Matayi 5 - Ulufingo Ulupya

U Yesu akulumbilila pighamba 5.1—7.29

¹ Bo u Yesu ennya ichilundilo icha bantu, akakwela pighamba nukwikala pasi. Abamanyili bache bakamuzyungulila

² nukwanda pakubamanyizya ukuti:

Nizya buhobosu

³ “Basayiwa abantu babo bazimenye ukuti bapina mubuzimu, pakuti Ubumwene ubwa Kumwanya bwabo.

⁴ Basayiwa babo bakulila akabalilo aka, pakuti u Chala akwiza pakubapumizya;

⁵ Basayiwa abantu babo bakwiyisya, pakuti bakwiza pakupokela zizyo u Chala akabalayizya.

⁶ Basayiwa abantu babo bali ni zala ni nyota iya bugholosu, pakuti u Chala akwiza pakubikutizya.

⁷ Basayiwa abantu babo bali ni chisa na bamwabo, pakuti u Chala akwiza pakubapelela bope ichisa.

⁸ Basayiwa babo bazelu mumoyo, pakuti bakwiza pakumwennya u Chala.

⁹ Basayiwa abantu babo bakupela umutende, pakuti bakwiza pakuba bana aba Chala.

¹⁰ Basayiwa babo bakuvwimiwa, pachifukwa chakuti bakubomba vivyo u Chala akulonda, pakuti Ubumwene ubwa Kumwanya bwabo.

¹¹ “Mwe basayiwa, nanti abantu bakubatuka, bakubavwima nukubatamantila ivintu vyosi ivibibi pachifukwa chakuti mwe bakonki bane.

¹² Hobokagha nu kusekela pakuti umuvwalo winyu mukulu nkani kumwanya. Umu mo mumo abalaghuzi babo bakabako kale bakavwimiliwanga.

Nizya mbeya nu lukozyo

¹³ “Amwe mwe mbeya pakasi pa bantu aba muchisu ichapasi. Loli nanti imbeya yasupa, nkimba mungayipela buli-buli pakuba sona mbeya? Yite sona ni mbombo napo panandi, loli yikusumbiwa kuzi, po abantu bakuyikanyannya.

¹⁴ “Amwe mwe lukozyo ulwa bantu aba muchisu ichapasi. Akaya akakulu nkani kako kazengiwe pighamba katangavwama.

¹⁵ Nayumo umuntu yuyo akukozya inyale nukuyikupikila ni sonta. Loli akuyibika pabuzelu, umwakuti yibalamilaye abantu bosi munyumba mula.

¹⁶ Momumo namwe ulukozyo lwinyu lulamaye pa bantu, ukuti bennyanje imbombo zyinyu inyiza nukumupala Utata winyu uwa kumwanya.

U Yesu akumanyizya nizya Ndaghilo izya Mozesi

¹⁷ “Mutakinong'onaye ukuti nizite pakumazya Indaghilo izya Mozesi nu bumanyisi ubwa balaghuzi. Awe, intizite pakumazya, loli pakuzikwanilisya.

¹⁸ Naloli inkubabuzya ukuti bo kumwanya na pasi vitazimiye nakope akasimbo akanandi pamo akasonga akasimbo kepepo pa Ndaghilo, mupaka vyosi vinivi vikwanilisiwe.

¹⁹ Umuntu wesi yuyo atakwivwila nakope akanandi aka malamulo ghanagha nukumanyizya abanji pakubomba bunubu, akwiza pakuba munandi mu Bumwene ubwa Kumwanya. Loli umuntu wesi yuyo akukonka Indaghilo zinizi nukumanyizya abanji pakubomba bunubu, akwiza pakuba we songo mu Bumwene ubwa Kumwanya.

²⁰ Po inkubabuzya ukuti mukwiza pakwinjila mu Bumwene ubwa Kumwanya, pene papo nanti mwe basubiliwa nkani ukuchila abamanyisi aba Ndaghilo naba Falisayi pakubomba zizyo u Chala akulonda.

U Yesu akumanyizya nizya bukali

²¹ “Mwivuye ukuti kale zikaneniwa ukuti, ‘Utakaghoghaye. Umuntu wesi yuyo akughogha akwiza pakulongiwa.’

²² Loli ilelo inkubabuzya ukuti umuntu wesi yuyo amukalaliye umukamu wache akwiza pakulongiwa. Sona umuntu wesi yuyo akumunena umukamu wache ukuti, ‘Ute ni mbombo,’ akwiza pakulongiwa na balongi. Sona umuntu wesi yuyo akumunena umukamu wache ukuti, ‘Wee mupunganu,’ wepe bulo akwiza pakusumbiwa pamoto uwa mu Gehena.

²³ Po, nanti ukubika ichabupi chako kwa Chala pachighemo, panapo nanti wakumbuka ukuti umukamu wako ali ninongwa nawe,

²⁴ chizapo ukuti uchileke ichabupi chako pachighemo pala nukubuka umwalubilolubilo pakumanyana nu mukamu wako, po wizaghe pakubika ichabupi chako chila kwa Chala.

²⁵ “Nanti umuntu akusitaka, chizapo pakwivwana nawe umwalubilolubilo bo muli muzila. Pakuti nanti mutakwivwana, akwiza pakukubika munyobe izya balongi. Sona umulongi akwiza pakukubika munyobe izya musikali, yuyo akwiza pakukwighalila mujele.

²⁶ Inkukubuzya ukuti ukwiza pakwikala mumo mupaka ulipile indalama iyabumalilo iya nongwa yako.

U Yesu akumanyizya nizya bulowe

²⁷ “Mwivuye ukuti kale zikaneniwa ukuti, ‘Utakalowaye.’

²⁸ Loli ilelo inkubabuzya ukuti: Umuntu wesi yuyo akumwenelezya umukolo nukumunyonywa, alowa nawe kale mumoyo wache.

²⁹ Nanti ilyiso lyako ilyandilo likukupuvya, likolompolelyo nukulisumba! Chizapo pakutagha ichigaba chimo icha mubili wako ukuchila ukuti umubili wako ghosi ghusumbiwe mu Gehena.

³⁰ Po nanti inyobe yako indilo yikukupuvya, yidumule nukuyisumba. Chizapo pakutagha inyobe yako yoka ukuchila ukuti umubili wako ghosi ghusumbiwe mu Gehena.

U Yesu akumanyizya nizya soka

³¹ “Zikaneniwa sona ukuti, ‘Umuntu wesi yuyo akumusosya umuchi, amupanje ukalata uwakusoka.’

³² Loli ilelo inkubabuzya ukuti nanti umuntu akumusosya umuchi wache pabusita ichifukwa icha bulowe, kokuti akumupelela umukolo yula pakuba mulowe nanti akusendiwa sona. Umwanavuli yuyo akumusenda umukolo yuyo asokite, kokuti wepe akulowa.

U Yesu akumanyizya nizya chilapo

³³ “Mwivuye sona ukuti kale zikaneniwa ukuti, ‘Utakapotwe pakubomba chicho walayizya, loli bomba kwa Mwene chicho ufingite.’

³⁴ Loli ilelo inkubabuzya ukuti utakalapilaye napo panandi bulo. Utakalapilaye pakutambula ukuti, ‘Kumwanya.’ Pakuti kumwanya cho chitengo icha Bumwene icha Chala.

³⁵ Utakalapaye ukuti, ‘Ichisu chapasi.’ Pakuti po akutuzikizyapo inyayo zyache. Utakalapaye ukuti, ‘Akaya akakulu nkani aka Yelusalemu.’ Pakuti ko kaya akakulu nkani aka Mwene Umukulu.

³⁶ Utakalapilaye kusingo yako, pakuti utangandula nakope akasisi koka pakuba kaswepu pamo kafitu.

³⁷ Nena bulo ukuti, ‘Ee’ pamo ‘Awe’ amazyu ghosi ghagho ukonjelezya pa mazyu ghanagha kokuti ghakufuma kwa Satana, Umubibi yula.

U Yesu akumanyizya nizya kutanizya

³⁸ “Mwivuye ukuti kale zikaneniwa ukuti, ‘Ilyiso lilipile ilyiso, ilyino lilipile ilyino.’

³⁹ Loli ilelo inkubabuzya ukuti mutakamutanikizizyanje umuntu yuyo akubombela ububibi. Nanti umuntu yumo akukoma kulusaya ulwa ndilo, mupe ulwamwabo ukuti akukome sona.

⁴⁰ Nanti umuntu yumo akusitaka pamaso pa balongi ukuti akufyule ilaya lyako, muleke asende poka ni nkazo bulo.

⁴¹ Nanti umusikali akukufyenga ukuti wende nawe amamita 1,000, wende nawe amamita 2,000.

⁴² Nanti umuntu akukulaba ichintu chimo, umupe, sona nanti yumo akulonda pakwazimya ichintu chimo, umwazime.

Nizya kubaghana abalwani bitu

⁴³ “Mwivuye ukuti kale zikaneniwa ukuti, ‘Umughane umupalamani wako nukumubenga umulwani wako.’

⁴⁴ Loli ilelo inkubabuzya ukuti mubaghane abalwani binyu nukubiputila babo bakubavwima,

⁴⁵ ukuti mubanje mwe bana aba Tata winyu uwa kumwanya. Pakuti akulamizya izuba pa bantu abiza na babibi bulo nukutuma ivula pa bagholosu na babo bate bagholosu.

⁴⁶ Nanti mukubaghana abantu bene babo bakubaghana, nkimba mukukabapo ichoni? Abasonkezya sonko bope bakubomba bunubu.

⁴⁷ Po nanti ukulamuka abamanyani bako bene, nkimba vilekanite buli-buli na vivyo abantu abanji bakubomba? Bope abantu abakuzi bakubomba bunubu.

⁴⁸ Po mubanje bantu abiza muvintu vyosi ukuyana na mumo Ughuso uwa kumwanya abeleye!