Matayi 28 - Ulufingo Ulupya

Ukuzyuka kubufwe kwa Yesu

¹ Pandabindabi nkani, bo lyachila Isiku Ilyakutuzya, u Malya Magadalena nu Maliya uyunji bakabuka pakwennya kwipumpa.

² Umwalubilolubilo kukaba akasenyenta akakali nkani pakuti uwantumi uwa Mwene akika kumwanya. Akabunguluzya ibwe lila nukwikalapo.

³ Akabonekele kache kakayana bulo na kamesya, sona amenda ghache ghakaba maswepu ngati we kabefu.

⁴ Abalindilili bala bakanyila nkani, umwakuti bakatetema nukuba ngati bo bantu abafwe.

⁵ Uwantumi yula akababuzya abakolo bala akati, “Mutakanyilaye. Inzimenye ukuti mukumulonda u Yesu, yuyo akakomeliwa pachipinjika.

⁶ Atalimo muno, azyukite ukuyana na mumo akanenela. Zagha mwennye, ubuzilo bubo akalambalalaghapo bo ubu.

⁷ Losi ulu bukagha mubabuzye abamanyili bache muti, ‘Azyukite kubufwe, sona losi ulu alongolela ku Galileya. Kulakula mukwiza pakumwennya!’ Kumbuka zizyo nababuzya.”

⁸ Po umwalubilolubilo bakepamo mwipumpa nu bogha, sona bo bizuye nu buhobosu. Bakachimbila pakubabuzya abamanyili bache.

⁹ Umwalubilolubilo u Yesu akakomana nabo nukuti, “Umutende ghubanje namwe.” Bakiza kukwache nukumulema munyayo zyache nukumuchindika.

¹⁰ Po u Yesu akababuzya akati, “Mutakanyilaye. Kababuzye abakamu bane ukuti babukaye ku Galileya kuko bakwiza pakunyennya.”

Abasikali bakunena zizyo zikaboneka kwipumpa

¹¹ Bo abakolo babuka, abasilikali abankondo bamo bakanyokela kukaya akakulu nkani nukubabuzya abaputi abasongo vyosi vivyo vikaboneka

¹² Abaputi abasongo bakakomana na balongozi aba Chiyuda nukwivwana ichakubomba. Po bakababeka abasilikali ni ndalama inyinji nkani

¹³ nukubabuzya ukuti, “Mutinji, ‘Abamanyili bache bakiza pabusiku nukwiba umuvimba wache bo tufuye nu tulo.’

¹⁴ Nanti umulaghili uwa Chiloma ivwa tukwiza pakumudeba ukuti mute ninongwa, po mutakapasyanje nachimo.”

¹⁵ Po abalindilili abankondo bala bakapokela indalama nukubomba zizyo bakababuzya. Po ipangwi likasata mosi mu ba Yuda mupaka ilelo.

U Yesu akubabonekela abamanyili bache

¹⁶ Abamanyili 11 bala bakabuka mu Galileya kwighamba kuko u Yesu akababuzya ukuti bakomane nawe.

¹⁷ Bo bamwennya bakamuchindika, napapo bamo bakilamwa.

¹⁸ U Yesu akapalamila nukubabuzya ukuti, “Napeghiwa ubulaghili bosi kumwanya na pasi pano.

¹⁹ Po bukagha pakasi pa bantu aba inko zyosi nukubapela pakuba bamanyili bane. Mubozyanje mwitabwa ilya Tata, nilya Mwana nilya Muzimu Umuzelu.

²⁰ Mubamanyizyanje ukwivwila vyosi vivyo nabalamula, sona inkwiza pakuba namwe akabalilo kosi mupaka kubumalilo ubwa chisu ichapasi.”