Matayi 22 - Ulufingo Ulupya

Ichili icha lusekelo ulwa sendwa

¹ U Yesu akanena sona na bantu bala muvyili.

² “Ubumwene ubwa Kumwanya buyanite bulo nu mwene yuyo akayannya ulusekelo ulwa sendwa iya mwana wache.

³ Akabatuma abambombo bache pakubabuzya abantu babo bakitiziwa ku lusekelo, loli bakakana.

⁴ Po akatuma abambombo abamwabo pakasi pa bantu babo bakitiziwa na mazyu aghakuti, ‘Nayannya ulusekelo; naghogha ing'ombe ni ngwata inyine. Vyosi vyayaniziwa. Mwizaghe kulusekelo ulwa sendwa iyi.’

⁵ Loli abantu babo bakavisulannya bulo nukubuka ku mbombo zyabo; yumo akabuka ku mughunda wache, uyunji akabuka pakughulizya,

⁶ abanji bakabalema abambombo bala, bakabakoma nukubaghogha.

⁷ U mwene yula akakalala nkani, po akatuma abasilikali bache abankondo pakughogha abaghoghi bala nukocha akaya kabo.

⁸ Po akabitizya abambombo bache nukubabuzya ukuti, ‘Ulusekelo lwane ulwa sendwa lwayaniziwa, loli abantu babo inkabitizya batakabaghila.

⁹ Losi ulu bukagha munkomano izya misebo nukwitizya abantu bosi babo mungabagha ukuti bize ku lusekelo ulu.’

¹⁰ Po abambombo bakabuka mu misebo nukwitizya abantu bosi babo bakabagha, abiza na babibi bulo; inyumba yiyo bakapangilaghamo ulusekelo yikizula na bantu.

¹¹ “U mwene akinjila munyumba mula pakwennya abantu babo akabitizya nukumwennya umuntu yuyo atakavwala amenda agha sendwa.

¹² U mwene akamulalusya akati, ‘Wee mumanyani, winjiye buli-buli umu ukusita ukuvwala amenda agha sendwa?’ Loli umuntu yula atakanenapo nachimochimo.

¹³ Po u mwene akababuzya abambombo akati, ‘Mumupinye inyobe ni vinama nukumusumbila kuzi muchisi, kuko akwiza pakulilagha nu kusyeketula amino ghache.’ ”

¹⁴ Po u Yesu akati, “Pakuti binji babo bakwitiziwa, loli banandi babo bakusaliwa.”

Bakumulalusya u Yesu nizya kusonka umusonko

¹⁵ Aba Falisayi bakabuka nukwivwana mumo bangamuteghela u Yesu pakumulalusya.

¹⁶ Po bakatuma kwa Yesu abamanyili babo bamo poka na bantu bamo aba mukabukatila aka Helodi. Bakati, “Wee Mumanyisi, tuzimenye ukuti ukunena ubwanaloli. Ukumanyizya izila iya Chala pakasi pa bantu ukuyana nu bwanaloli, ukusita ukunyila inyinong'ono izya bantu pakuti utakwennya icheni icha muntu.

¹⁷ Tubuzye, nkimba ukwinong'ona ichoni? Nkimba Indaghilo zyitu zikutwitikizya pakusonka umusonko kwa Kesale pamo awe?”

¹⁸ Loli u Yesu akazimanya zizyo bakalondagha pakubomba po akati, “Mwe bazimbuli mwee! Nkimba choni chicho mukuyezya pakuntegha?

¹⁹ Ndanjizye isalabazya iyakusonkela umusonko!” Bakamupa isalabazya yoka,

²⁰ po akabalalusya akati, “Nkimba icheni ni tabwa vivyo vili apa vya wenu?”

²¹ Bakamwamula bakati, “Vya Kesale.” Po u Yesu akati, “Ivya Kesale mumupe u Kesale; ivya Chala mumupe u Chala.”

²² Bo abantu bivwa zinizi, bakaswigha nkani, po bakamuleka nukubuka.

Bakumulalusya u Yesu nizya kuzyuka kubufwe

²³ Pisiku lilalila aba Sadukayi bamo babo bakatinji abantu bate bakazyuke kubufwe bakiza kwa Yesu

²⁴ nukuti, “Wee Mumanyisi, u Mozesi akati, ‘Nanti umwanavuli afwa umusita bana, uwamwabo amupyane umufwilwe yula umwakuti apape nawe abana, babo bakwiza pakubasenda ngati bo bana aba muyazi yula.’

²⁵ Kukabako abawamwabo seveni babo bakikalagha kuno. Usongo akasenda nukufwa umusita bana, po uwamwabo akapyana umufwilwe yula.

²⁶ Ichi chikabombiwa bunubu ku wabubili, naku wabutatu, mupaka bosi seveni bala.

²⁷ Pabumalilo, umukolo wepe akafwa.

²⁸ Pisiku ilyakuzyuka kubufwe, nkimba umukolo yula akwiza pakuba muchi uwa wenu pakuti bosi seveni bala bakamusendapo?”

²⁹ U Yesu akabamula akati, “Mukupuvya nkani pakuti mutaghamenye Amasimbo pamo amaka agha Chala.

³⁰ Pakuti bo abantu abafwe bazyuka, kute kukabeko isendwa pakuti bosi bakwiza pakuyana bulo na bantumi kumwanya.

³¹ Loli nizya kuzyuka kwa bantu abafwe, nkimba mutabelengitepo nalumolumo zizyo u Chala akababuzya? Akati,

³² ‘Ane ne Chala uwa Abulahamu, u Chala uwa Yisaki nu Chala uwa Yakobo.’ We Chala uwa bantu abumi, ate uwa bantu abafwe.”

³³ Bo abantu abinji bivwa zinizi, bakaswigha nkani nu bumanyisi bwache.

Ilamulo ikulu nkani

³⁴ Bo aba Falisayi bivwa ukuti u Yesu abapota aba Sadukayi, bakabungana poka,

³⁵ po weka mumwabo, umumanyisi uwa Ndaghilo, akayezya pakumutegha pakumulalusya.

³⁶ Akamulalusya akati, “Wee Mumanyisi, nkimba lilamulo lyoni lilyo likulu nkani ukuchila Indaghilo zyosi?”

³⁷ U Yesu akamula akati, “Umughanaye u Mwene u Chala wako, nu moyo wako ghosi, nu muzimu wako ghosi, ni nyinong'ono zyako zyosi.

³⁸ Ili lyo lilamulo ikulu nkani ukuchila ghosi.

³⁹ Ilyabubili ikulu lyo ili, umughanaye umupalamani wako ukuyana na mumo wiyighaniye wemwenecho.

⁴⁰ Indaghilo zyosi izya Mozesi ni vimanyisyo ivya balaghuzi vyimite pamalamulo mabili agha.”

Nizya Kilisitu u Mwana uwa Devedi

⁴¹ Bo aba Falisayi babunganite poka, u Yesu akabalalusya akati,

⁴² “Nkimba mukwinong'ona ichoni nizya Kilisitu? Nkimba amwe mukuti waluko loni?” Bakamula bakati, “Waluko ulwa Devedi.”

⁴³ U Yesu akalalusya akati, “Nkimba choni chicho u Muzimu Umuzelu akinjila mwa Devedi ukuti amwitizye ukuti Mwene? U Devedi akati,

⁴⁴ ‘U Mwene akamubuzya u Mwene wane akati, Ikala apa kunyobe yane indilo mupaka imbabike abalwani bako kusi kunyayo zyako.’

⁴⁵ “Nanti u Devedi umwenecho akamwitizya ukuti Mwene, po u Kilisitu angaba buli-buli uwaluko ulwa Devedi?”

⁴⁶ Nayumo umuntu yuyo akamwamula u Yesu, sona ukwandila pisiku lilalila nayumo umuntu uwakujimba umoyo pakumulalusya sona.