Ubuvumbuli 4 - Ulufingo Ulupya

Nizya kwiputa kumwanya

¹ Pisinda pache inkennya ichisetuka nukulwennya ulwiyi lwighuke kumwanya. Sona izyu itazi lila lilyo nkivwa likaba ngati lyo lipati likati, “Zagha kumwanya kuno, inkwiza pakukulanjizya ivintu vivyo vikwiza pakubombiwa pisinda pavinivi.”

² Panapo na panapo u Muzimu Umuzelu akanyizila. Inkennya Ichitengo icha bumwene kumwanya, chicho akikalaghapo yumo.

³ Uwakwikala pachitengo yula akaba na kabonekele akakunyezimila ngati lyo libwe ilya yasipi, nilya kalineliya. Ukuzyungulila mulubazu ulwa Chitengo icha bumwene chila mukaba umupingo-pingo uwa vula ghugho akabonekela kache kakanyezimilagha ngati lyo libwe ilya emeladi.

⁴ Ichitengo icha bumwene chila chikazyunguliliwa ni vitengo ivinji 24, sona babo bakikalagha pa vitengo vila bakaba abasongo 24. Bakavwala amenda amaswepu ni mpumpu izya golide kumitu yabo.

⁵ Mu chitengo icha bumwene mukafumagha utumesya, ichongo nu kujilimizya kwa vula. Pantazi pa chitengo icha Bumwene mukakagha ivikoka ivya moto seveni, vivyo yo Mizimu seveni iya Chala.

⁶ Pantazi pa Chitengo icha bumwene pakaboneka ulubinjilo lulo lukaba ngati yo nyanja iya galasi, yiyo yikanyezimilagha ngati lyo libwe ilya kilisitali. Pakasi-kasi, ukuzyungulila ichitengo icha bumwene, kulubazu losi pakaba ivipeliwa ivyabumi folo. Vikaba na maso kosi na kosi, kuntazi na kwisinda bulo.

⁷ Ichabumi ichakwanda chikabonekagha ngati yo nkalamu, ichabubili chikabonekagha ngati yo nkambaku, ichabutatu chikaba ni cheni icha muntu, sona icha folo chikabonekagha ngati lyo lizwanga lilyo likupululuka.

⁸ Ichipeliwa ichabumi chosi chikaba ni vipapande sikisi. Ivipapande vila vikaba na maso posi na posi, mukasi na kuzi bulo. Pamusanya na pabusiku vitakutuzyapo pakwimba ukuti, “Muzelu, muzelu, muzelu u Mwene u Chala Uwamaka Ghosi. Wewe ukabako kale, wewe uliko ilelo, wewe ukwiza pakubangako bwila na bwila.”

⁹ Ivipeliwa ivyabumi folo vila vikwimbagha inyimbo izya buchindamu nu muchizi nukumupalizya yuyo ikaye pa chitengo icha bumwene, sona yuyo mumi bwila na bwila. Bo vikwimba bunubu,

¹⁰ abasongo 24 bala bakuwa pamaso pa yuyo akwikala pachitengo icha bumwene nukumuchindika, yuyo mumi bwila na bwila. Bakusumbila pasi impumpu zyabo pantazi pachitengo icha Bumwene nukuti,

¹¹ “Wee, Mwene u Chala witu, pokela ubuchindamu, nu muchizi na maka. Pakuti wewe ukapela ivintu vyosi; mubwighane bwako vikapeliwa nukuba nubumi.”