Yohani 10 - Ulufingo Ulupya

Ichili icha mudimi uwa ng'ozi

¹ U Yesu akati, “Naloli inkubabuzya ukuti umuntu wesi yuyo atakwendela pamulyango uwa chibagha icha ng'ozi, loli akupankula palubazu, yunuyu mwiba, sona livyondongo.

² Loli umuntu yuyo akwinjila pamulyango, yunuyu we mudimi uwa ng'ozi zila.

³ Umulindilili akumwighulila umulyango uwa chibagha chila. Ing'ozi zikwivwa izyu lyache bo akuzyitizya na matabwa ghabo nukuzifumizya kuzi.

⁴ Bo azifumya zyosi kuzi, umwene akulongolela kuntazi, izyene ing'ozi zikumukonka mwisinda pakuti zilimenye izyu lyache.

⁵ Zitakwiza pakumukonkapo nalumolumo umuntu uyunji bulo, loli zikumuchimbila pakuti zitizubizanizye nizyu lyache.”

⁶ U Yesu akababuzya ichili chinichi, loli abene bakapotwa pakuzyaghannya zizyo akababuzyanga.

U Yesu we Mudimi Umwiza

⁷ U Yesu akababuzya sona akati, “Naloli inkubabuzya ukuti ane ne mulyango uwa chibagha icha ng'ozi.

⁸ Bosi babo bakiza bo ane inchili pakwiza, biba, sona mavyondongo, loli ing'ozi zitakabivwila.

⁹ Ane ne mulyango. Umuntu wesi yuyo akwinjilila mumwane akwiza pakupokiwa. Akwiza pakwinjila nukufuma, po akwiza pakuchagha ichakulya.

¹⁰ Umwiba akwiza pakwiba, pakughogha nu kunangannya bulo. Ane nizite ukuti mubanje nubumi, ubumi ubwakufikapo.

¹¹ “Ane ne mudimi umwiza. Umudimi umwiza ipiye mwene pakubutagha ubumi bwache pachifukwa icha ng'ozi zyache.

¹² Umudimi uwaganyu bulo, yuyo ate mudimi, sona yuyo ing'ozi zite zyache, nanti akuyennya impumpi yikwiza, akuzileka ing'ozi nukuchimbila, po impumpi yikulemapo ing'ozi zila nukuzinyampannya.

¹³ Umwene akuchimbila pakuti waganyu bulo, atakuzibikilako umoyo ing'ozi zila.

¹⁴ Ane ne Mudimi umwiza. Inzimenye ing'ozi zyane, sona zyope ing'ozi zyane zimenye

¹⁵ ukuyana bulo na mumo Utata amanyiye, sona nane imumenye Utata, inkubutagha ubumi bwane pachifukwa icha ng'ozi zila.

¹⁶ Indi ni ng'ozi izinji zizyo zite izya muchibagha ichi. Zyope bulo imbaghiye pakuzisenda. Zikwiza pakwivwa izyu lyane, po zikwiza pakuba mudimo ghoka nu mudimi weka.

¹⁷ “Utata anganite pachifukwa chakuti niyipiye pakubutagha ubumi, umwakuti nize imbupokele sona.

¹⁸ Ataliko nayumo umuntu yuyo anganfyula ubumi bwane. Loli inkubutagha ukuyana nu bwighane ubwane nu bwane. Indi nu bulaghili pakubutagha, sona indi na maka pakubusenda sona. Ichi cho chicho Utata wane akandamula ukuti imbombe.”

¹⁹ Aba Yuda bakanda sona pakugabinkana benebene pachifukwa icha mazyu ghanagha.

²⁰ Abinji bakanena bakati, “Ali nu muzimu umubibi, sona apenite. Choni chicho mukumuteghelezya?”

²¹ Loli abanji bakati, “Umuntu yuyo ali nu muzimu umubibi atanganena bunubu! Nkimba umuzimu umubibi ghungighula amaso agha bantu abafwamaso?”

Aba Yuda bakumukana u Yesu

²² Mu Yelusalemu mukaba Ulusekelo ulwa Kuyisaya Inyumba iya Chala. Aka kakaba kabalilo aka lupepo.

²³ U Yesu akendendekagha bulo pantanda iya Nyumba iya Chala, yiyo yikwitiziwa ukuti yo Ntanda iya Solomoni.

²⁴ Aba Yuda bakamuzyungulila nukumulalusya ukuti, “Nkimba ukwiza pakwendelela pakutuswighizya mupaka liyi? Utubuzye pabuzelu nanti naloli we Kilisitu.”

²⁵ U Yesu akabamula akati, “Imbabuzizye kale loli mutakusubila. Imbombo zizyo inkubombela ubulaghili ubwa Tata wane, zyo zizyo zikunsimikizya,

²⁶ loli mutakusubila pakuti mute mwe ng'ozi zyane.

²⁷ Ing'ozi zyane zikwivwa izyu lyane, po nane inzimenye, sona zikunkonka.

²⁸ Inkuzipa ubumi ubwa bwila na bwila, sona zitakwiza pakufwapo nalumolumo. Nayumo umuntu yuyo angazifyula munyobe zyane.

²⁹ Utata yuyo ampiye ing'ozi mukulu nkani ukuchila vyosi, ataliko nayumo umuntu yuyo angazifyula munyobe izya Tata wane.

³⁰ Utata nane tuli weka.”

³¹ Po aba Yuda bakaseba sona amabwe ukuti bamusumbe nagho.

³² U Yesu akababuzya akati, “Nabomba imbombo inyinji inyiza, zizyo Utata akantuma pakubomba. Nkimba mbombo yoni yiyo mukulonda pakunsumbila na mabwe?”

³³ Abene bakamula bakati, “Tutakulonda pakukusumba na mabwe pachifukwa icha mbombo inyiza, loli pachifukwa icha kumusamula u Chala. Awe we umuntu bulo, loli ukwipela wemwene pakuba we Chala!”

³⁴ U Yesu akabamula akati, “Chisimbiwe mu Ndaghilo zyinyu ukuti u Chala akati, ‘Amwe mwe bachala.’

³⁵ Tuzimenye ukuti zizyo Amasimbo ghakuti zyanaloli bwila na bwila, sona u Chala akabita abantu bala ukuti bachala, ku bantu babo amazyu ghakaneniwangako.

³⁶ Ane, u Chala akansala nukuntuma muchisu ichapasi. Po nkimba munganena buli-buli ukuti inkumusamula u Chala bo inkanena ukuti ne Mwana uwa Chala?

³⁷ Mutakansubilaye nanti ntakuzibomba zizyo Utata wane akulonda ukuti imbombe.

³⁸ Loli nanti mutakunsubila, musubile bulo imbombo zizyo nkubomba, umwakuti mumanye ukusita ukwilamwa ukuti Utata ali mumwane, sona nane indi mwa Tata.”

³⁹ Abene bakayezya sona pakumulema u Yesu, loli akafyuntumuka munyobe zyabo.

⁴⁰ U Yesu akanyokela sona kwisila kwa lusoko ulwa Yolodani, kuko u Yohani Uwalozyo akozyanga pakwanda, po akikala kulakula.

⁴¹ Abantu abinji bakiza kukwache nukuti, “U Yohani atakabomba nachimo ichika, loli zyosi zizyo akanena izya muntu yunuyu zikaba zyanaloli.”

⁴² Po abantu abinji kulakula bakamusubila.