Titi 1 - Ulufingo Ulupya

¹ Ane ne Pabuli, umubombi uwa Chala, sona nu mutumiwa uwa Yesu Kilisitu. Ane inkasaliwa ukuti imbavwe abantu babo bakasaliwa nu Chala ukuti basubile nukubalongolela ukuti babumanye ubwanaloli, sona nukuti babanje nubumi ubwakumwiputa,

² lulo lwimite palusubilo ulwa bwila na bwila. U Chala, yuyo atakutamanta, akalayizya pakutupa ubumi bunubu, bo ni chisu ichapasi chitapeliwe.

³ Pakabalilo kache akiza, akavumbula amazyu ghache ukwendela pakulumbilila amazyu ghache, ghagho u Chala Umupoki witu akampa.

⁴ Inkumusimbila u Titi, umwana wane uwanaloli mulwitiko, lulo aswe twe babili tuli nalo. Ichisa nu mumutende ivyakufuma kwa Chala u Tata, sona nu Kilisitu u Yesu, Umupoki witu vibanje nawe.

Imbombo iya Titi mu Kileti

⁵ Ichifukwa chicho nkakulekela mu Kileti, chikaba chakuti uyannye ivintu vyosi vivyo vikalondiwanga pakuviyannya, sona nukuti usale abasongo aba chipanga mutwaya tosi, ukuyana na mumo nkakubuzizya.

⁶ Kumbuka ukuti usongo uwa chipanga atakabanje ni chilema nachimochimo. Abanje nu muchi weka, yuyo abana bache bitiki, sona atakabanje ni mbili iya bunyamana pamo iyakusita ukwivwila.

⁷ Pakuti usongo uwa chipanga we wakwenelezya imbombo iya Chala, abanje muntu umusita chilema nachimochimo. Atakabanje muntu uwakwitutumula, nu wakukalala mwalwe-mwalwe pamo uching'wela. Atakabanje muntu uwalombwa, pamo umughana ndalama.

⁸ Loli abanje muntu uwakupokela abayeni, nukuchighana chicho chiza. Abanje wakwilema, nu mugholosu, nu muzelu, sona nu wankalo inyiza.

⁹ Alemezye amazyu amasubiliwa ukuyana ni chimanyisyo chane, umwakuti angabakazya abantu abanji ni chimanyisyo ichanaloli, sona nukubapota abantu babo bakususannya ni chimanyisyo chinichi.

¹⁰ Pakuti balipo abantu abinji, babo basambuke, na baneno izyamwalwe, na bazimbuli, nkani-nkani aba mukabukatila aka bantu abasilimuliwe.

¹¹ Ubaghiye ubakanizyanje pakunena-nena, pachifukwa chakuti bakuvulungannya imitu iya bantu munyumba zyosi pakubamanyizya vivyo vitabaghiye pakumanyiziwa. Pakubomba bunubu yikuba ngati yo zila iyakukabilamo indalama.

¹² Umulaghuzi yumo mumwabo akati, “Akabalilo kosi abantu aba mu Kileti bamyasi, vyo vinyamana ivibibi, na bakata, sona na bapafu.”

¹³ Ulusimikizyo ulu lwanaloli. Pachifukwa ichi ubaghiye ubachemele nkani abantu balabala, umwakuti babanje bamaka mulwitiko,

¹⁴ sona nukuti batakimilile mu tupangwi utwa Chiyuda, pamo pa malamulo agha bantu babo bakubusula ubwanaloli.

¹⁵ Abantu babo bazelu, ivintu vyosi vinivi vizelu, loli abantu babo inyinong'ono zyabo zinyonganite, sona babo batakusubila nachimochimo chicho chizelu. Ubwanaloli bwakuti, inyinong'ono zyabo nu mabyebye wabo vinyonganite.

¹⁶ Bakwipima bene ukuti bamumenye u Chala, loli mumbombo zyabo bakumukana. Abene banyazu, na basita ukwivwila, sona batabaghiye napo panandi pakubomba ichintu ichiza.