Imbombo 22 - Ulufingo Ulupya

¹ “Mwee bakamu na batata bane, ivwa kuno, bo nkunena amazyu ghane aghakwipokela nemwene!”

² Bo bamwivwa akunena na mu Chihebeli, bakaba myee. Po u Pabuli akati,

³ “Ane ne mu Yuda, nkapapiwa mukaya aka Talisa muchisu icha Kilikiya, loli inkakulila mu Yelusalemu ngati ne mumanyili uwa Gamaliyeli. Inkamanyiziwa akiza nkani Indaghilo izya banyenya bitu, sona nkiyula nkani pambombo iya Chala ukuyana na mumo mwebosi muli pano ilelo mubeleye.

⁴ Inkabavwima nu kubaghogha abantu babo bakakonkagha Izila iya Mwene. Inkabalema abanavuli na bakolo nukubighalila mujele.

⁵ Umuputi Usongo na kabukatila kosi aka balongi aba Chiyuda bangasimikila ukuti nkunena ubwanaloli. Inkapokela abakalata abakufuma kukwabo nukubuka nabo kuba Yuda mu Damasika. Po inkabuka kulakula pakubalema abantu banaba nukwiza nabo bapinyiwe ni mpingu mu Yelusalemu ukuti bafundiwanje.

U Pabuli akulingannya nizya kupinduka kwache

⁶ “Bo napalamila kukaya akakulu nkani aka Damasika pamusanya, umwakuchenusya bulo ulukozyo ulwakulama nkani ulwakufuma kumwanya lukandamila.

⁷ Nkawa pasi nukwivwa izyu likunena nane likuti, ‘Wee Sabuli, wee Sabuli! Choni chicho ukunvwima?’

⁸ Inkalalusya inkati, ‘Nkimba we wenu awe, Mwene?’ Akambuzya akati, ‘Nene Yesu uwa mu Nazaleti, yuyo ukumuvwima.’

⁹ Abantu babo inkendagha nabo bakennya ulukozyo lula, loli batakivwa izyu ilya yuyo akanenagha kukwane.

¹⁰ Inkalalusya inkati, ‘Mwene, nkimba imbombe choni?’ Po u Mwene akambuzya akati, ‘Nyamuka bukagha mu Damasika. Mulamula ukwiza pakubuziwa zyosi zizyo u Chala akubatikiye ukuti ubombe.’

¹¹ Inkafwa maso pachifukwa icha lukozyo ulwakulama nkani lula, po abantu babo bakaba nane bandema inyobe nukwinjila nane mu Damasika.

¹² “Mukaya akakulu nkani mula mukabamo umuntu yumo yuyo akaba we Ananiya, umuntu uwakumwiputa u Chala, yuyo akakonka Indaghilo zyitu, sona akachindikiwa nkani naba Yuda bosi babo bakikalagha mulamula.

¹³ Akiza nukwimilila papipi nane nukumubuzya ukuti, ‘Wee mukamu Sabuli, anda pakwennya sona.’ Pakabalilo kalakala inkennya sona nukumwenelezya yuyo.

¹⁴ Akati, ‘U Chala uwa banyenya bitu akusalite awe ukuti umanye ubwighane bwache, sona ukuti wennye Umubombi wache Umugholosu nukumwivwa yuyo akunena amazyu ghache kukwako.

¹⁵ Pakuti ukwiza pakuba we kaboni wache pakubabuzya abantu bosi zizyo wazyennya nu kwivwa.

¹⁶ Po ilelo nkimba ukulindilila ichoni? Nyamuka nukoziwa ukuti imbibi zyako zisukiwe pakumwiputa.’ ”

U Pabuli itiziwa pakulumbilila pakasi pa bantu babo bate ba Yuda

¹⁷ “Inkanyokela mu Yelusalemu, loli bo indi pakwiputa mu Nyumba iya Chala, inkennya ichisetuka.

¹⁸ Inkennya u Mwene akumbusya akuti, ‘Lubilolubilo epamo mu Yelusalemu muno pakuti abantu kuno batakwiza pakwitikizya ubwakaboni bwako bubo bukunena nizya ane.’

¹⁹ Inkamula inkati , ‘Mwene, naloli bazimenye ukuti inkabukagha kunyumba izyakwiputilamo pakubighalila mujele nukubakoma babo bakasubilagha mumwako.

²⁰ Sona bo ukaboni wako u Sitefani akughoghiwa, ane inkaba palapala ukusimikila pakughoghiwa kwache, sona nene inkaba musungi uwa nkazo izya babo bakamughogha.’

²¹ Po u Mwene akati, ‘Bukagha pakuti inkwiza pakukutuma kubutali nkani na bantu babo bate ba Yuda.’ ”

²² Abantu bakateghelezya kwa Pabuli mupaka bo anena amazyu ghanagha. Loli bakanda pakukolomoka ukuti, “Umuntu yunuyu mumuzimizye bulo! Atabaghiye pakuba nubumi!”

²³ Bakakolomokagha nkani nukusumbila amenda ghabo mumwanya, sona bakachupusya ulufumbi mumwanya pakulanjizya ubukali.

²⁴ Usongo uwa basilikali yula akalamula ukuti babukaye nu Pabuli mwilinga mula, sona akababuzya ukuti bamusyempe ukuti umwene achimanye ichifukwa chicho abantu bakamobezezyanga bunubu.

²⁵ Loli bo bamupinya ukuti bamusyempe, u Pabuli akamulalusya usongo uwa basilikali yuyo akimilila palapala akati, “Nkimba indaghilo zyinyu zikwitikizya pakumusyempa umwenekaya uwa Chiloma, bo mutalongite inongwa yache?”

²⁶ Bo usongo uwa basilikali yula ivwa zinizi, akabuka kwa songo nkani uwa basilikali nukumulalusya ukuti, “Nkimba ukubomba choni? Umuntu uyu mwenekaya uwa Chiloma.”

²⁷ Po usongo yula akabuka kwa Pabuli nukumulalusya ukuti, “Mbuzya, nkimba awe we mwenekaya uwa Chiloma?” U Pabuli akamula akati, “Ee!”

²⁸ Usongo yula akati, “Inkaghula ubwenekaya bwane ni ndalama inyinji nkani.” U Pabuli akamula akati, “Loli ubwenekaya bwane bwakupapiwa nabo.”

²⁹ Panapo na panapo abantu babo bakalondagha pakumulalusya u Pabuli, bakaleka. Po usongo yula zikamoghofya, bo azyaghannya ukuti u Pabuli akaba mwenekaya uwa Chiloma, sona nukuti bakamupinya ni mpingu.

U Pabuli pamaso pa balongi aba Chiyuda

³⁰ Usongo yula akalondagha ukuti achimanye ichifukwa chicho aba Yuda bakamusitakila u Pabuli, po indabi yache bakamusatula nukulamula ukuti abaputi abasongo na kabukatila ka balongi bakomane. Polelo bakamusenda u Pabuli nukumwimika pamaso papabo.