Luka 3 - Ulufingo Ulupya

Ubulumbilili ubwa Yohani Uwalozyo

¹ Ghukaba mwaka uwa 15, bo u Kesale u Tibeliyasi akulaghila; u Pontiyo Pilati akaba mulaghili uwa chigaba icha Yudeya; u Helodi akaba mulaghili uwa chigaba icha Galileya, sona uwamwabo u Filipu akaba mulaghili uwa chigaba icha Ituliya nu Tilakoniti; u Lusaniya akaba mulaghili uwa chigaba icha Abileni,

² sona u Anasi nu Kayafa bakaba Baputi Abasongo nkani. Pakabalilo kalakala u Chala akanena amazyu kwa Yohani umwana uwa Zekaliya munkolongo.

³ Po u Yohani akenda muchigaba chosi icha lusoko ulwa Yolodani nukulumbilila pakasi pa bantu ukuti, “Pinduka nukuzileka imbibi zyinyu nukoziwa, po u Chala akwiza pakubahobokela imbibi zyinyu.”

⁴ Pakuti zisimbiwe mwibuku ilya mulaghuzi u Yesaya ukuti, “Izyu ilya muntu yumo likukolomoka munkolongo likuti, ‘Yannya umusebo uwa Mwene, gholosya izila ukuti endemo!

⁵ Amakombe ghosi ghafukiliwe, ighamba lyosi na kaghamba kosi vitenganiziwe. Izila zyosi inyongane zigholosiwe, sona utuzila utwa tubanka tutenganiziwe.

⁶ Abantu bosi bakwiza pakwennya ubupoki ubwa Chala!’ ”

⁷ Ichilundilo icha bantu chikiza kukwache ukuti choziwe. Po akababuzya akati, “Amwe mwe bana aba njoka! Nkimba we wenu abasokite pakuluchimbila ulufundo ulwa Chala lulo lukwiza?

⁸ Bombagha imbombo izyakulanjizya ukuti naloli mwapinduka nukuzileka imbibi zyinyu. Mutakinenaye mwebene ukuti, ‘U Abulahamu we munyenya witu.’ Inkubabuzya ukuti u Chala angaghapela amabwe agha pakuba baluko aba Abulahamu.

⁹ Intemo yiyaniziwe kale pakudumula amakwi pasi pamagululuzi. Ikwi lyosi lilyo litakwela ivikomwa inyiza likwiza pakudumuliwa nukusumbiwa pamoto.”

¹⁰ Po ichilundilo icha bantu chikamulalusya chikati, “Nkimba tubombaye ichoni?”

¹¹ U Yohani akamula akati, “Umuntu wesi yuyo ali na menda mabili amupeko ghoka uwamwabo yuyo ate nagho, sona umuntu wesi yuyo ali ni chakulya amugabileko uwamwabo.”

¹² Bope abasonkezya sonko bakiza pakoziwa nukulalusya ukuti, “Mumanyisi, nkimba tubombaye ichoni?”

¹³ U Yohani akabamula akati, “Mutakasonkezyanje umusonko ukuchila mumo mukalamuliliwa.”

¹⁴ Abasikali abankondo bope bakiza bakalalusya bakati, “Po nkimba aswe, tubombaye ichoni?” Akati, “Mutakabafyulaye indalama abantu pamo ukumutamantila umuntu na yumo-yumo. Mwikutaye na malipilo ghinyu.”

¹⁵ Ulusubilo ulwa bantu lukanda pakukula, sona bakanda pakuswigha ukuti pamo u Yohani angaba we Kilisitu.

¹⁶ Po u Yohani akababuzya abantu bosi akati, “Ane inkubozya na mizi, loli pisinda papane pakwiza yumo uwamaka ukunchila. Ane ntabaghiye napo panandi pakwinama nukusatula utupinyilo utwa nkwato zyache. Akwiza pakubozya nu Muzimu Umuzelu, sona nu moto.

¹⁷ Ali nu luselo munyobe zyache ulwakupetela ingano. Po akwiza pakubika ingano muntamba, loli ilyelelo likwiza pakochiwa nu moto, ghugho ghutakuzimapo nalumolumo.”

¹⁸ U Yohani akalumbilila Amazyu Amiza muzila inyinji izyakulekanalekana pakasi pa bantu nukubasoka nkani.

¹⁹ Loli u Yohani akamunena nkani umwene u Helodi umulaghili, pachifukwa chakuti akamusenda umuchi uwa wamwabo u Helodiya, sona akabomba ivintu ivyinji ivibibi.

²⁰ Pisinda pache u Helodi akabomba ichintu ichibibi nkani ukuchilapo pakumubika u Yohani mujele.

Ukoziwa kwa Yesu

²¹ Bo abantu bosi boziwa, u Yesu wepe akoziwa. Bo akwiputa, kumwanya kukighuka,

²² sona u Muzimu Umuzelu akamwikila ngati yo nkunda. Po izyu likivwika kumwanya likati, “Awe we Mwana wane umughaniwa. Ihobokite nkani nawe.”

Abanyenya aba Yesu

²³ Bo u Yesu anda imbombo yache akaba na maka 30. Abantu bakinong'onagha ukuti akaba mwana uwa Yosefu, yuyo akaba mwana uwa Heli,

²⁴ nu mwana uwa Matati, nu mwana uwa Levi, nu mwana uwa Meliki, nu mwana uwa Yanayi, nu mwana uwa Yosefu,

²⁵ Umwana uwa Matatiya, nu mwana uwa Amosi, nu mwana uwa Nahumi, nu mwana uwa Esili, nu mwana uwa Nagayi,

²⁶ nu mwana uwa Mati, nu mwana uwa Matatiya, nu mwana uwa Semeni, nu mwana uwa Yozeki, nu mwana uwa Yoda,

²⁷ nu mwana uwa Yohanani, nu mwana uwa Lesa, nu mwana uwa Zelubabelo, nu mwana uwa Shelatiyele, nu mwana uwa Neli,

²⁸ nu mwana uwa Meliki, nu mwana uwa Adi, nu mwana uwa Kosamu, nu mwana uwa Elimadamu, nu mwana uwa Elo,

²⁹ nu mwana uwa Yoshwa, nu mwana uwa Eliyezeli, nu mwana uwa Yolimu, nu mwana uwa Matati, nu mwana uwa Levi,

³⁰ nu mwana uwa Simiyoni, nu mwana uwa Yuda, nu mwana uwa Yosefu, nu mwana uwa Yona mu, nu mwana uwa Eliyakimu,

³¹ nu mwana uwa Meleya, nu mwana uwa Mena, nu mwana uwa Matata, nu mwana uwa Natani, nu mwana uwa Devedi,

³² nu mwana uwa Yese, nu mwana uwa Obedi, nu mwana uwa Bowazi, nu mwana uwa Salimoni, nu mwana uwa Nashoni,

³³ nu mwana uwa Aminadabu, nu mwana uwa Adimini, nu mwana uwa Alini, nu mwana uwa Heziloni, nu mwana uwa Pelezi, nu mwana uwa Yuda,

³⁴ nu mwana uwa Yakobo, nu mwana uwa Yisaki, nu mwana uwa Abulahamu, nu mwana uwa Tela, nu mwana uwa Naholi,

³⁵ nu mwana uwa Seluki, nu mwana uwa Lebu, nu mwana uwa Pele, nu mwana uwa Ebelo, nu mwana uwa Shela,

³⁶ nu mwana uwa Kayinani, nu mwana uwa Alifakisadi, nu mwana uwa Shemu, nu mwana uwa Nowa, nu mwana uwa Lameki,

³⁷ nu mwana uwa Metusela, nu mwana uwa Enoki, nu mwana uwa Yaledi, nu mwana uwa Mahalalele, nu mwana uwa Kayinani,

³⁸ nu mwana uwa Enoshi, nu mwana uwa Seti, nu mwana uwa Adamu, nu mwana uwa Chala.