Ubuvumbuli 19 - Ulufingo Ulupya

¹ Pisinda pazinizi nkivwa ukubuluma ngati kwa chilundilo icha bantu kumwanya kukuti, “U Chala apaliwanje! Ubupoki, nu buchindamu na maka vya Chala witu!

² Ubulongi bwache bugholosu sona bwanaloli! U Chala amulonga umukolo umalaya yuyo akachinangannya ichisu chapasi nu bwamalaya bwache. Amufunda pachifukwa chakuti akaghogha ababombi bache.”

³ Bakakolomoka sona nkani bakati, “U Chala apaliwanje! Ilyosi ilya moto ghugho ghukukalungulizya akaya akakulu nkani kala likufukila mumwanya bwila na bwila!”

⁴ Abasongo 24 ni vipeliwa ivyabumi folo vikawa pasi nukumuchindika u Chala, yuyo akikala pachitengo icha bumwene bakati, “Ameni! U Chala apaliwanje!”

Nizya lusekelo ulwa sendwa iya Mwana uwa ng'ozi

⁵ Pisinda pache nkivwa izyu ku chitengo icha bumwene likuti, “Mumupalaye u Chala witu, amwe mwe babombi bache mwebosi, amwe mwe mukumuchindika, amwe mwe basongo-songo namwe bana abanandi!”

⁶ Po inkivwa ichongo chicho chikivwika ngati cho chilundilo icha bantu, ngati kupoma kwa mizi, sona ngati kujilimizya kwa vula. Izyu lila likati, “U Chala apaliwanje! Pakuti u Mwene, u Chala witu, Uwamaka Ghosi, we Mwene!

⁷ Zagha tuhobokaye nukusekela, zagha tumuchindikaye u Chala! Pakuti akabalilo aka lusekelo ulwa sendwa iya Mwana uwa ng'ozi kakwana, sona yuyo akusendwa iyanizye kale nizya sendwa yiniyi.

⁸ Yuyo akusendwa apeghiwe amenda amaswepu, sona ghagho ghasoniwe akiza ukuti avwalaye.” (Amenda amaswepu ghakwimilila imbombo inyiza izya bantu abazelu aba Chala.)

⁹ Palapala uwantumi yula akambuzya akati, “Simba uti, ‘Basayiwa abantu babo bitiziwe kulusekelo ulwa sendwa iya Mwana uwa ng'ozi!’ ” Uwantumi yula akonjelezya sona pakunena ukuti, “Agha gho mazyu aghanaloli agha Chala.”

¹⁰ Panapa nkawa munyayo zyache ukuti imuchindike. Loli akambuzya akati, “Utakazibombaye zinizi! Ane ne wambombo bulo ngati wewe, sona ngati bo bawamwinyu babo bakaboni aba Yesu. Mumuchindikaye u Chala! Pakuti ubwanaloli ubwa bulaghuzi lo lusimikizyo nizya Yesu.”

Nizya yuyo akukwela pa falasi inswepu

¹¹ Pisinda pache inkennya kumwanya kwighukite, po inkennya ifalasi inswepu. Uwakukwelapo akaba we Musubiliwa sona Wanaloli. Akulonga nukulwa inkondo zyache mu bwanaloli.

¹² Amaso ghache ghakaba chee ngati zyo ndimi izya moto, sona akavwala impumpu inyinji nkani kumutu wache. Akasimbiwa itabwa papache, lilyo nayumo umuntu yuyo akalimanyagha, loli mwene bulo.

¹³ Inkazo yiyo akavwala yikazubikiwa mwibanda. Yunuyu itabwa lyache we Mazyu agha Chala.

¹⁴ Abasikali aba kumwanya bakamukonka yuyo akakwela pa falasi inswepu, bo bavwalite amenda amaswepu, sona amatonte.

¹⁵ Mu mulomo wache mukafuma upanga yuyo akwete nkani, uwakupotela abantu aba inko izyakulekanalekana. Akwiza pakubalaghila ni ndisa yache iya chela, sona akwiza pakukanyannya amampesya mu chiliba ichakukanyilamo amampesya icha bukali ubwa Chala Uwamaka Ghosi.

¹⁶ Pa nkazo yache sona na pantapatapa pakasimbiwapo itabwa ilyakuti, “Umwene uwa bamwene, sona Umulaghili uwa balaghili.”

¹⁷ Po inkamwennya uwantumi imiliye pizuba. Akakolomoka nkani nukuvibuzya iviyuni vyosi vivyo vikabulukagha mumwanya-mwanya akati, “Zagha, mubungane poka pa lusekelo ulukulu nkani ulwa Chala!

¹⁸ Zagha, mulye amabili agha bamwene, nagha basongo abankondo, nagha basilikali, nagha falasi, nagha bakukwelapo, nagha bantu bosi, abazya na bantu abasatuke, abasongo na banandi bulo!”

¹⁹ Pisinda pache inkennya ichinyamana chila na bamwene aba muchisu ichapasi na basilikali babo bakubungana ukuti balwe inkondo na yuyo akwelite pa falasi, poka na basilikali bache.

²⁰ Loli ichinyamana chikalemiwa poka nu mulaghuzi umumyasi, yuyo akabombagha iviswigho pantazi papache. Ni viswigho vilavila akabazimbula abantu babo bakadindiwa ni chidindo icha chinyamana, sona na bantu babo bakachichindikagha ichifwani icha chinyamana chila. Ichinyamana poka nu mulaghuzi umumyasi yula, bosi babili aba bakasumbiwa bumi munyanja iya moto uwa sulufule.

²¹ Abasikali babo bakaghoghiwa nu panga uwakufuma mu mulomo uwa yuyo akakwela pa falasi. Po iviyuni vyosi vikasong'ompola amabili ghabo mosi mumo vikalondelagha.