Maliko 10 - Ulufingo Ulupya

Nizya soka

¹ U Yesu akepamo mu Kapelinahumu nukubuka kuchigaba icha Yudeya nukuloboka ulusoko ulwa Yolodani. Ichilundilo chikiza sona kukwache, po akabamanyizya ukuyana na mumo akabamanyizizyanga bwila.

² Aba Falisayi bamo bakiza kukwache nukuyezya pakumutegha mukanenele. Bakamulalusya bakati, “Tubuzye, nkimba Indaghilo zyitu zikwitikizya ukuti umwanavuli amusosye umuchi wache?”

³ U Yesu akamula akati, “Nkimba lulaghilo loni lulo u Mozesi akabapa amwe?”

⁴ Bakamula bakati, “U Mozesi akitikizya ukuti umwanavuli asimbe ukalata uwakusosya, po angamusosya umuchi wache.”

⁵ U Yesu akabamula akati, “U Mozesi akabasimbila ululaghilo ulu pachifukwa chakuti amoyo ghinyu makafu nkani.

⁶ Loli ukwandila kubwandilo, bo u Chala apela ivintu vyosi ukuyana na Masimbo aghakuti u Chala akapela umwanavuli nu mukolo.

⁷ Pachifukwa ichi, umwanavuli akwiza pakumuleka uwise nu nyina nukumamatilana poka nu muchi wache.

⁸ Po babili banaba bakwiza pakuba mubili ghoka. Po bate bantu babili sona, loli mubili ghoka.

⁹ Po chicho u Chala amamatizya poka patakabepo umuntu uwakuchimamatula.”

¹⁰ Bo banyokela sona munyumba, abamanyili bakamulalusya u Yesu izya fundo yiyo akanena.

¹¹ U Yesu akababuzya akati, “Nanti umwanavuli akumusosya umuchi nukusenda uyunji, kokuti akumunangila umuchi wache.

¹² Umwakuyana bulo, nanti umukolo nanti akusoka nukusendiwa nu mwanavuli uyunji, kokuti akumunangila umulume wache.”

U Yesu akubasaya abana

¹³ Abantu bamo bakiza na bana kwa Yesu ukuti abasaye pakubika inyobe zyache, loli abamanyili bache bakabachemela.

¹⁴ Bo u Yesu azyaghannya, akakalala nkani nukubabuzya abamanyili bache ukuti, “Baleke abana bize kukwane, mutakabakanizye pakuti Ubumwene ubwa Chala ubwa bantu babo bali ngati bo aba.

¹⁵ Naloli inkubabuzya ukuti umuntu wesi yuyo atakupokela Ubumwene ubwa Chala ngati we mwana, ate akinjilemo nalumo.”

¹⁶ Po akabafukatila abana bala, nukubasaya pakubika inyobe zyache.

Nizya muntu umukabi

¹⁷ Bo u Yesu akwendelela nu bulendo bwache, umuntu yumo akamuchimbilila, akumufughamilila nukumulalusya ukuti, “Wee Mumanyisi umwiza, nkimba imbombe ichoni ukuti impokele ubumi ubwa bwila na bwila?”

¹⁸ U Yesu akamulalusya akati, “Nkimba choni chicho ukuti ne mwiza? Nayumo umuntu yuyo mwiza, loli u Chala mwene.

¹⁹ Ughamenye amalamulo aghakuti, ‘Utakaghoghaye, utakalowaye, utakibaye, utakabanje we kaboni umumyasi, utakazimbulaye, sona chindika ughuso nu nyoko.’ ”

²⁰ Umuntu yula akati, “Wee Mumanyisi, ukwandila kubwana bwane nakonka amalamulo ghosi ghanagha.”

²¹ U Yesu akamwenelezya nu lughano nukumubuzya ukuti, “Ukusobelwa ichintu choka bulo: Kaghulizye vyosi vivyo uli navyo nukubapa abapina indalama, po ukwiza pakuba nu bukabi kumwanya, po wize nukunkonka.”

²² Bo umuntu ivwa zinizi, icheni chache chikasiluka, akabuka ni chitima pachifukwa chakuti akaba mukabi nkani.

²³ U Yesu akatalankannya nukubabuzya abamanyili bache ukuti, “Chipala nkani ukuti abantu abakabi binjile mu Bumwene ubwa Chala!”

²⁴ Amazyu agha ghakabaswighizya nkani abamanyili, loli u Yesu akanena sona akati, “Naloli bana bane, chipala nkani pakwinjila mu Bumwene ubwa Chala!

²⁵ Chipala nkani ukuti umuntu umukabi injile mu Bumwene ubwa Chala, ukuchila ukuti ingamila yinjile mu kabwazi aka sindano.”

²⁶ Abamanyili bakaswigha nkani nukulaluzannya ukuti, “Po nkimba we wenu angapokiwa?”

²⁷ U Yesu akabenelezya nukubamula ukuti, “Zinizi zitangabombiwa nu muntu, loli nu Chala. Pakuti nu Chala ichintu chosi chipepe bulo.”

²⁸ U Pitala akati, “Ennya, twavileka vyosi nukukukonka.”

²⁹ U Yesu akababuzya akati, “Naloli inkubabuzya ukuti umuntu wesi yuyo akalekite akaya, pamo abawamwabo, pamo abayemba, pamo uwise, pamo unyina, pamo abana, pamo amaghunda, pachifukwa icha nene, pamo icha Mazyu Amiza,

³⁰ pakabalilo aka, akwiza pakupokela ivintu ivyinji ukuchilapo 100 ivya nyumba, na bawamwabo, na bayemba, na banyina, na bana na maghunda poka nu kuvwimiwa bulo. Pakabalilo kako akwiza pakupokela ubumi ubwa bwila na bwila.

³¹ Loli abinji abakwanda bakwiza pakuba babumalilo, sona abinji aba bumalilo bakwiza pakuba bakwanda.”

U Yesu akunenela zila akabutatu nizya bufwe nu kuzyuka kwache

³² Akabalilo aka u Yesu na bamanyili bache bakaba pabulendo ubwakubuka kukaya aka Yelusalemu. U Yesu akalongolela, abamanyili bakaba nu bogha. Sona abantu babo bakabakonkagha bakanyilagha. U Yesu akabitizya abamanyili 12 bala palubazu nukubabuzya ivintu vivyo vikwiza pakumuwila.

³³ Akababuzya akati, “Ivwa kuno, tukubuka mu Yelusalemu, mumo u Mwana uwa Muntu akwiza pakubikiwa munyobe izya baputi abasongo na bamanyisi aba Ndaghilo. Bakwiza pakumulonga ukuti aghoghiwe nukumubika munyobe izya bantu babo bate ba Yuda,

³⁴ babo bakwiza pakumobezya, ukumufwinila amati, ukumusyempa nukumughogha; loli bo ghachilapo amasiku matatu akwiza pakuzyuka kubufwe.”

Ukulaba kwa nyina uwa Yakobo nu Yohani

³⁵ Pisinda pache u Yakobo nu Yohani, abana aba Zebediya bakiza kwa Yesu nukuti, “Wee Mumanyisi, chilipo chimo chicho tukulonda ukuti utubombele.”

³⁶ U Yesu akabalalusya akati, “Nkimba mukulonda ukuti imbabombele ichoni?”

³⁷ Bakamwamula bakati, “Bo wikala pachitengo chako mu Bumwene bwako ubwa buchindamu tukulonda ukuti awe utwitikizye twikale, yumo kunyobe yako indilo, uyunji kumongo.”

³⁸ U Yesu akababuzya akati, “Mutakuchimanya chicho mukulaba. Nkimba mungang'wela mulubako ulwa ntamyo lulo imbaghiye pakung'welelamo? Nkimba mungoziwa umwakuyana bulo na mumo imbaghiye pakoziwa?”

³⁹ Bakamula bakati, “Ee, tungazibomba.” U Yesu akabamula akati, “Naloli mungang'wela mulubako lulo imbaghiye pakung'welelamo nukoziwa ukuyana na mumo imbaghiye pakoziwa.

⁴⁰ Loli inte nu bulaghili ubwakusala uwakwikala kunyobe yane indilo ni yamongo. We Chala mwene yuyo akupa ubuzilo abantu babo abayanizizya.”

⁴¹ Bo abamanyili abanji 10 bala bivwa zinizi, bakamukalalila nkani u Yohani nu Yakobo.

⁴² Po u Yesu akabitizya abamanyili bache bosi poka nukubabuzya ukuti, “Muzimenye ukuti babo bakuneniwa ukuti balaghili aba bantu babo bate ba Yuda bali na maka pa bantu babo; sona abalongozi bali nu bulaghili bosi.

⁴³ Loli ichi chite momumo chibeleye pakasi papinyu. Nanti umuntu yumo akulonda pakuba we songo, kokuti abanje mubombi uwa bosi.

⁴⁴ Nanti umuntu yumo akulonda pakuba wakwanda, kokuti abanje muzya uwa bosi.

⁴⁵ Pakuti u Mwana uwa Muntu atakiza ukuti bamubombelaye, loli pakubabombela nukubapa ubumi bwache ukuti abapoke abantu abinji.”

U Yesu akumupozya u Batimeyo umufwamaso

⁴⁶ Bakafika mukaya aka Yeliko, bo u Yesu na bamanyili bache poka ni chilundilo bakepamo mukaya kala, umufwamaso uwakulaba-laba, yuyo akaba we Batimeyo umwana uwa Timeyo akikalagha mulubazu ulwa musebo nukulaba.

⁴⁷ Bo ivwa ukuti we Yesu uwa mu Nazaleti, akanda pakukolomoka ukuti, “Wee Yesu, u Mwana uwa Devedi, umpelele ichisa!”

⁴⁸ Abantu abinji bakamuchemela ukuti abanje myee. Loli akakolomoka nkani ukuti, “Mwana uwa Devedi, umpelele ichisa!”

⁴⁹ U Yesu akima nukubabuzya abantu bala ukuti, “Mwitizye.” Po bakamwitizya umufwamaso yula nukumubuzya ukuti, “Jimba umoyo! Nyamuka akukwitizya.”

⁵⁰ Po akaghusumba umwenda, akanyela nukubuka kwa Yesu.

⁵¹ U Yesu akamulalusya akati, “Nkimba ukulonda inkubombele ichoni.” Umufwamaso akamula akati, “Wee Mumanyisi, nkulonda pakwennya sona.”

⁵² U Yesu akamubuzya akati, “Bukagha, ulwitiko lwako lwakupozya.” Panapo na panapo umuntu yula akanda pakwennya nukumukonka u Yesu pa bulendo bula.