Luka 1 - Ulufingo Ulupya1 Muchindikiwa Tiyofilasi: Abantu abinji bayezya nkani pakulingannya ivintu vyosi vivyo vikabombiwa pakasi papitu. 2 Bakasimba vivyo tubuziwe na babo bakavyennya na maso ukwandila ko kubwandilo, sona na babo bakalumbilila Amazyu Amiza. 3 Pakuti ane ne mwene nabuzikizya akiza ivintu vyosi ivi ukwandila ko kubwandilo, ninong'ona ukuti chizapo ukuti inkusimbile we Muchindikiwa Tiyofilasi, ivintu ivi mulubatiko lwache. 4 Nabomba zinizi ukuti umanye ubwanaloli bosi ubwa vintu vivyo umanyiziwe. Ukupapiwa kwa Yohani Uwalozyo kwafumusiwa 5 Pakabalilo kako bo u Helodi akaba we mwene uwa muchigaba icha Yudeya, kukabako umuputi yuyo akaba we Zekaliya, yuyo akaba uwa kabukatila aka buputi ubwa Abiya. Umuchi akaba we Elizabeti, yuyo akaba waluko ulwa Aloni. 6 Bosi babili bakaba bantu abagholosu pamaso pa Chala nukukonka akiza indaghilo na malamulo ghosi agha Mwene. 7 Batakaba na bana pachifukwa chakuti u Elizabeti akaba mughumba, sona yuyo nu Zekaliya bakaba baghosi. 8 Isiku limo u Zekaliya akabombagha imbombo yache iya buputi mu Nyumba iya Chala, pakuti kakaba kabalilo aka kabukatila kache. 9 Ukuyana ni nyiho izya buputi, akasaliwa pakupanga amayele ukuti oche ivyakununkila pachighemo. Po akabuka mu Nyumba iya Chala, 10 bo ichilundilo icha bantu chikwiputa kuzi pakabalilo kako ivyakununkila vikochiwanga. 11 Uwantumi uwa Mwene akamubonekela, akimilila kunyobe indilo iya chighemo, papo ivyakununkila vikochiwanga. 12 Bo u Zekaliya amwennya, akachenuka, po akanyila. 13 Loli uwantumi yula akamubuzya akati, “Zekaliya, utakanyilaye! U Chala ivwa ulwiputo lwako. Umuchi wako u Elizabeti akwiza pakupapa umwana umulumendo, po ukwiza pakumwita ukuti we Yohani. 14 Bo umwana uyu apapiwa, ukwiza pakusekela nu kuhoboka nkani, sona bope abantu abinji bulo bakwiza pakuhoboka nkani! 15 Akwiza pakuba muntu uwapamwanya pamaso pa Mwene. Atakang'welepo nalumolumo uvinyo, pamo ichakung'wela chicho angakolwa nacho. Ukwandila pisiku lilyo apapiwa, akwiza pakwizula nu Muzimu Umuzelu 16 nukubanyosezya abantu abinji aba Izilayeli kwa Mwene u Chala wabo. 17 Akwiza pakulongolela kuntazi kwa Mwene mubuzimu na maka ngati we mulaghuzi u Eliya, sona akwiza pakubamanyannya abapapi na bana babo. Akwiza pakubapindula abasita ukwivwila ukuti babanje bantu bagholosu. Pakubomba bunubu akwiza pakubayannya abantu nizya ukwiza kwa Mwene.” 18 U Zekaliya akamulalusya uwantumi yula akati, “Nkwiza pakumanya buli-buli ukuti vili bunubu? Ane ne muntu umughosi nu muchi wane bulo wepe mughosi.” 19 Uwantumi yula akamula akati, “Ane ne Gabiliyeli, umubombi uwa Chala, yuyo akantuma pakunena nawe nukukubuzya Amazyu Amiza ghanagha. 20 Loli utakusubila amazyu ghane ghagho ghakwiza pakuba ghanaloli pakabalilo akiza. Loli pachifukwa chakuti utasubiye, ukwiza pakuba we chinunu mupaka pisiku lilyo ilayizyo lyane kukwako likwanilisiwe.” 21 Pakabalilo kako ivintu vinivi vikabombiwanga abantu babo bakamulindililagha u Zekaliya bakaswigha pakuti akakaba nkani mu Nyumba iya Chala. 22 Bo afuma, akapotwa pakunena nabo, po bakazyaghannya ukuti u Zekaliya akennya ichisetuka mu Nyumba iya Chala mula. Akanena nabo pakubombezya inyobe pakuti akapotwa pakufumya izyu. 23 Bo akabalilo kache aka mbombo mu Nyumba iya Chala kamala, u Zekaliya akanyokela kukaya. 24 Pisinda pache umuchi wache u Elizabeti akamela ulwanda nukulinda munyumba amezi fayivi. 25 U Elizabeti akati, “Ilelo pabumalilo u Mwene anyavwa. Anyefya isoni pamaso pa bantu!” Ukupapiwa kwa Yesu kwafumusiwa 26 Mumwezi wasikisi uwa lwanda ulwa Elizabeti, u Chala akatuma uwantumi u Gabiliyeli kukaya aka Nazaleti muchigaba icha Galileya. 27 Akatumiwa ku mulindu yuyo akazingiliwa nu mwanavuli, yuyo akaba we Yosefu uwaluko ulwa Mwene u Devedi. Itabwa ilya mulindu yula akaba we Maliya. 28 Uwantumi yula akiza pakumulamuka nukuti, “Mwaghona! U Mwene ali nawe, sona akusayite nkani!” 29 U Maliya akatamiwa nkani mumoyo wache na mazyu agha uwantumi yula, sona akaswigha na chicho amazyu ghakang'anamulagha. 30 Uwantumi yula akamubuzya akati, “Maliya, utakanyilaye, u Chala akulanjizya ichisa chache. 31 Ukwiza pakumela ulwanda nukupapa umwana umulumendo, sona ukwiza pakumwita ukuti we Yesu. 32 Akwiza pakuba mukulu nkani, sona akwiza pakwitiziwa ukuti we Mwana uwa Chala Wapamwanya Nkani. U Mwene Chala akwiza pakumupa ichitengo icha bumwene ubwa munyenya wache u Devedi, 33 sona akwiza pakuba we Mwene uwaluko ulwa Yakobo bwila na bwila, sona ubumwene bwache bute bukamale nalumo!” 34 U Maliya akamulalusya uwantumi yula akati, “Nkimba zinizi zingaba buli-buli? Ane ntamumenye nalumo umwanavuli.” 35 Uwantumi yula akamula akati, “U Muzimu Umuzelu akwiza papako, sona ukwiza pakwizula na maka agha Chala. Pachifukwa chinichi u Mwana umuzelu yuyo ukwiza pakupapa, akwiza pakwitiziwa Mwana uwa Chala. 36 Ennya, umukamu wako u Elizabeti, yuyo akaneniwa ukuti mughumba, loli ilelo ali nu lwanda ulwa mezi sikisi, napapo mughosi nkani. 37 Pakuti chitalipo nachimochimo chicho chingamupota u Chala.” 38 U Maliya akati, “Ane ne wambombo uwa Chala. Leka zibombiwe zizyo wanena.” Po uwantumi yula akamuleka nukubuka. U Maliya akumwendela u Elizabeti 39 Mumasiku ghalaghala u Maliya akiyannya nukubuka umwalubilolubilo kukaya aka mwighamba aka Yudeya. 40 Akinjila munyumba iya Zekaliya nukumulamuka u Elizabeti. 41 Bo u Elizabeti ivwa bulo ukulamuka kwa Maliya, umwana akasakata mulwanda lwache. U Elizabeti akizula nu Muzimu Umuzelu 42 nukunena na mazyu agha pamwanya ukuti, “We musayiwa pa bakolo bosi, sona musayiwa umwana yuyo ukwiza pakupapa! 43 Nkimba ne wenu ane ukuti unyina uwa Mwene wane anyendele? 44 Pakuti bo nivwa bulo ukulamuka kwako, umwana mulwanda lwane akasakata nu lusekelo. 45 Musayiwa umuntu yuyo akusubila ukuti amazyu agha Mwene ghakwiza pakukwanilisiwa!” Ulwimbo ulwa Maliya ulwakumupala u Chala 46 U Maliya akati, “Umoyo wane ghukumupala u Mwene; 47 umuzimu wane ghuhobokite, pachifukwa icha Chala Umupoki wane. 48 Pakuti ankumbuka, ne wambombo wache uwakwiyisya! Ukwandila pakabalilo aka, abantu abankulilo zyosi bakwiza pakunyitizya musayiwa, 49 pachifukwa icha vintu ivikulu vivyo u Chala Uwamaka ambombela. Itabwa lyache lizelu; 50 ukwandila inkulilo yoka mupaka iyamwabo akubapelela ichisa abantu babo bakumuchindika. 51 Abomba ivintu ivikulu nkani ni nyobe yache nukunyampannya abamituvyo ni mbatiko zyabo zyosi. 52 Abawisya abamwene abamaka pa vitengo vyabo, nukubakwezya abakwiyisya. 53 Abazala akubikutizya ni vintu ivyiza nukubabwezya abakabi ni nyobe zyene. 54 Amwavwa umubombi wache u Izilayeli pakumulanjizya ichisa, 55 u Abulahamu nu luko lwache losi bwila na bwila.” 56 U Maliya akikala poka nu Elizabeti amezi matatu, po akanyokela kukaya kache. Ukupapiwa kwa Yohani Uwalozyo 57 Bo akabalilo akakuti u Elizabeti asayiwe kakwana, akapapa umwana umulumendo. 58 Abapalamani na bakamu bakivwa mumo u Mwene abeleye ni chisa ichikulu kukwache, po bosi bakasekela poka nawe. 59 Bo umwana amala amasiku eyiti, bakiza nawe ukuti asilimuliwe, sona nukuti bamwite ukuti we Zekaliya, itabwa ilya wise. 60 Loli unyina akakana akati, “Awe! Itabwa lyache libanje we Yohani.” 61 Po abantu bakamubuzya bakati, “Loli ute nu mukamu nayumoyumo yuyo ali ni tabwa linili!” 62 Bakabombezya inyobe pakumulalusya uwise uwa mwana itabwa lilyo akalondagha ukuti umwana itiziwanje nalyo. 63 U Zekaliya akalaba apakusimbapo nukusimba ukuti, “Itabwa lyache libanje we Yohani.” Bosi bakaswigha nkani! 64 Umwalubilolubilo ululimi ulwa Zekaliya lukasatuka nukwanda sona pakunena, po akanda pakumupala u Chala. 65 Abapalamani bakizula nu bogha, sona imbili iya vintu vinivi yikasata posi na posi muchigaba icha maghamba agha Yudeya. 66 Umuntu wesi yuyo akivwa zinizi akinong'ona nukwilalusya ukuti, “Nkimba umwana yunuyu akwiza pakuba buli-buli?” Pakuti chikabonekela zila ukuti amaka agha Mwene ghakaba papache. Ubulaghuzi ubwa Zekaliya 67 U Zekaliya uwise uwa Yohani akizula nu Muzimu Umuzelu, po akalaghula akati, 68 “Amapalo ghabanje kwa Mwene, u Chala uwa ba Izilayeli, pakuti iza pakubavwa abantu bache nukubasatula. 69 Atupa Umupoki uwamaka, uwaluko uwa mubombi wache u Devedi. 70 Ivi vyo vivyo akalayizya kale ukwendela mu balaghuzi abazelu. 71 Akatulayizya ukuti akwiza pakutupoka munyobe izya balwani bitu ukufuma munyobe izya bosi babo bakutubenga. 72 Akanena ukuti akwiza pakubapelela ichisa abanyenya bitu nukukumbuka ulufingo lwache uluzelu. 73 Akamulayizya umunyenya witu u Abulahamu 74 ukuti akwiza pakutupoka munyobe izya balwani bitu nukutwitikizya ukuti tumubombele umwakusita ubogha, 75 umwakuti tungaba bazelu, sona bagholosu pamaso papache amasiku ghosi agha bumi bwitu. 76 Wee mwana wane, ukwiza pakwitiziwa mulaghuzi uwa Chala Wapamwanya Nkani. Ukwiza pakulongolela kuntazi kwa Mwene pakumuyanizya umusebo wache. 77 Ukwiza pakubabuzya abantu bache ukuti bakwiza pakupokiwa pakuhobokeliwa imbibi zyabo. 78 U Chala witu wachisa nkani. Akwiza pakututumila ulukozyo ulwa kumwanya, 79 lulo lukwiza pakubalamila abantu bosi, babo bakwikala muchisi na mumuzyezye uwa bufwe pakutulongolela muzila iya mutende.” 80 Po umwana yula akakula nukuba wamaka mubuzimu. Akikala munkolongo mupaka isiku lilyo akabonekela pabuzelu pakasi pa ba Izilayeli. |