Ubuvumbuli 14 - Ulufingo Ulupya

U Mwana uwa ng'ozi na bantu 144,000

¹ Pisinda pache inkenelezya nukwennya u Mwana uwa ng'ozi imite pighamba ilya Ziyoni. Palapala akaba poka na bantu 144,000, babo pa vyeni vyabo pakasimbiwapo itabwa lyache, ni tabwa ilya wise.

² Po nkivwa izyu kumwanya lilyo likivwika ngati kupoma kwa amizi aminji mulusoko, sona ngati kupaya kwa vula. Izyu lila likivwika ngati bo bantu bakulizya amalonji.

³ Abantu 144,000 bala bakimbagha ulwimbo ulupya pantazi pachitengo icha bumwene, na pantazi pa vipeliwa ivyabumi folo, sona na pamaso pa basongo. Atakabapo nayumo umuntu, yuyo akamanyilapo ulwimbo lula, loli abantu 144,000 bene, babo bakapokiwa pakasi pa bantu aba muchisu ichapasi.

⁴ Abantu banaba bo babo batakinyazyapo na bakolo. Abantu banaba bayanite bulo na balindu babo batabamenye nalumo abanavuli. Bakumukonka u Mwana uwa ng'ozi yula kosi kuko akubuka. Abantu banaba bakapokiwa pakasi pa bantu bosi, sona bakaba bakwanda pakubikiwa kwa Chala na kwa Mwana uwa ng'ozi.

⁵ Abantu banaba batatamantitepo nalumolumo, sona bate ni chilema nachimochimo.

Nizya bantumi batatu

⁶ Pisinda pache inkennya uwantumi uyunji akupululuka mumwanya-mwanya nkani, bo anyamuye Amazyu Amiza agha bwila na bwila aghakuti alumbilile pakasi pa bantu bosi aba muchisu ichapasi. Banaba bo bantu abaluko losi, na bantu abavikolo vyosi, na bantu abaneno zyosi.

⁷ Akanena nizyu ilya pamwanya nkani akati, “Mumwiputaye, mumuchindikaye u Chala! Pakuti akabalilo kakwana akakuti abalonge abantu. Mumuchindikaye yuyo akapela kumwanya ni chisu chapasi, ni nyanja, sona ni mbwibwi izya mizi!”

⁸ Po uwantumi uyunji uwabubili akakonkapo nukuti, “Kamala mwee! Kamala mwee! Kamala akaya akakulu nkani aka Babiloni, kako kakang'wesya abantu abaluko losi uvinyo uwa vinyonywa vyache ivya bulowe!”

⁹ Po uwantumi uwabutatu akakonkapo nukunena nizyu ilya pamwanya ukuti, “Umuntu wesi yuyo akuchichindika ichinyamana ni chifwani chache nu kwitika ukuti adindiwe ichidindo chache pacheni pamo panyobe,

¹⁰ wepe akwiza pakung'wela uvinyo uwabukali ubwa Chala. Uvinyo yuyo ate mongannye nachimochimo. Akwiza pakuyiviwa nu moto, sona nu sulufule pamaso pa bantumi abazelu aba Chala, na pamaso pa Mwana uwa ng'ozi.

¹¹ Ilyosi ilya moto ghugho ghukubayivya likukwela kumwanya bwila na bwila. Abantu babo bakachichindikagha ichinyamana ni chifwani chache, sona nukwitika ukuti badindiwe ichidindo icha itabwa lyache batakubwaghapo nalumolumo ubutuzyo umusanya pamo ubusiku.

¹² “Panapa pakulondiwa ukuti abantu abazelu aba Chala babanje bajivu nkani, babo bakukonka amalamulo agha Chala, sona babo bakwendelela pakumusubila u Yesu.”

¹³ Po nkivwa izyu kumwanya likuti, “Simba uti: Basayiwa abantu babo ukwandila pakabalilo aka bakufwila pambombo iya Mwene.” U Muzimu Umuzelu akuti, “Ee momumo! Bakwiza pakutuzya pambombo zyabo inkafu, pakuti imbombo zyabo inyiza zikubakonka.”

Ukwinula kwa chisu ichapasi

¹⁴ Po inkenelezya nukwennya ibingu iswepu. Uwakwikala pibingu lila akabonekagha ngati we Mwana uwa Muntu, yuyo avwalite impumpu iya golide kumutu wache. Munyobe yache akaba ni sengo yiyo yikwete nkani.

¹⁵ Uwantumi uyunji akafuma mu Nyumba iya Chala nukumubuzya nizyu ilya pamwanya nkani yuyo akikalagha pibingu ukuti, “Bombezya isengo yako pakwinula pakuti akabalilo akakwinulila kakwana pakuti ivibyalwa ivya muchisu ichapasi vyatona.”

¹⁶ Po uwakwikala pibingu yula akabombezya isengo yache pakwinula ivibyalwa vyosi ivya muchisu ichapasi.

¹⁷ Inkennya sona uwantumi uwamwabo akufuma mu Nyumba iya Chala kumwanya, sona wepe akaba ni sengo yiyo yikwete nkani.

¹⁸ Uwantumi uwamwabo yuyo akaba we songo uwa moto akiza ukufuma ku chighemo. Akakolomoka nkani ku wantumi yuyo akaba ni sengo yiyo yikwete nkani akati, “Bombezya isengo yako pakuyaba amampesya mumughunda uwa mampesya muchisu ichapasi pakuti amampesya ghatona.”

¹⁹ Po uwantumi yula akabombezya isengo yache, akinula amampesya ghosi muchisu ichapasi nukughasumbila mu chiliba ichakukanyilamo amampesya ichikulu icha ubukali ubwa Chala.

²⁰ Amampesya ghala ghakakanyiwa mu chiliba ichakukanyilamo amampesya kuzi kwa kaya akakulu, sona mu chiliba ichakukanyilamo amampesya chila mukafuma ibanda, lilyo likafuluka ngati lusoko mupaka amamita 3,000, sona ubwibizu bwache mupaka amamita mabili.