Matayi 20 - Ulufingo Ulupya

Ichili icha bambombo mumughunda uwa mampesya

¹ “Ubumwene ubwa Kumwanya buyanite bulo nu muntu yuyo akalabila pandabindabi ukubuka pakulonda abaganyu ukuti babombaye mumughunda wache uwa mampesya.

² Akivwana nabo pakubalipila isalabazya yoka pisiku, po akabatuma pakubomba mumughunda wache.

³ Akabuka sona ku munalo pakabalilo aka nayini koloko nukwennya abantu bamo bakwikala bulo ukusita ichakubomba.

⁴ Akababuzya akati, ‘Namwe bulo kabombaye mumughunda uwa mampesya, inkwiza pakubalipila umwakuyana bulo.’

⁵ Po bakabuka. Umwenecho akabuka sona pamusanya pa 12 koloko na pachamabwila pa fili koloko nukubomba bunubu.

⁶ Bo akabalilo kali papipi pa fayivi koloko pachamabwila, akabuka ku munalo nukwennya abantu bamo bakwikala bulo. Akabalalusya akati, ‘Choni chicho mukwikala bulo isiku lyosi ukusita ichakubomba?’

⁷ Bakamula bakati, ‘Nayumo umuntu yuyo atusimbite uganyu.’ Umuntu yula akababuzya akati, ‘Namwe bulo kabombaye mumughunda wane uwa mampesya.’

⁸ “Bo izuba lyinjila, umwene mughunda akamubuzya ukapitawa akati, ‘Bitizye abaganyu nukubalipila indalama zyabo, wandile na babo bakasimbiwa pabumalilo nukumalila na babo bakasimbiwa pakwanda.’

⁹ Abaganyu babo bakanda pakubomba fayivi koloko pachamabwila bakabalipila isalabazya yoka umuntu weka.

¹⁰ Po abaganyu babo bakasimbiwa pakwanda bakiza ukuti babalipile, bakinong'ona ukuti akwiza pakupokela inyinji; loli bope bakabalipila isalabazya yoka umuntu weka.

¹¹ Bakasenda indalama zyabo nukwanda pakwilumbusya nu mwene mughunda ghula,

¹² nukuti, ‘Abaganyu babo bakasimbiwa pabumalilo bakabomba wanu awala bulo, loli aswe twabombite isiku lyosi mukasanya, loli ukabalipila ukuyana na mumo ukatulipilila!’

¹³ “Umwene mughunda akamwamula weka uwa baganyu bala akati, ‘Teghelezya mumanyani, ntakuzimbuyepo. Nkimba tutakivwana isalabazya yoka isiku lyoka?

¹⁴ Losi ulu senda umuvwalo wako nukubuka kunyumba. Bwighane bwane pakumulipila umuntu uyu yuyo akasimbiwa pabumalilo ukuyana na mumo nakupela awe.

¹⁵ Nkimba inte nu bulaghili ubwakubomba chicho nkulonda ni ndalama zyane? Pamo uli na kabini pachifukwa chakuti ne mupi?’ ”

¹⁶ Pabumalilo u Yesu akati, “Babo babumalilo, bakwiza pakuba bakwanda, sona babo bakwanda bakwiza pakuba babumalilo.”

U Yesu akunenela zila akabutatu nizya bufwe nu kuzyuka kwache

¹⁷ Bo u Yesu akubuka mu Yelusalemu, akabasendela palubazu abamanyili bache 12 bala nukunena nabo bo bakwenda ukuti,

¹⁸ “Ivwa kuno, tukubuka mu Yelusalemu, mumo u Mwana uwa Muntu akwiza pakubikiwa munyobe izya baputi abasongo na bamanyisi aba Ndaghilo. Bakwiza pakumulonga ukuti aghoghiwe

¹⁹ nukumubika munyobe izya bantu babo bate ba Yuda, babo bakwiza pakumobezya, ukumusyempa nukumukomela pachipinjika. Loli bo ghachilapo amasiku matatu, akwiza pakuzyuka kubufwe.”

Ukulaba kwa nyina uwa Yakobo nu Yohani

²⁰ Po umuchi uwa Zebediya akiza kwa Yesu na bana bache babili, akamufughamilila nukumulaba chimo.

²¹ U Yesu akamulalusya akati, “Nkimba ukulonda ichoni?” Umukolo yula akamula akati, “Bo wikala mu Bumwene bwako undayizye ukuti abana bane babili banaba bikalaye, yumo kunyobe yako indilo, uyunji kumongo.”

²² U Yesu akabamula abana bala akati, “Mutakuchimanya chicho mukulaba. Nkimba mungang'wela mulubako ulwa ntamyo lulo inkwiza pakung'welamo?” Bakamula bakati, “Ee, tungachibomba.”

²³ U Yesu akababuzya akati, “Naloli mungang'wela mulubako lwane, loli inte nu bulaghili ubwakusala uwakwikala kunyobe indilo na kunyobe iyamongo. Ubuzilo ubu ubwa bantu babo Utata wane abayanizizya.”

²⁴ Bo abamanyili abanji 10 bala bivwa zinizi, bakabakalalila nkani abawamwabo babili bala.

²⁵ Po u Yesu akabitizya bosi poka nukubabuzya ukuti, “Muzimenye ukuti abalaghili banaba bantu babo bate ba Yuda bali na maka pa bantu babo, sona abalongozi bali nu bulaghili bosi.

²⁶ Loli ichi chite momumo chibeleye pakasi papinyu. Nanti umuntu yumo akulonda pakuba we songo, kokuti abanje mubombi uwa bosi.

²⁷ Nanti umuntu yumo akulonda pakuba wakwanda, kokuti abanje muzya winyu.

²⁸ Ayane bulo nu Mwana uwa Muntu, pakuti atakiza ukuti bamubombelaye, loli pakubabombela nukubapa ubumi bwache ukuti abapoke abantu abinji.”

U Yesu akupozya abafwamaso babili

²⁹ Bo u Yesu na bamanyili bache bakwepamo mukaya aka Yeliko, ichilundilo icha bantu chikamukonka.

³⁰ Pakaba abafwamaso babili babo bakikalagha mulubazu ulwa musebo. Bo bivwa ukuti u Yesu akudumusannya, bakanda pakukolomoka ukuti, “Wee Mwene, u Mwana uwa Devedi, tupelele ichisa!”

³¹ Ichilundilo icha bantu chikabachemela nukubabuzya ukuti babanje myee. Loli bakakolomoka nkani bakati, “Mwene, Mwana uwa Devedi! Tupelele ichisa!”

³² U Yesu akima nukubitizya. Akabalalusya akati, “Nkimba mukulonda imbabombele ichoni?”

³³ Bakamula bakati, “Wee Mwene, tukulonda amaso ghitu ghighuke!”

³⁴ U Yesu akabapelela ichisa, akabalema amaso ghabo. Panapo na panapo bakanda pakwennya, po bakamukonka.