Matayi 23 - Ulufingo Ulupya

U Yesu akubasoka abantu nizya bamanyisi aba Ndaghilo naba Falisayi

¹ Po u Yesu akachibuzya ichilundilo icha bantu na bamanyili bache akati,

² “Abamanyisi aba Ndaghilo naba Falisayi bapeghiwa ubulaghili ubwakung'anamula Indaghilo izya Mozesi.

³ Po mwivwilaye nu kubomba vyosi vivyo bakubabuzya. Loli mutakeghelelaye imbombo zyabo pakuti batakubomba zizyo bakulumbilila.

⁴ Bakubapinyilila ukatundu umung'wamu pavipunko ivya bantu, loli abene batakulondagha pakubombezya akafingwi ukubavwa pakunyamula ukatundu yula.

⁵ Bakubomba zyosi izi ukuti abantu babennye. Ennya Amasimbo pankigha zizyo bakupinya kumutu na panyobe, sona ennya ubukulu mumo zibeleye! Ennya amabuzi amatali-tali munkazo zyabo.

⁶ Bakwighana ubuzilo ubwa buchindamu palusekelo nukwikala pa vitengo ivya pamwanya munyumba izyakwiputilamo.

⁷ Bakwighana ukuti abantu babalamukaye nu muchizi muminalo nukwitiziwa ukuti, ‘Bamanyisi.’

⁸ Uleke ukwitiziwa ukuti, Mumanyisi, Pakuti mwebosi mwe ba nyumba yoka, sona muli nu Mumanyisi weka.

⁹ Po mutakamwitizyanje umuntu yumo pachisu ichapasi pano ukuti Tata, pakuti muli nu Ghuso weka uwa kumwanya.

¹⁰ Pamo pakwitiziwa ukuti Mulongozi, pakuti muli nu mulongozi weka yuyo we Kilisitu.

¹¹ Usongo mumwinyu abanje wambombo winyu.

¹² Umuntu wesi yuyo akwikwezya mwene akwiza pakwisiwa, sona umuntu wesi yuyo akwiyisya mwene akwiza pakukweziwa.

U Yesu akubususya ubuzimbuli bwabo

¹³ “Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Mukwighalila umulyango uwa Bumwene ubwa Kumwanya pamaso pa bantu, po amwe mwebene mutakwinjilamo, pamo ukwitikizya babo bakuyezya ukwinjilamo.

¹⁵ “Chighune nkani kukwinyu, mwe bamanyisi aba Ndaghilo naba Falisayi! Mwe bazimbuli mwee! Mukuba na mabulendo agha panyanja nukwenda amabulendo amatali nukusikula umuntu yumo ukuti abanje mumanyili winyu, po nanti mwamwagha weka mukumupela pakuba wakubaghila ku Gehena ukuchila mwebene kabili.

¹⁶ “Chighune nkani kukwinyu, mwe balongozi abafwamaso! Mukumanyizya ukuti, ‘Nanti umuntu akulapila Inyumba iya Chala pate ichifukwa. Loli nanti akulapila ugolide uwa mu Nyumba iya Chala, po akwipinya ni chilapo chache.’

¹⁷ Mwe bafwamaso abapunganu! Chili ko kwiyi chicho chapamwanya nkani, ugolide pamo Inyumba iya Chala chicho chikupanga ugolide pakuba muzelu?

¹⁸ Sona mukumanyizya ukuti, ‘Nanti umuntu akulapila ichighemo pate ichifukwa. Loli nanti akulapila ichabupi, po akwipinya ni chilapo chache.’

¹⁹ Mwe bafwamaso amwe! Chili ko kwiyi chicho chapamwanya nkani, ichabupi pamo ichighemo chicho chikupanga ichabupi pakuba chizelu?

²⁰ Po nanti umuntu akulapila ichighemo, akulapila pachinichi ni chabupi chosi chicho chili panapo.

²¹ Sona nanti akulapila Inyumba iya Chala, akulapila chinicho nu Chala yuyo akwikala mulamula.

²² Po nanti umuntu akulapila kumwanya, panapo akulapila ichitengo icha Chala na yuyo ikayepo palapala.

²³ “Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Mukubika kwa Chala ichigaba choka pa vigaba 10 ivya vilungo vyinyu ngati bo busambya, nu kale, nu muzimwa, loli mukukana ukwivwila ichimanyisyo ichapamwanya nkani icha Ndaghilo, pakuba bwanaloli, ni chisa nu busubiliwa. Ivi vyo vintu vivyo mubombaye ukusita pakuvilekapo vimo.

²⁴ Mwe balongozi abafwamaso amwe! Mukwefyamo akabwele muvyakung'wela vyinyu, loli mukumila bulo ingamila!

²⁵ “Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Mukusuka kuzi kwa lubako ni mbale zyinyu, loli mukasi mwizuye nu bupavu nu buvyondongo.

²⁶ Mwe ba Falisayi abafwamaso amwe! Efyamo tasi vivyo vili mukasi mulubako, po kope kuzi kukwiza pakuswepa!

²⁷ “Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Pakuti muyanite bulo na mapumpa ghagho ghapakaziwe ni banya ghagho ghakuboneka akiza kuzi, loli mukasi mwizuye na mafupa ni vintu ivibozu ivinji.

²⁸ Momumo, kuzi kwa mubili mukuboneka akiza, loli mukasi mwizuye nu buzimbuli ni mbibi.

U Yesu akunenela zila nizya lufundo lwabo

²⁹ “Chighune nkani kukwinyu, mwe bamanyisi aba Ndaghilo naba Falisayi! Mwe bazimbuli mwee! Mukuzenga amapumpa amiza agha balaghuzi nukuyannya akiza amapumpa agha bantu abagholosu.

³⁰ Po mukunena ukuti, ‘Nanti aswe tukikala pakabalilo aka abanyenya bitu ngali tutakabomba zizyo bakabomba nukughogha nabo abalaghuzi.’

³¹ Po mukwitika ukuti mwe luko ulwa bantu babo bakaghogha abalaghuzi!

³² Po mwendelele nukumalizya zizyo abanyenya binyu bakanda!”

³³ “Mwe injoka, abana aba swila! Nkimba po mungapona buli-buli ukufundiwa mu Gehena?

³⁴ Po inkubabuzya ukuti inkwiza pakutuma abalaghuzi na bantu abamahala na bamanyisi. Bamo mukwiza pakubaghogha. Bamo ukubakomela pachipinjika nukubasyempa abamwabo munyumba izyakwiputilamo nukubachimbizyamo mukaya ukubuka mukaya akanji.

³⁵ Pachifukwa icha kughogha abantu abiza bosi, ulufundo lukwiza pakuba papinyu, ukwandila pakughoghiwa kwa Abeli mupaka pakughoghiwa kwa Zekaliya umwana uwa Belakayi, yuyo mukamughogha pakasi pa Nyumba iya Chala ni chighemo.

³⁶ Naloli inkubabuzya ukuti ulufundo ulwa baghoghi aba lukwiza pakuwila pa bantu abankulilo iyi!”

Ulughano ulwa Yesu pa Yelusalemu

³⁷ “Wee Yelusalemu, wee Yelusalemu! Ukughogha abalaghuzi nukuzitiza na mabwe intumi zizyo u Chala akutumiye! Akabalilo akinji nalondagha pakubabungannya abana bako ukuyana na mumo inkuku yikufukatilila utwana twache muvipapande, loli utakanyitikizya.

³⁸ Ennya, ilelo Inyumba yinyu iya Chala yikwiza pakuba chisami.

³⁹ Inkubabuzya ukuti ukwandila pakabalilo aka, mute mukanyennyepo nalumolumo mupaka munene ukuti, ‘U Chala amusaye yuyo akwiza mwitabwa ilya Mwene.’ ”