Maliko 14 - Ulufingo Ulupya

Ulubatiko ulwakumughoghela u Yesu

¹ Kukasyalako bulo amasiku mabili ukuti Ulusekelo ulwa Pasa nu Lusekelo ulwa Chibama ichisita chilungo lubeko. Abaputi abasongo na bamanyisi aba Ndaghilo bakalondagha izila iyakubusyefu iyakumulemela u Yesu nukumughogha.

² Bakati, “Tutakazibombe pakabalilo aka lusekelo pachifukwa chakuti abantu banganda ivyongo.”

Umukolo akumupakazya u Yesu amafuta mu Betaniya

³ U Yesu akaba mukaya aka Betaniya munyumba iya Simoni, umuntu yuyo akatamiwapo na mambombo. Bo u Yesu ali pakulya, umukolo yumo akiza ni botolo ilya alabasita ilyizule na mafuta aghamutengo nkani aghakununkila agha nalidi, ghagho batakongannyamo chimo. Umukolo akabontola akamutu aka botolo nukumukupulila u Yesu pamutu.

⁴ Abantu bamo palapala bakakalala nukunenezannya benebene ukuti, “Nkimba choni chicho akunangannya amafuta aghakununkila?

⁵ Naloli ngali ghaghuliziwa ni salabazya izyakuchila 300 nukubapazyo abapina!” Bakamukalalila nkani umukolo yula.

⁶ Loli u Yesu akati, “Muleke! Nkimba choni chicho mukumutamya umukolo uyu? Chicho ambombela chiza nkani.

⁷ Akabalilo kosi muli nabo abapina, sona akabalilo kosi kako mukulonda, mungabavwa. Loli mute mubanje nane akabalilo kosi.

⁸ Umukolo uyu abomba chicho abaghiye pakuchibomba; apungulila amafuta pamubili wane pakughuyannya zila bo akabalilo akakusyiliwa kwane katakwanite.

⁹ Naloli inkubabuzya ukuti kosi kuko Amazyu Amiza agha ghakulumbililiwa muchisu chosi ichapasi, chicho abomba umukolo uyu chikwiza pakuneniwa ukuti abantu bamukumbukilayepo.”

U Yudasi akumubika u Yesu munyobe izya balwani

¹⁰ U Yudasi Sikaliyoti, yumo uwa bamanyili 12, akabuka pakukomana na baputi abasongo ukuti amubike u Yesu munyobe zyabo.

¹¹ Bo bivwa zinizi bakahoboka nkani, sona bakalayizya ukuti bakwiza pakumupa indalama. Po u Yudasi akanda pakulonda akabalilo akiza akakumubikila u Yesu munyobe zyabo.

U Yesu na bamanyili bache bakulya ivya pa Ulusekelo ulwa Pasa

¹² Pisiku ilyakwanda ilya Lusekelo ulwa Chibama ichisita chilungo, isiku lilyo bakaghogha umwana uwa ng'ozi uwa pachakulya icha Pasa, abamanyili aba Yesu bakamulalusya bakati, “Nkimba ukulonda ukuti tuluyanizizye kwiyi?”

¹³ Po u Yesu akatuma babili mu bamanyili bache nukubabuzya ukuti, “Bukagha mukaya akakulu nkani. Mukomane nu mwanavuli anyamuye isonta iya mizi. Mumukonke

¹⁴ mupaka munyumba yiyo akwinjilamo nukunena nu mwenenyumba ukuti, ‘Umumanyisi ukulalusya akuti nkimba ichipinda chili ko kwiyi chicho ane na bamanyili bane tukwiza pakusekelelamo Ulusekelo ulwa Pasa?’

¹⁵ Po akwiza pakubalanjizya ichipinda ichikulu chicho chili pamwanya pachamwabo, mumo vyosi vivyo vikulondiwa viyaniziwe. Mulamula mutuyanizizye vyosi.”

¹⁶ Abamanyili bala bakanyamuka nukwinjila mukaya akakulu mula nukwagha ivintu vyosi vili bulo mumo u Yesu akababuzizya. Po bakayannya Ulusekelo ulwa Pasa.

¹⁷ Bo kwila, u Yesu akiza poka na bamanyili 12 bala.

¹⁸ Bo bali pakulya, u Yesu akati, “Naloli inkubabuzya ukuti umuntu weka pakasi papinyu, yuyo ali pakulya poka nane, akwiza pakumbika munyobe izya balwani.”

¹⁹ Abamanyili bala bakayimba nkani mumoyo nukwanda wekaweka pakumulalusya u Yesu ukuti, “Naloli, ningaba nene?”

²⁰ U Yesu akamula akati, “Umuntu yumo pakasi papinyu amwe mwe 12, yuyo akusazila poka nane ichibama mumbale.

²¹ U Mwana uwa Muntu akwiza pakufwa ukuyana na Masimbo. Loli chighune nkani nu muntu yuyo akumubika u Mwana uwa Muntu munyobe izya balwani. Chikaba chizapo ukuti umuntu yula ngali atakapapiwanga!”

Ichakulya icha Mwene

²² Bo bali pakulya, u Yesu akasenda ichibama, akamupalizya u Chala nukuchimenyannya. Akabapa abamanyili bache nukuti, “Senda, ughu gho mubili wane.”

²³ Po akasenda ulubako ulwa vinyo nukupalizya kwa Chala nukubapa abamanyili. Bosi bakang'wela uvinyo mulubako lulalula.

²⁴ U Yesu akati, “Ili lyo libanda lyane ilyakusimikizya ulufingo ulwa Chala, lilyo lyatonya pachifukwa icha bantu abinji.

²⁵ Inkubabuzya ukuti ntakwiza pakung'welapo nalumolumo uvinyo uyu mupaka pisiku lilyo inkwiza pakung'wela uvinyo umupya mu Bumwene ubwa Chala.”

²⁶ Po bakimba, ulwimbo ulwakumuchindika u Chala nukubuka pighamba ilya Misyunguti.

U Yesu akunenela zila ukuti u Pitala akwiza pakumukana

²⁷ U Yesu akababuzya akati, “Mwebosi mukwiza pakuntoloka, pakuti Amasimbo ghakuti, ‘Nkwiza pakumughogha umudimi, po ing'ozi zyosi zikwiza pakunyampana.’

²⁸ Loli bo nazyuka kubufwe, inkwiza pakulongolela ku Galileya.”

²⁹ U Pitala akamula akati, “Intakwiza pakukuleka nalumo, napapo abanji bosi bangachibomba.”

³⁰ U Yesu akamubuzya u Pitala akati, “Inkukubuzya ukuti bo ukolwe atakokolikite kabili ubusiku ubu, ukwiza pakunkana katatu ukuti utamenye.”

³¹ Loli u Pitala akamula na maka nkani akati, “Napapo imbaghiye pakufwa poka nawe ntakwiza pakunenapo nalumolumo bunubu.” Bope abamanyili abanji bosi bala bakanena bunubu.

U Yesu akwiputa mu Getisemani

³² U Yesu akabuka na bamanyili bache kubuzilo bubo bukwitiziwanga ukuti we Getisemani, po akababuzya abamanyili bache akati, “Ikala pano, nabuka pakwiputa.”

³³ Akamusenda u Pitala, u Yakobo nu Yohani. Akaba ni chitima nukuyimba nkani mumoyo wache.

³⁴ Akababuzya akati, “Umoyo wane wizuye ni chitima ichikulu nkani ichakufwa nacho. Ikala pano nukuba maso.”

³⁵ Akatantama panandi nukwisumba pasi nukwiputa ukuti nanti zingabombiwa, akabalilo aka ntamyo kala kamuchile.

³⁶ Akanena sona akati, “Wee Tata, wee Tata wane! Ungabomba ivintu vyosi. Efya ulubako ulwa ntamyo ulu kukwane. Chitakabe mumo inkulondela awe, loli mumo ukulondela.”

³⁷ Po akiza nukubagha abamanyili bache batatu bala bali pakukonona. Akamulalusya u Pitala akati, “Simoni, ughonite? Nkimba upotizwe pakuba maso akabalilo akanandi aka?

³⁸ Mubanje maso nukwiputa ukuti mutakawile munjelo. Umuzimu ghukulonda, loli ubuntu bute na maka.”

³⁹ Akabuka sona nukwiputa na mazyu ghali ghoka.

⁴⁰ Akanyokela sona nukubagha bali pakukonona pakuti amaso ghabo ghakizula nu tulo. Po batakaba ni chakunena.

⁴¹ Bo iza akabutatu, akababuzya akati, “Nkimba muchili mughonite nu kutuzya? Mpela! Akabalilo kakwana, u Mwana uwa Muntu ali pakubikiwa munyobe izya bantu abambibi.

⁴² Nyamuka twende tubukaye. Umuntu yuyo akumbika munyobe izya balwani uyo afika!”

Bakumulema u Yesu

⁴³ Bo u Yesu achili akunena, u Yudasi weka uwa bamanyili 12 bala, akafika. Akiza poka ni chilundilo chicho chikanyamula abapanga ni ntughu, chicho chikatumiwa na baputi abasongo, na bamanyisi aba Ndaghilo, sona na balongozi aba Chiyuda.

⁴⁴ Umuntu yuyo akamubika u Yesu munyobe izya balwani akachipa ichilundilo ichimanyilo ichakuti, “Umuntu yuyo inkumulamuka pakumufyofyonta, we yuyo mukumulonda. Mumuleme nukumusenda ukuti atakachimbile.”

⁴⁵ Bo u Yudasi afika, umwalubilolubilo akabuka kwa Yesu nukuti, “Wee Mumanyisi!” Po akamufyofyonta.

⁴⁶ Po abantu bala bakamulema u Yesu nukumupinya.

⁴⁷ Loli weka uwa bantu babo bakimilila palapala akawesa upanga wache, akamubola umuzya uwa Muputi Usongo nukudumula ikutu lyache.

⁴⁸ Po u Yesu akabalalusya akati, “Nkimba mukwiza na bapanga ni ntughu ukuti mundeme ngati ne livyondongo?

⁴⁹ Isiku ni siku nabanga namwe mu Nyumba iya Chala pakumanyizya, loli mutakandema. Zinizi zyabombiwa ukuti Amasimbo ghakwanilisiwe.”

⁵⁰ Po abamanyili bache bosi bakachimbila nukumuleka mwene.

⁵¹ Umulumendo yumo, yuyo atakavwala chimo mukasi, loli akinnyembetelela nu mwenda wene, akamukonkagha u Yesu. Abantu bala bakayezya pakumulema,

⁵² loli akachimbila nkule nukubalekela umwenda.

U Yesu pamaso pa balongi

⁵³ Po u Yesu bakabuka nawe kunyumba iya Muputi Usongo. Kulakula abaputi abasongo bosi, na balongozi aba Chiyuda, sona na bamanyisi aba Ndaghilo bakabungana poka.

⁵⁴ U Pitala akakonkagha pabutalipo nukwinjila mulubinjilo ulwa nyumba iya Muputi Usongo. Palapala akikala pasi poka na balindilili nukota nabo umoto.

⁵⁵ Abaputi abasongo na balongi bosi bakayezya pakubwagha ubwakaboni ubwabumyasi ubwakumughoghela u Yesu, loli batakabwagha nabumo-bumo.

⁵⁶ Abakaboni abinji bakanena ubumyasi, loli ubwakaboni bwabo butakayana.

⁵⁷ Po abakaboni bamo bakimilila nukumutamantila u Yesu ukuti,

⁵⁸ “Tukamwivwa umuntu uyu akuti, ‘Nkwiza pakuyimongolannya Inyumba iya Chala iyi, yiyo abantu bazengite, po bo ghachilapo amasiku matatu inkwiza pakuzenga iyinji yiyo yitazengiwe na bantu.’ ”

⁵⁹ Loli pope bulo ubwakaboni bwabo butakayana.

⁶⁰ Umuputi Usongo akimilila pantazi papabo nukumulalusya u Yesu ukuti, “Nkimba ute ni lyamulo pa zizyo abantu banaba bakukunenela?”

⁶¹ Loli u Yesu akaba myee, atakanenapo chimo. Umuputi Usongo akamulalusya sona akati, “Nkimba awe we Kilisitu, u Mwana uwa Chala Umusayiwa?”

⁶² U Yesu akamula akati, “Nene! Mwebosi mukwiza pakumwennya u Mwana uwa Muntu ikaye kunyobe indilo iya Chala Uwamaka Ghosi akwiza mu mabingu!”

⁶³ Umuputi Usongo yula mu bukalale akazepula inkazo yache nukuti, “Nkimba tukulonda sona abakaboni abanji?

⁶⁴ Mwivuye mwebene mumo amusamuliye u Chala. Nkimba mukuti ichoni?” Bosi bakivwana ukuti aghoghiwanje.

⁶⁵ Bamo bakanda pakumufwinila amati u Yesu, bakamuzigha kumaso nukumukoma na mapi. Bakati, “Sakizya, we wenu akukoma!” Abalindilili bakamusenda nukumukoma.

U Pitala akumukana u Yesu

⁶⁶ U Pitala akaba achili ikaye pasi mulubinjilo ulwa nyumba iya Muputi Usongo, po uwambombo umulindu uwa Muputi Usongo akiza mulamula.

⁶⁷ Bo amwennya u Pitala ali pakota umoto, akamwenelezya nukuti, “Nawe bulo ukabanga poka nu Yesu uwa mu Nazaleti.”

⁶⁸ Loli u Pitala akakana akati, “Ntazimenye, ntakwivwisya zizyo ukunena.” Po akepapo nukubuka pamulyango. Umwalubilolubilo ukolwe akakokolika.

⁶⁹ Umulindu yula akamwennya sona nukwanda pakubabuzya abantu babo bakimililagha palapala ukuti, “Usongo uyu uwa bamo uwa bantu banaba”

⁷⁰ Loli u Pitala akakana sona. Bo pachilapo bulo akabalilo, abantu babo bakimilila palapala bakamubuzya u Pitala ukuti, “Naloli nawe bulo we uwa bamo uwa bantu banaba pakuti nawe bulo we mu Galileya.”

⁷¹ Po u Pitala akati, “Nkulapa ukuti nkunena ubwanaloli! U Chala anfunde nanti inkutamanta. Naloli ntamumenye umuntu yuyo mukumunena.”

⁷² Panapo ukolwe akakokolika akabubili, po u Pitala akakumbuka zizyo u Yesu akamubuzya ukuti, “Bo ukolwe atakokolikite akabubili, ukwiza pakunkana katatu ukuti utamenye.” Po u Pitala akanda pakulila na masozi.