Imbombo 27 - Ulufingo Ulupya

U Pabuli akwenda panyanja ukubuka ku Loma

¹ Bo kwadumuliwa ukuti tubuke kuchisu icha Itale pa bwato, u Pabuli na bakayidi abamwabo bakabikiwa munyobe izya Juliyasi, usongo uwa kabukatila aka basilikali 100, kako bakatinji, “Akabukatila aka Kesale.”

² Tukakwela mu bwato ubukulu nkani ukufuma mu Adilametiyamu, bubo yikaba papipi pakunyamuka ukubuka mumaloboko agha muchigaba icha Asiya, po tukanyamuka. U Alisitalika, uwa mukaya aka Tesalonika muchigaba icha Makedoniya akaba poka naswe.

³ Indabi yache tukafika mu Sidoni. U Juliyasi akamupelela ichisa u Pabuli, po akamwitikizya ukuti abuke pakubennya abamanyani bache akuti bamupe ivyakusobelwa vyache.

⁴ Ukufuma kulakula tukakwela ubwato, tukenda kumitu kwa kasungo aka Sayipulasi pakuti impepo yikakukilagha kumaso ghitu.

⁵ Bo twaloboka inyanja, tukabuka pa bwato ku vigaba ivya Kilikiya nu Pamfiliya nukufika mukaya aka Mila muchigaba icha Lisiya.

⁶ Mulamula usongo uwa basilikali 100 akabwagha ubwato ubukulu nkani bubo bukafuma mu Alekizandiliya pakubuka ku Itale. Po akatukwezya mubwato mulamula.

⁷ Tukenda panandi-panandi amasiku aminji ni ntamyo inkulu nkani mupaka tukafika mukaya aka Kinida. Bo impepo yakanizya ubulendo bwitu, tukabuka kuntende kwa kasungo aka Kileti, kako kakaba papipi nu Salimoni.

⁸ Tukendagha mulubazu ulwa kasungo kala ni ntamyo inkulu nukufika pabuzilo bubo bakatinji Maloboko Amiza, ghagho ghakaba papipi na kaya aka Laseya.

⁹ Tukatagha akabalilo akatali nkani mulamula mupaka kukanda pakughofya ukwendelela nu bulendo pakuti akabalilo akakutuzikizya pakulya kakaba kakuti kamalite kale. Po u Pabuli akabasoka akati,

¹⁰ “Mwebaya mwee, inkwennya ukuti ubulendo bwitu bukwiza pakuba bwakoghofya. Ukatundu nu bwato ubukulu nkani vikwiza pakunanganika nkani, sona nubumi bwitu bulo.”

¹¹ Loli usongo uwa basilikali 100 yula akivwila zizyo uwakwendezya ubwato ubukulu nkani nu mwenecho bakanena, ukuchila zizyo u Pabuli akanena.

¹² Piloboko palapala patakaba piza ukwikalapo akabalilo aka chisiku, po abantu abinji bakalondagha twepepo pabuzilo bula pa bwato nukuyezya pakufika mu Fonike, nanti chingabombiwa ukuti bangikala mulamula akabalilo aka chisiku. Fonike lyo liloboko ilya mu Kileti, pakulumbilila kuntende, kubwinjililo ubwizuba, sona kumitu kubwinjililo ubwizuba.

Impepo iyakukuka panyanja

¹³ Bo impepo yiyo yikafumagha kuntende yanda pakuputa panandi-panandi, abantu bakinong'ona ukuti bachagha chicho balondagha. Bakefya ichela iching'wamu chicho chikalema ubwato ubukulu, po bakanda pakwenda mulubazu ulwa piloboko ulwa Kileti.

¹⁴ Panapo na panapo impepo iyakukuka yiyo bakatinji Impepo iya kumitu kubufumilo ubwizuba, yikakuka pa kasungo kalakala.

¹⁵ Impepo yila yikakoma ubwato ubukulu nkani bula, umwakuti bukapotwa pakwendelela pakubuka kuko impepo yikafumilagha, po tukabuleka ukuti tusunkiliwe bulo ni mpepo.

¹⁶ Tukafika papipi na kasungo akanandi aka Kabuda, kulubazu kuko kutakabako impepo. Umwakutamiwa tukabupoka ubwato bubo bukawesiwanga nu bwato ubukulu bula.

¹⁷ Tukabukwezya ubwato bula mubwato ubukulu nkani, po tukabupinyilila ubwato ubukulu ni nkusa ukuti bubanje na maka. Bakanyilagha ukuti bangabadila palusesenga ulwa piloboko ulwa Libiya, po bakisya ichimwenda nukubuleka ubwato ubukulu nkani bula ukuti basunkiliwe bulo ni mpepo.

¹⁸ Impepo iyakukuka yila yikendelela, po indabi yache tukanda pakusumbila ukatundu yumo mumizi.

¹⁹ Po pisiku ilyabutatu bakasumbila ivigaba vimo ivya bwato ubukulu nkani mumizi.

²⁰ Tutakennya izuba pamo intondwa amasiku aminji, sona impepo yene yikendelela pakukuka nkani. Pabumalilo tukatagha ulusubilo ulwakuti tungapona.

²¹ Bo pachilapo akabalilo akatali abantu bala bakaba bataliyepo nachimochimo, u Pabuli akimilila pamaso papabo nukuti, “Mwebaya mwee, nanti mwanteghelezyanga ane zizyo inkanena ukuti tutakepemo mu Kileti, ngali ivintu vitananganika bunubu.

²² Loli ulu inkubalaba ukuti mujimbe nkani umoyo. Nayumo umuntu mumwinyu yuyo akwiza pakufwa, loli ubwato ubukulu nkani bwene bo bubo bukwiza pakunanganika.

²³ Ubusiku bubo bwamalagha uwantumi uwa kumwanya uwa Chala, yuyo wane, sona yuyo inkumuchindika akanyizila kukwane,

²⁴ nukumubuzya ukuti, ‘Wee Pabuli, utakanyilaye. Ubaghiye pakwimilila pamaso pa Kesale. U Chala muchisa chache kukwako itikizya ukuti abantu bosi babo uli nabo pa bulendo babanje nubumi.’

²⁵ Po, mwebaya mwee, mujimbe nkani umoyo pakuti inkusubila ukuti u Chala akwiza pakuvibomba vivyo akambuzya.

²⁶ Loli tukwiza pakubadila pa kasungo kamo.”

²⁷ Pabusiku ubwa pa 14, bo tuchili tukusunkiliwa ni mpepo panyanja iya Adiliya, ababombi aba mubwato ubukulu bakinong'ona ukuti tuli papipi ukufika pisila.

²⁸ Po bakapima ubwibizu ubwa nyanja pakudwibika ibwe lilyo bakalipinya nu lukusa nukwagha ukuti bukaba amamita 40. Bo benda panandi bakapima sona nukwagha ukuti bukaba amamita 30.

²⁹ Bakanyilagha ukuti pamo ubwato ubukulu bungabadila pamabwe. Po bakadwibika ivyela iving'wamu folo kwisinda kwa bwato ubukulu ukuti vibuleme, sona bakiputa ukuti kuche lubilo.

³⁰ Ababombi aba mubwato ubukulu bula bakayezya pakuchimbilamo. Bakisya ubwato pamizi ngati po babuka pakudwibika ivyela ivinji iving'wamu kuntazi kwa bwato ubukulu bula.

³¹ Loli u Pabuli akamubuzya usongo uwa basilikali 100 yula, sona na basilikali akati, “Nanti ababombi aba batakwikalamo mu bwato ubukulu nkani umu, mutangapona.”

³² Po abasilikali bakadumula inkusa izya bwato nukubuleka ukuti bubukaye.

³³ Pandabindabi bo ni zuba lichili pakufuma u Pabuli akabalaba bosi ukuti balye ichakulya, akati, “Mwikala amasiku 14 umwakupasya-pasya, sona akabalilo kosi kanaka mutalyanga nachimochimo.

³⁴ Po inkubalaba ukuti mulye ichakulya, umwakuti mubanje na maka. Nayumo umuntu mumwinyu, yuyo akasisi loka kumutu wache lukwiza pakusobela.”

³⁵ Bo u Pabuli anena zinizi, akasenda ivibama nukumupalizya u Chala pamaso pa bosi, po akavimenyannya nukwanda pakulya.

³⁶ Bakajimba umoyo, sona bosi bakalya.

³⁷ Twebosi poka mu bwato ubukulu mula tukaba 276.

³⁸ Bo bosi bikuta bakabupepusya ubwato ubukulu nkani pakusumbila ingano yosi munyanja.

Ukupangunkana kwa bwato ubukulu

³⁹ Bo kwacha, ababombi aba mubwato ubukulu nkani bula bakapotwa pakumanya mwisila mwa nyanja, loli bakennya ubuzilo ubwa musesenga, papo bakinong'ona ukuti bangabubadizya ubwato ubukulu.

⁴⁰ Po bakadumula ivyela iving'wamu vila nukuvileka ukuti vidwibe munyanja. Sona pakabalilo koka kanako bakasatula inkusa zizyo zikapinyiliwa ku vyakuvighila ubwato ubukulu. Po bakakwezya umwenda kuntazi kwa bwato ubukulu ukuti impepo yisunkile ubwato bula nukubuka pisila.

⁴¹ Loli ubwato ubukulu nkani bula bukabadila palusesenga lulo lutakabonekagha. Kuntazi kwa bwato bula kukakakatila, bo kwisinda kukubazunkana pachifukwa icha mayigha.

⁴² Abasikali bakinong'ona ukuti baghoghe abakayidi bosi, umwakuti atakabepo nayumo umuntu uwakusabila pisila nukuchimbila.

⁴³ Usongo uwa basilikali yula akalondagha pakumupoka u Pabuli, po akabakanizya abasilikali pakubomba zinizi. Loli akabalamula babo bangasaba ukuti banyelele mumizi nukusaba pakubuka pisila.

⁴⁴ Po abanji bakababuzya ukuti bakwele pamatabwa pamo patubazu-bazu tumo utwa bwato ubukulu nkani. Umu mo mumo twebosi tukaponela nukufika pisila.