Ubuvumbuli 5 - Ulufingo Ulupya

U Mwana uwa ng'ozi akwighula ibuku innyenge

¹ Nkennya ibuku innyenge munyobe indilo iya yuyo akwikala pachitengo icha bumwene. Ibuku lila likaba nu busimbe kumbazu zyosi zibili, sona likamatiwa ni vimatilo seveni.

² Inkennya sona uwantumi uwamaka, ukulalusya umwakukolomoka ukuti, “Nkimba we wenu abaghiye pakwighula ibuku ilyakunnyengiwa nukumamatula ivimatilo?”

³ Loli atakabapo nayumo umuntu kumwanya pamo pachisu ichapasi, pamo kusi kuchisu yuyo angighula ibuku innyenge lila nukwennya mukasi.

⁴ Po nkalila nkani pachifukwa chakuti patakaghiwapo nayumo umuntu yuyo akabaghila pakwighula ibuku innyenge lila pamo ukwennyamo mukasi.

⁵ Po weka uwa basongo bala akambuzya akati, “Utakalilaye, pakuti Inkalamu iya luko ulwa Yuda, uwaluko uwamaka uwa Devedi apota, sona we yuyo angighula ibuku innyenge lila nukumamatula ivimatilo seveni vila.”

⁶ Po inkennya u Mwana uwa ng'ozi pakasi pachitengo icha bumwene, azyunguliliwe ni vipeliwa ivyabumi folo na basongo 24. U Mwana uwa ng'ozi akabonekagha ngati aboliwe. Akaba ni mpembe seveni na maso seveni vivyo yo Mizimu seveni iya Chala, yiyo yitumiwe muchisu chosi ichapasi.

⁷ U Mwana uwa ng'ozi akabuka nukusenda ibuku innyenge, lilyo likaba munyobe indilo iya yuyo akwikala pachitengo icha bumwene.

⁸ Bo apokela ibuku lila, ivipeliwa ivyabumi folo vila na basongo 24 bala bakawa pasi pamaso pa Mwana uwa ng'ozi. Wesi akalema ipango, ni mbako izya golide zyizuye nu twakufukizya utwakununkila, zizyo nyiputo izya bantu abazelu aba Chala.

⁹ Bakimbagha ulwimbo ulupya bakatinji, “Awe ubaghiye pakusenda ibuku ilyakunnyengiwa nukumamatula ivimatilo vyache. Pakuti ukaboliwa, sona ni banda lyako, ukamughulila u Chala abantu abaluko losi, na baneno zyosi, sona ninko zyosi izya bantu.

¹⁰ Ukabapela pakuba luko ulwa bumwene, nukuba baputi pakumubombela u Chala witu, bakwiza pakulaghila ichisu chapasi.”

¹¹ Inkenelezya sona nukwivwa izyu ilya bantumi aba kumwanya, abasita ukubelengiwa. Bakimilila umwakuzyungulila ichitengo icha bumwene chila ni vipeliwa ivyabumi folo, sona na basongo bala.

¹² Bakimba umwakukolomoka bakati, “U Mwana uwa ng'ozi yuyo akaboliwa apokelaye ubulaghili, nu bukabi, na mahala, na maka, nu muchizi, nu buchindamu, sona na mapalo!”

¹³ Po nkivwa ivya bumi ivya kumwanya, nivya muchisu ichapasi, nivya kusi kuchisu, nivya munyanja, sona ni vipeliwa vyosi ivya bumi vikwimba vikuti, “Uwakwikala pachitengo icha bumwene nu Mwana uwa ng'ozi, apokele amapalo nu buchindamu, sona na maka bwila na bwila!”

¹⁴ Ivyabumi folo vila vikamula vikati, “Ameni!” Po abasongo bala bakawa pasi nukumuchindika u Chala nu Mwana uwa ng'ozi.