Yohani 12 - Ulufingo Ulupya

Umukolo akumupakazya u Yesu amafuta mu Betaniya

¹ Bo ghasyala amasiku sikisi ukuti Ulusekelo ulwa Pasa lubombiwe, u Yesu akabuka kukaya aka Betaniya kunyumba iya Lazalo, yuyo u Yesu akamuzyusya kubufwe.

² Bakamupiyila ichakulya icha pachamabwila, u Malita we yuyo akababombelagha. Wepe u Lazalo akaba weka uwa bantu babo bakalyanga poka nu Yesu.

³ Po u Maliya akasenda ibotolo ilya mafuta aghakununkila nkani agha nalidi umwenecho. Akabombezya pakasi na pakasi agha mafuta ghala nukukupulila munyayo izya Yesu, akazipuputa ni sisi zyache. Munyumba mosi mukizula nu munusi umwiza nkani.

⁴ Loli u Yudasi Sikaliyoti, umumanyili weka uwa Yesu, yuyo pisinda pache akamubika u Yesu munyobe izya balwani akati,

⁵ “Nkimba choni chicho amafuta agha ghatakaghuliziwa ni salabazya 300 nukubapazyo abapina?”

⁶ Akanena zinizi chite chifukwa ichakuti akabapazikizyanga abapina, loli pachifukwa chakuti akaba mwiba. Akasungagha inyambi iya ndalama nukwibamo.

⁷ Loli u Yesu akati, “Muleke! Muleke aghasunge amafuta ghanagha mupaka pisiku lilyo inkwiza pakusyiliwa.

⁸ Pakuti akabalilo kosi muli nabo abapina. Loli mute mubanje nane akabalilo kosi.”

Aba Yuda bakubatika pakumughogha u Lazalo

⁹ Bo ichilundilo icha bantu chivwa ukuti u Yesu akaba mu Betaniya, bakabuka kulakula, batakabukako pachifukwa icha Yesu mwene, loli ukuti bamwennye u Lazalo, yuyo u Yesu akamuzyusya kubufwe.

¹⁰ Po abaputi abasongo bakabatika pakumughogha nu Lazalo bulo,

¹¹ pachifukwa icha yuyo, aba Yuda abinji bakepukako kukwabo nukumusubila u Yesu.

U Yesu akwinjila mu Yelusalemu nu bupoti

¹² Ilyandabi, ichilundilo icha bantu babo bakiza ku Ulusekelo ulwa Pasa, bakivwa ukuti u Yesu akwiza mu Yelusalemu.

¹³ Po bakasenda isamba izya mabale nukubuka pakumupokela. Bakakolomoka bakati, “U Chala apaliwanje! Musayiwa yuyo akwizila mwitabwa ilya Mwene! U Chala amusaye u Mwene uwa ba Izilayeli!”

¹⁴ U Yesu akayagha impunda inyana nukukwelapo, ukuyana na Masimbo aghakuti,

¹⁵ “Wee akaya akakulu nkani aka Ziyoni, utakanyilaye. Ennya, umwene wako akwiza, bo akwelite pampunda inyana.”

¹⁶ Pakwanda abamanyili bache batakazyivwisya zinizi, loli bo u Yesu azyuka nukupeghiwa ubuchindamu, bakakumbuka ukuti Amasimbo ghakanenela zila nizya yuyo nukuti we yuyo bakamubombela zinizi.

¹⁷ Ichilundilo icha bantu babo bakaba poka nu Yesu bo amuzyusya u Lazalo pakumwitizya mwipumpa, bakanenagha zizyo zikabombiwa.

¹⁸ Cho chifukwa ichilundilo icha bantu chikabuka pakumupokela pakuti bakivwa ukuti akabomba ichimanyilo ichi.

¹⁹ Po aba Falisayi bakanenezannya benebene bakati, “Mukwennya, panapa tutakukabapo nachimo chimo. Ennya, ichisu chosi ichapasi chikumukonka.”

Aba Giliki bamo bakulonda pakumwennya u Yesu

²⁰ Bakabamo bamo aba Giliki pakasi pa bantu babo bakabuka mu Yelusalemu pakumuchindika u Chala pakabalilo aka lusekelo.

²¹ Bakabuka kwa Filipu uwa mukaya aka Betisayida muchigaba icha Galileya nukumulaba ukuti, “Mwene, tukulonda tumwennye u Yesu.”

²² U Filipu akabuka nukumubuzya u Andeleya, po abantu babili aba bakabuka nukumubuzya u Yesu.

²³ U Yesu akabamula akati, “Akabalilo kakwana ukuti u Mwana uwa Muntu apokele ubuchindamu ubukulu.

²⁴ Naloli inkubabuzya ukuti nanti imbeyu iya ngano yitakuwa pitope nukufwa, po yikuba yo yilayila bulo. Loli nanti yikufwa, po yikwela ivikomwa inyinji nkani.

²⁵ Umuntu yuyo abughanite ubumi bwache, akwiza pakubutagha, sona yuyo abubengite ubumi bwache muchisu ichapasi, akwiza pakubusungilila, umwakuti abanje nubumi ubwa bwila na bwila.

²⁶ Umuntu wesi yuyo akulonda pakumbombela, ankonkaye, umwakuti kuko indiko, ko kuko nu mubombi wane bulo abanjeko. U Tata wane akwiza pakumuchindika umuntu wesi yuyo akumbombela.

U Yesu akunena nizya bufwe bwache

²⁷ “Losi ulu umoyo wane wayimba nkani. Po, nkimba ninganena ichoni? Intinji, ‘Tata, utakitikizye ukuti akabalilo aka kangwile?’ Awe, loli ichi cho chifukwa niziye ukuti nendemo pakabalilo aka ntamyo aka.

²⁸ Tata, chindika itabwa lwako!” Po izyu likivwika kumwanya likati, “Nalichindika kale, po inkwiza pakulichindika sona.”

²⁹ Ichilundilo icha bantu chicho chikimilila pala, chikivwa izyu, po bamo bakati ukupaya kwa vula, abanji bakati, “Uwantumi uwa kumwanya akanena nawe!”

³⁰ U Yesu akabamula akati, “Izyu ili litakivwika pachifukwa icha nene, loli likivwika pachifukwa icha mwemwe.

³¹ Losi ulu ko kabalilo akakulongiwa kwa chisu ichapasi. Losi ulu u Satana, umulaghili uwa chisu ichapasi akwiza pakusumbiwa kuzi.

³² Loli ane, bo napayikiwa, inkwiza pakubawesela bosi kukwane.”

³³ Akanena amazyu ghanagha ukubalanjizya namumo akwiza pakufwila.

³⁴ Ichilundilo icha bantu chikamwamula chikati, “Indaghilo zyitu zikutubuzya ukuti u Kilisitu akwiza pakubangako bwila na bwila. Po, nkimba ukunena buli-buli ukuti u Mwana uwa Muntu abaghiye pakupayikiwa? U Mwana uwa Muntu yunuyu we wenu?”

³⁵ U Yesu akabamula akati, “Ulukozyo lukwiza pakuba namwe pakabalilo akanandi bulo. Endelela pakubomba bunubu, bo ulukozyo luchili pakasi papinyu, umwakuti ichisi chitakabaghe. Pakuti umuntu yuyo akwenda muchisi atakumanya kuko akubuka.

³⁶ Bo ulukozyo luchili luli pakasi papinyu, mulusubile ulukozyo lulalula, umwakuti mubanje bantu bakwenda mu lukozyo.” Bo u Yesu amala pakunena zinizi, akepukapo nukuvwama.

Aba Yuda bakukana pakumusubila u Yesu

³⁷ Napapo u Yesu akabomba ivimanyilo vyosi vinivi pamaso papabo, pope bulo batakamusubila,

³⁸ umwakuti zizyo umulaghuzi u Yesaya akanena zikakwanilisiwa ukuti, “Mwene, we wenu akasubila amazyu ghagho tukalumbililagha? We wenu yuyo amaka agha Mwene ghakavumbuliwa kukwache?”

³⁹ Pachifukwa ichi bakapotwa pakumusubila pakuti u Yesaya akanena akati,

⁴⁰ “U Chala ighalila amaso ghabo, nukukazya inyinong'ono zyabo, umwakuti amaso ghabo ghaleke pakwennya, ni nyinong'ono zyabo zileke pakwivwisya, nukuti baleke pakupindukila kukwane ukuti imbapozye.”

⁴¹ U Yesaya akanena ichi pachifukwa chakuti akabwennya ubuchindamu ubwa Yesu nukunena nizya yuyo.

⁴² Napapo abalaghili abinji aba Chiyuda bakamusubila u Yesu, loli batakitika pabuzelu pachifukwa chakuti bakanyilagha aba Falisayi ukuti bangabepuzya munyumba iyakwiputilamo.

⁴³ Bakighana nkani pakupaliwa na bantu ukuchila pakupaliwa nu Chala.

Amazyu agha Yesu ghakwiza pakubalonga abantu

⁴⁴ U Yesu akanena na mazyu agha pamwanya akati, “Umuntu wesi yuyo akunsubila, atakunsubila ne mwene, loli akumusubila na wepe bulo yuyo akantuma.

⁴⁵ Umuntu wesi yuyo akunyennya, atakunyennya ne mwene, loli akumwennya na wepe bulo yuyo akantuma.

⁴⁶ Ane nizite muchisu ichapasi ngati lo lukozyo, umwakuti umuntu wesi yuyo akunsubila atakikalaye muchisi.

⁴⁷ Nanti umuntu akwivwa amazyu ghane loli atakughivwila, ntakwiza pakumulongapo. Pakuti intizite muchisu ichapasi pakulonga abantu, loli pakubapoka.

⁴⁸ Umuntu wesi yuyo akunkana, sona atakupokela amazyu ghane, alipo weka yuyo akwiza pakumulonga. Amazyu ghagho nanena gho ghagho ghakwiza pakumulonga pisiku ilyabumalilo.

⁴⁹ Pakuti ntakunena nu bulaghili ubwane nu bwane, loli Utata yuyo akantuma andamuye izyakunena, sona ukuti imbabuzye abantu.

⁵⁰ Inzimenye ukuti zizyo akundamula zikupa ubumi ubwa bwila na bwila. Polelo zizyo inkuzinena zyo zizyo Utata akambuzya ukuti inzinene.”