Yohani 15 - Ulufingo Ulupya

U Yesu we lutabo ulwa mampesya ulwanaloli

¹ “Ane ne lutabo ulwa mampesya ulwanaloli, loli Utata we mulimi.

² Akudumula papane akasamba kosi kako katakwela ivikomwa, loli akupalantila akasamba kosi kako kakwela ivikomwa, umwakuti kele ivikomwa ivyinji.

³ Amwe mwe bapalantiwe zila pachifukwa icha mazyu ghagho nababuzizye.

⁴ Mubanje mumwane, po inkwiza pakwikala mumwinyu. Akasamba katangela ivikomwa pakene nanti katamamatilanite kulutabo ulwa mampesya. Namwe bulo mutangampa ivikomwa nanti mutakuba mumwane.

⁵ “Ane ne lutabo ulwa mampesya, sona amwe mwe isamba zyache. Umuntu wesi yuyo akwikala mumwane, sona nane mumwache, akwiza pakupa ivikomwa inyinji. Pakuti ukusita ane mutangabomba nachimo.

⁶ Umuntu wesi yuyo atakwikala mumwane akusumbiwa kuzi ngati ko kasamba nukumila. Utusamba ngati to utu bakutubungannya poka nukusumbiwa pamoto, nukochiwa.

⁷ Nanti amwe mukwikala mumwane, ghope amazyu ghane ghakwikala mumwinyu, mukwiza pakulaba chosi chicho mukulonda, po mukwiza pakuchipokela.

⁸ Ubuchindamu ubwa Tata wane bukulanjiziwa bo mukupa ivikomwa ivyinji. Po bunubu amwe mukulanjizya ukuti mwe bamanyili bane abanaloli.

⁹ Ukuyana na mumo Utata anganiye, momumo nane bulo imbaghaniye. Mubanje mulughano ulwane.

¹⁰ Nanti mukukonka amalamulo ghane, mukwiza pakwikalagha mulughano ulwane, ukuyana na mumo nane nivwiliye amalamulo agha Tata wane nukwikala mulughano ulwache.

¹¹ “Nababuzya zinizi ukuti ubuhobosu bwane bubanje mumwinyu nukuti ubuhobosu bwinyu bubanje bwakufikapo.

¹² Ili lyo lilamulo lyane: Mughananaye ukuyana na mumo nane imbaghaniye.

¹³ Nayumo umuntu yuyo ali nu lughano ulukulu nkani ukuchila ulu ulwakuti abutaghe ubumi bwache pachifukwa icha bamanyani bache.

¹⁴ Amwe mwe bamanyani bane nanti mukubomba zizyo nkubalamula.

¹⁵ Intakubanena sona ukuti mwe bambombo pakuti uwambombo atakumanya zizyo umwene wache akubomba. Loli nkubanena amwe bamanyani bane pakuti nababuzizye zyosi zizyo nivuye kwa Tata wane.

¹⁶ Mute mwemwe mukansala awe, loli nene inkabasala amwe. Po inkabasala nukubimika ukuti mubuke nukupa ivikomwa inyinji, ivikomwa zizyo zikwiza pakubangako bwila. Sona Utata akwiza pakubapa chosi chicho mukulabila mwitabwa lyane.

¹⁷ Po ili lyo lilamulo lyane: Mughananaye.

Ulubengo ulwa pachisu ichapasi

¹⁸ “Nanti abantu aba muchisu ichapasi bakubabenga, po mukumbukaye ukuti bakanda pakumbenga ane, bo bachili pakubabenga amwe.

¹⁹ Nanti mukabanga mwe bantu aba muchisu ichapasi, po ngali bantu aba muchisu ichapasi babaghanite amwe pakuti muli poka nabo. Loli inkabasala amwe pakasi pa bantu aba muchisu ichapasi, po mute sona bantu aba muchisu ichapasi. Ichi cho chifukwa bantu aba muchisu ichapasi bakubabenga.

²⁰ Kumbuka zizyo inkababuzya ukuti, ‘Uwambombo ate wapamwanya ukumuchila u mwene wache, awe.’ Nanti abantu bakanvwima ane, bakwiza pakubavwima namwe bulo. Nanti bakivwila ubumanyisi bwane, bakwiza pakwivwila nu bumanyisi bwinyu bulo.

²¹ Bakwiza pakubabombela zyosi zinizi pachifukwa icha mwe bane pakuti batakumanya yuyo akantuma.

²² Nanti ntakizagha nukunena nabo, ngali bate ni mbibi nayimoyimo. Loli ilelo patalipo na pabukanilo ubwa mbibi zyabo.

²³ Umuntu wesi yuyo ambengite, amubengite nu Tata wane bulo.

²⁴ Nanti ntakabombaghamo mumwabo imbombo zizyo nayumo umuntu yuyo akazibombamo nalumo, po ngali bate ni mbibi. Napapo ilelo bennya ivintu vivyo nabomba, loli bakwendelela pakumbenga ane nu Tata wane.

²⁵ Loli ichi chikabombiwa ukuti amazyu ghabo ghasimbiwe mu Ndaghilo zyabo ghakwanilisiwe ukuti, ‘Bakambenga pabusita chifukwa nachimochimo.’

²⁶ “Umwavwilizi akwiza, u Muzimu Umuzelu, yuyo akuvumbula ubwanaloli ubwa Chala, sona yuyo akufuma kwa Tata. Inkwiza pakubatumila ukufuma kwa Tata, po akwiza pakusimikizya nizya ane.

²⁷ Sona namwe bulo mukwiza pakusimikizya nizya ane pakuti mukabanga nane ukwandila ko kubwandilo.”