Imbombo 6 - Ulufingo Ulupya

Bakusala abavwilizi seveni

¹ Pisinda pazinizi, bo akabukatila aka bamanyili kakonjelela-konjela, pakaba ivyongo pakasi pa ba Yuda babo bakanenagha Ichigiliki naba Yuda abene chisu. Aba Yuda babo bakanenagha Ichigiliki bakilumbusyanga ukuti abafwilwe babo batakabinong'onela pavintu vivyo vikagabiwanga isiku ni siku.

² Po abatumiwa 12 bakitizya akabukatila kosi aka bamanyili nukubabuzya ukuti, “Chite chiza ukuti tuleke pakulumbilila amazyu agha Chala, umwakuti twenelezyanje ukugabiwa kwa vyakulya.

³ Polelo bakamu bitu, musale abantu seveni mumwinyu, babo bizuye nu Muzimu Umuzelu na mahala, sona aswe tukwiza pakubapa imbombo yiniyi.

⁴ Po akabalilo kosi aswe tukwiza pakwiyula munyiputo na mumbombo iyakulumbilila amazyu agha Chala.”

⁵ Akabukatila kosi kakahoboka nkani na zizyo abatumiwa bakanena, po bakasala u Sitefani, umuntu walwitiko, sona yuyo akizula nu Muzimu Umuzelu, nu Filipu, nu Pulokola, nu Nikanoli, nu Timoni nu Palimena, nu Nikolayi, umuntu yuyo ate mu Yuda uwa kukaya aka Antiyokiya, yuyo akapindukila ku Chiyuda.

⁶ Po bakiza na bantu bala pamaso pa batumiwa, babo bakabiputila nukubika inyobe.

⁷ Po amazyu agha Chala ghakafumuziwanga. Po akabukatila aka bamanyili mu Yelusalemu kakonjelelagha-konjelelagha, umwakuti na baputi abinji bakitika ulwitiko lwabo.

Bakumulema u Sitefani

⁸ U Sitefani, umuntu yuyo akasayiwa nu Chala, sona akizula na maka, akabomba ivyika ni viswigho ivikulu mu bantu.

⁹ Loli abantu bamo bakamususya babo bakaba aba munyumba iyakwiputilamo iya bantu ababuke (ngati mumo bakitiziwanga) naba Yuda aba mu Kileni, sona naba mu Alekizandiliya. Abene poka naba Yuda aba muvigaba ivya Kilikiya nu Asiya bakanda pakudalinkana nu Sitefani.

¹⁰ Loli bakapotwa pakudalinkana nawe pakuti akanenagha na mahala agha Muzimu Umuzelu.

¹¹ Po bakababeka abantu bamo ukuti banene ukuti, “Tukamwivwa akumusamula u Mozesi nu Chala!”

¹² Pakubomba bunubu bakasonjelezya nkani abantu, na basongo aba Chiyuda, sona na bamanyisi aba Ndaghilo. Bakamulema nukwiza nawe pamaso pa balongi.

¹³ Po bakiza na bakaboni abamyasi ukuti bamutamantile u Sitefani, babo bakanena bakati, “Umuntu uyu akabalilo kosi akuyisamula Inyumba iya Chala, sona ni Ndaghilo izya Mozesi.

¹⁴ Tukamwivwa akunena ukuti u Yesu uwa mu Nazaleti uyu akwiza pakumongolannya Inyumba iya Chala, sona nukwandula inyiho zizyo u Mozesi akatupa!”

¹⁵ Abalongi bosi bakamwenelezya u Sitefani nukwennya ukuti icheni chache chikaboneka ngati cho cheni icha wantumi.