Matayi 2 - Ulufingo Ulupya

Abayeni aba kubufumilo ubwizuba

¹ U Yesu akapapiwa mukaya aka Betelehemu muchigaba icha Yudeya, pakabalilo aka Mwene u Helodi. Bo pachilapo akabalilo panandi, kukiza abamanya ntondwa aba kubufumilo ubwizuba ubwa kaya akakulu nkani aka Yelusalemu.

² Bakalalusya bakati, “Ali ko kwiyi umwana yuyo apapiwa pakuba we mwene uwa ba Yuda? Tukennya ulutondwa lwache kubufumilo ubwizuba. Po twiza pakumuchindika.”

³ Bo u Mwene u Helodi, poka na bantu bosi aba mu Yelusalemu bivwa zinizi, bakavulala mumoyo.

⁴ U Helodi akabitizya abaputi abasongo na bamanyisi ba Ndaghilo nukubalalusya ukuti, “Nkimba ko kwiyi kuko u Kilisitu akwiza pakupapiwa?”

⁵ Bakamula bakati, “Mukaya aka Betelehemu muchigaba icha Yudeya. Pakuti ivi vyo vivyo umulaghuzi akasimba ukuti,

⁶ ‘Wee Betelehemu, muchigaba icha Yudeya ute we munandi uwabumalilo mutwaya tosi utwa mu Yudeya. Mumwako mukwiza pakufuma umulongozi, yuyo akwiza pakubalongozya abantu bane aba Izilayeli.’ ”

⁷ U Helodi akabitizizya kubusyefu abayeni aba kubufumilo ubwizuba ukuti amanye akabalilo akenecho kako ulutondwa lukaboneka.

⁸ Akabatuma ku Betelehemu na mazyu aghakuti, “Bukagha mumulondelezye nkani umwana yunuyu, nanti mwamwagha mwize mumbuzye ukuti nane imbuke pakumuchindika.”

⁹ Bo bivwa kwa mwene bakabuka, po ulutondwa lulo bakalwennya kubufumilo ubwizuba lukalongolela nukwima pamwanya pabuzilo bubo umwana akabapo.

¹⁰ Bo balwennya ulutondwa lula, bakahoboka nkani.

¹¹ Bakinjila munyumba nukwennya umwana poka nu nyina u Maliya, bakafughama nukumuchindika. Bakafumya ivyabupi vyabo ivya golide, ni vyakununkila ivya lubani, sona na mafuta agha mila nukumupa umwana.

¹² Po bakanyokela kuchisu chabo pakwendela izila iyinji, pakuti u Chala akabasoka muchilota ukuti batakanyokele kwa Helodi.

Ukuchimbilila kuchisu icha Ijiputi

¹³ Bo babuka, uwantumi uwa Mwene akamubonekela u Yosefu muchilota nukumubuzya ukuti, “U Helodi akwiza pakulonda ukuti amughoghe umwana. Nyamuka musende umwana nu nyina nukuchimbilila kuchisu icha Ijiputi. Wikale kunuko mupaka inkubuzye ukuti wepeko.”

¹⁴ Po u Yosefu akanyamuka pabusiku, akasenda umwana nu nyina nukubuka nabo kuchisu icha Ijiputi,

¹⁵ kuko akikala mupaka u Helodi akafwa. Izi zikabombiwa pakukwanilisya zizyo u Mwene akanenela mu mulaghuzi ukuti, “Inkamwitizya umwana wane ukuti epemo mu Ijiputi.”

Ukughoghiwa kwa bana

¹⁶ Bo u Helodi azyaghannya ukuti abayeni aba kubufumilo ubwizuba bala bamuzimbula, akakalala nkani. Akalamula ukuti utwana tosi utulumendo mu Betelehemu na mutwaya utupalamani tosi, tuto tukaba na maka mabili nukwika pasi tughoghiwe. U Helodi akabomba zinizi ukuyana na mumo akamanyilila ku bayeni aba kubufumilo ubwizuba nizya kabalilo kako ulutondwa lula lukaboneka.

¹⁷ Zizyo umulaghuzi u Yelemiya akalaghula zikakwanilisiwa ukuti,

¹⁸ “Izyu likwivwika mu Lama, ukulila nu kufwifwitila ukukulu. U Lakelo akubalila abana bache akukana pakusangaluziwa pakuti bafuye.”

Ukunyokela ku Nazaleti

¹⁹ Bo u Helodi afwa bulo, uwantumi uwa Mwene akamubonekela u Yosefu muchilota mu Ijiputi.

²⁰ Akati, “Nyamuka, senda umwana nu nyina nyokela kuchisu icha Izilayeli, pakuti babo bakalondagha pakumughogha umwana bafuye.”

²¹ Po u Yosefu akanyamuka, akasenda umwana nu nyina nukunyokela ku Izilayeli.

²² Loli bo u Yosefu ivwa ukuti u Alikelabu amupyanite uwise u Mwene u Helodi muchigaba icha Yudeya, akanyila pakubukako. Akasokiwa muchilota, po akabuka muchigaba icha Galileya

²³ nukwikala mukaya aka Nazaleti. Po zizyo abalaghuzi bakalaghula zikakwanilisiwa ukuti, “Uyu akwiza pakwitiziwa umu Nazalini.”