundeka nemwene. Loli inte nemwene pakuti Utata ali poka nane.

³³ Nababuzya zinizi ukuti mubanje nu mutende pakuba poka nane. Ichisu chapasi chikwiza pakubavwima, loli mujimbe nkani umoyo pakuti nachipota kale ichisu chapasi!”