Matayi 14 - Ulufingo Ulupya

Nizya bufwe ubwa Yohani Uwalozyo

¹ Pakabalilo kalakala u Helodi, u mwene uwa mu Galileya, akivwa zizyo abantu bakanenagha nizya Yesu.

² Akaghabuzya amakambala ghache akati, “Uyu we Yohani Uwalozyo yula, azyuka kubufwe. Ichi cho chifukwa ali na maka aghakupelela ivyika.”

³ Pakuti u Helodi akalamula ukuti bamuleme u Yohani. Bakamupinya ni mpingu nukumwighalila mujele. Akabomba zinizi pachifukwa icha Helodiya umuchi uwa wamwabo uwa Filipu,

⁴ pakuti u Yohani Uwalozyo akamubuzya u Helodi akati, “Indaghilo zyitu zitakwitikizya ukuti usemye u Helodiya!”

⁵ U Helodi akalondagha pakumughogha, loli akanyilagha aba bantu pakuti bakamusubila u Yohani pakuba mulaghuzi.

⁶ Pisiku ilya kusekela ukupapiwa kwa Helodi umwana umulindu uwa Helodiya akimba pantazi pakabukatila kosi kala. U Helodi akahoboka nkani

⁷ umwakuti akamulayizya ukuti, “Nkulapa ukuti inkwiza pakukupa chosi chicho ungalaba.”

⁸ Loli bo unyina amubuzya ichakuti alabe, umulindu yula akati, “Losi ulu mpanga umutu uwa Yohani Uwalozyo mumbale!”

⁹ U mwene u Helodi ichitima chikamulema, pachifukwa icha layizyo lilyo akalayizya pamaso pa bayeni bache bosi, po akalamula ukuti bamupe chicho umulindu yula akalaba.

¹⁰ Po akatuma yumo kujele ukuti adumule umutu uwa Yohani.

¹¹ Bakiza nu mutu ghula mumbale nukumupa umulindu, po umulindu yula akamupa unyina.

¹² Abamanyili aba Yohani bakiza, bakanyamula umuvimba wache nukughusyila. Po bakabuka pakumubuzya u Yesu.

U Yesu akulyesya ichilundilo ichikulu icha bantu

¹³ Bo u Yesu ivwa zinizi, akakwela mubwato nukwepapo, akabuka kubuzilo kuko kutakabako abantu. Abantu bakivwa zinizi, po bakafumamo mutwaya twabo nukumukonka pakwenda mulubazu.

¹⁴ U Yesu akika mubwato, sona bo ennya ichilundilo ichikulu icha bantu, ichililizi chikamulema, po akabapozya bosi babo bakaba babine.

¹⁵ Pachamabwila abamanyili bache bakiza pakumubuzya ukuti, “Kwila kale, muno mo munkolongo. Ubabwezye abantu ukuti babukaye mumaghunda na mutwaya tuto tuli papipi pakwilondela bene ivyakulya.”

¹⁶ U Yesu akamula akati, “Batakabwelaye. Amwe mwebene mubapanje ivyakulya!”

¹⁷ Bakamula bakati, “Pano tuli bulo ni vibama fayivi ni swi zibili.”

¹⁸ U Yesu akamula akati, “Zagha navyo kuno.”

¹⁹ Po akalamula abantu bala ukuti bikale pasi pisote. Akasenda ivibama fayivi ni swi zibili zila, akennya kumwanya nukupalizya kwa Chala. Akamenyannya ivibama vila nukubapa abamanyili bache, sona abamanyili bakagabila abantu.

²⁰ Abantu bosi bala bakalya nukwikuta. Po abamanyili bakanyamula ividudunga 12 vivyo vikizula ni vyakusyala.

²¹ Abantu babo bakalya bakabapo 5,000, ukusita ukubelengelako abakolo na bana.

U Yesu akwenda pamizi

²² Panapo na panapo u Yesu akababuzya abamanyili bache ukuti bakwele mubwato nukulongolela kwisila ilinji ilya nyanja, bo akubabwezya abantu.

²³ Bo ababwezya abantu, akakwela mwene pighamba pakwiputa. Bo ubusiku bwanda, u Yesu akabamwenekulakula.

²⁴ Pakabalilo kalakala ubwato bukaba kubutali munyanja, bukalwanagha na mayigha pakuti bukalumbilanagha ni mpepo.

²⁵ Pakasi-kasi pakabalilo aka fili nu sikisi koloko pandabindabi u Yesu akiza ku bamanyili bache, bo akwenda pamizi.

²⁶ Bo bamwennya akwenda pamizi, bakanyila nukukolomoka nu bogha ukuti, “Ichizyuka!”

²⁷ Panapo na panapo u Yesu akababuzya akati, “Mutakatetemaye! Nene. Mutakanyilaye.”

²⁸ Po u Pitala akati, “Mwene, nanti naloli wewe mbuzya ukuti nize kukwako bo inkwenda pamizi!”

²⁹ U Yesu akamula akati, “Zagha!” Po u Pitala akika mubwato, akanda pakwenda pamizi pakubuka kwa Yesu.

³⁰ Loli bo ennya impepo iyamaka, akanyila nukwanda pakudwiba mumizi. Akalila akati, “Mwene, mpoka!”

³¹ Umwalubilolubilo u Yesu akagholosya inyobe yache nukumulema nukuti, “Awe we walwitiko ulunandi! Nkimba choni chicho ukilamwa.”

³² Bosi babili bala bakakwela mubwato mula, po impepo yikaleka pakukuka.

³³ Po abamanyili mubwato bakamuchindika u Yesu, bakanena bakati, “Naloli we Mwana uwa Chala!”

U Yesu akupozya umubine mu Genesaleti

³⁴ Bakaloboka inyanja yila nukufika mukaya aka Genesaleti.

³⁵ Kulakula abantu bakamumanya ukuti akaba we Yesu nukutuma abantu ukuti bize na babine kwa Yesu ukufuma muvigaba vyosi ivipalamani.

³⁶ Bakamulaba ukuti abitikizye ababine pakupalamasya bulo mulubazu ulwa mwenda wache. Po abantu bosi babo bakaghupalamasya, bakapolagha.