Ubuvumbuli 21 - Ulufingo Ulupya

Nizya kumwanya ukupya ni chisu ichapasi

¹ Pisinda pache inkennya kumwanya ukupya ni chisu ichapasi. Kumwanya ukwakwanda ni chisu ichapasi ichakwanda vikazyebeluka, sona ni nyanja yope yikazimila.

² Nkennya Akaya Akakulu nkani Akazelu, u Yelusalemu umupya kakwika kumwanya kwa Chala, bo kiyanizye ukuyana nu mukolo yuyo avwalite amenda amiza ukuti akomane nu mulume.

³ Nkivwa izyu ilya pamwanya likuchibuzya ichitengo icha bumwene likuti, “Losi ulu akaya aka Chala kali pakasi pa bantu! Akwiza pakwikala pakasi papabo, sona abene bakwiza pakuba bantu bache. U Chala umwene akwiza pakuba nabo, sona akwiza pakuba we Chala wabo.

⁴ Akwiza pakusyumula amasozi ghosi mumaso ghabo. Ubufwe butakwiza pakubako nalumo, sona kutakwiza pakubako ivitima pamo ukulila pamo ububavu. Ivintu ivyakale vyazyebeluka.”

⁵ Panapo uwakwikala pachitengo icha bumwene yula akati, “Losi ulu nkwandula ivintu vyosi pakuba vipya!” Akanena sona kukwane akati, “Simba ivi, pakuti amazyu ghanagha ghanaloli, sona masubiliwa.”

⁶ Akambuzya akati, “Kwamala. Ane ne Alefa nu Omega. Ane ne Bwandilo nu Bumalilo. Umuntu wesi yuyo ali ni nyota, inkwiza pakumupa amizi agha pabulo aghakufuma pambwibwi iyabumi.

⁷ Abantu bosi babo bapota bakwiza pakupokela ivintu vinivi. Ane inkwiza pakuba ne Chala wabo, bope bakwiza pakuba bana bane.

⁸ Loli abantu abogha, na bantu abasita ukusubiliwa, na babo bakubomba ivintu ivinyazu, na baghoghi, na bamalaya, na bamayele, na bakwiputa ivifwani, sona na bantu bosi abamyasi, ubuzilo bwabo yo nyanja iya moto uwa sulufule. Ubu bo bufwe bwabo ubwabubili.”

U Yelusalemu Umupya

⁹ Pisinda pache weka uwa bantumi seveni bala yuyo akaba ni mbako seveni inyizule ni viwaya seveni ivya bumalilo, akambuzya akati, “Zagha, inkwiza pakukulanjizya umukolo yuyo akusendwa, umuchi uwa Mwana uwa ng'ozi.”

¹⁰ Po u Muzimu Umuzelu akansendela pighamba ikulu, sona itali nkani. Akandanjizya u Yelusalemu, akaya akakulu nkani akazelu, kako kakwika kumwanya kwa Chala.

¹¹ Kakalamagha nu buchindamu ubwa Chala. Ukulama kwache kukaba ngati lyo libwe ilyamutengo nkani, ngati lyo libwe iswepu, lilyo likaba swee ngati lyo ligalasi.

¹² Akaya akakulu nkani kalakala kakaba nu lupaso ulutali nkani ni milyango 12, sona abantumi 12 bakenelezyanga mu milyango yosi yila. Mu milyango mula mukasimbiwamo amatabwa agha inko 12 izya ba Izilayeli.

¹³ Kunkuto zyosi folo kukaba imilyango mitatu-mitatu: Mitatu yikaba kubufumilo ubwizuba, mitatu yikaba kuntende, mitatu yikaba kumitu, sona iyamwabo mitatu yikaba kubwinjililo ubwizuba.

¹⁴ Ulupaso ulwa kaya kanaka lukazengiwa palwalo ulwa mabwe 12, papo pakasimbiwapo amatabwa 12 agha batumiwa aba Mwana uwa ng'ozi.

¹⁵ Po uwantumi yuyo akanena nane akaba ni ndisa iya golide ukuti apimile akaya kala, ni milyango yache, sona nu lupaso lwache.

¹⁶ Imbazu zyosi izya kaya akakulu nkani kala zikayanagha bulo, munkuto na mubutali. Po uwantumi yula akapima akaya akakulu nkani kala ni ndisa yache iya golide nukwagha ukuti kakaba amamita 2,200 mubutali, na munkuto, sona na mumwanya.

¹⁷ Uwantumi yula akapima sona ulupaso, nukwagha ukuti mumwanya kakaba na mamita 60. Akabombezya ichipimilo chicho abantu bakabombezyanga.

¹⁸ Ulupaso lula lukazengiwa na mabwe agha yasipi, sona akaya akakulu nkani akenecho kakazengiwa nu golide umwenecho, yuyo akaba swee ngati lyo ligalasi.

¹⁹ Ulwalo ulwa lupaso ulwa kaya akakulu nkani lukayaniziwa na mabwe aghamutengo aghakulekanalekana. Ulwalo ulwakwanda lukaba ulwa libwe ilya yasipi, ulwabubili lukaba ulwa libwe ilya sapili, ulwabutatu lukaba ulwa libwe ilya kalikidoni, ulwafolo lukaba ulwa libwe ilya emeladi

²⁰ ulwafayivi lukaba ulwa libwe ilya onike, ulwasikisi lukaba ulwa libwe ilya kalineliya, ulwaseveni lukaba ulwa libwe ilya kilisitolite, ulwa eyiti lukaba ulwa libwe ilya belili, ulwa nayini lukaba ulwa libwe ilya topazi, ulwa 10 lukaba ulwa libwe ilya kilisopulasi, ulwa 11 lukaba ulwa libwe ilya yakinti, sona ulwa 12 lukaba ulwa libwe ilya ametesiti.

²¹ Imilyango 12 yila yikaba iya mambo aghamutengo. Umulyango ghosi ghukapangiwa nu bwambo boka. Umusebo uwa mukaya akakulu nkani kala ghukaba uwa golide umwenecho yuyo akalangasilagha ngati lyo ligalasi.

²² Intakayennyamo ni Nyumba iya Chala mukaya kala pakuti Inyumba iya Chala we Mwene u Chala Uwamaka Ghosi nu Mwana uwa ng'ozi.

²³ Izuba pamo umwezi vitakulondiwa nukuti vilamaye mukaya akakulu nkani kanaka pakuti ubuchindamu ubwa Chala bukulamilamo, sona ulukozyo lwache we Mwana uwa ng'ozi.

²⁴ Abantu aba inko zyosi bakwiza pakwenda mu lukozyo lwache, po abamwene aba muchisu ichapasi bakwiza pakwiza nu bukabi bwabo mukaya kanaka.

²⁵ Imilyango iya kaya akakulu nkani kanaka yikwiza pakuba myighuke isiku lyosi ipuma, sona yite yikighaliliwepo nalumolumo pakuti kute kukabeko sona ubusiku.

²⁶ Ubuchindamu nu bukabi ubwa bantu aba inko zyosi bukwiza pakwinjiziwa mukaya kanaka.

²⁷ Loli mute mukinjilemo nachimochimo ichintu chicho chinyazu, pamo umuntu wesi yuyo akubomba imbombo izya kukozya isoni pamo umumyasi. Abantu bene babo amatabwa ghabo ghasimbiwe mwibuku ilya bumi ilya Mwana uwa ng'ozi, bo babo bakwiza pakwinjilaghamo.