Imbombo 21 - Ulufingo Ulupya

U Pabuli akubuka ku Yelusalemu

¹ Bo twalaghana nabo tukanyamuka nu bwato, tukagholoka mupaka piloboko ilya Kosi. Indabi yache tukafika mu Lodi. Ukufuma kulakula tukendelela pakubuka mu Patala.

² Kulakula tukabwagha ubwato ubukulu nkani bubo bukabukagha ku Fonike, po tukakwela nukubuka.

³ Tukafika pabuzilo bumo bubo tukennyanga akasungo aka Sayipulasi, po tukenda kuntende kwache kwa kasungo kala nukufika mupaka mu Siliya. Tukenda pisila pakubuka ku Tile, kuko ubwato ubukulu nkani bukabukagha pakwisya ukatundu.

⁴ Kulakula tukabagha abamanyili bamo nukwikala nabo usabata weka. Pakulongoziwa nu Muzimu Umuzelu bakamubuzya u Pabuli ukuti atakabukemo mu Yelusalemu.

⁵ Loli bo akabalilo akakwikalila nabo kamala, tukanyamuka nukwendelela nu bulendo bwitu. Abamanyili bosi poka na bachi na bana babo bakatusindikila mupaka kuzi kwa kaya kalakala. Kulakula pa bwima tukafughama nukwiputa.

⁶ Po tukalaghana nukukwela mubwato ubukulu nkani, bo abene bakunyokela mutwaya twabo.

⁷ Tukendelela nu bulendo bwitu ukufuma mu Tile nukufika mu Putolema. Kulakula tukabalamuka abitiki nukwikala nabo isiku lyoka.

⁸ Indabi yache, tukanyamuka nukufika mu Kesaliya. Mulamula tukikala munyumba iya mulumbilili yuyo akaba we Filipu, weka uwa bantu seveni bala.

⁹ Akaba na balindu folo abasita kusendwa, babo bakanenagha amazyu agha Chala.

¹⁰ Bo tuli kulakula amasiku aminji, umulaghuzi yumo yuyo akaba we Agabasi akafika ukufuma muchigaba icha Yudeya.

¹¹ Akiza kukwitu nukusenda ulamba uwa Pabuli, akipinya ivinama ni nyobe zyache nukuti, “U Muzimu Umuzelu akuti, ‘Umwenecho uwa lamba yunuyu akwiza pakupinyiwa bunubu naba Yuda aba mu Yelusalemu, po bakwiza pakumubika munyobe izya bantu babo bate ba Yuda.’ ”

¹² Bo aswe na bantu babo bakaba palapala twivwa zinizi, tukamulaba u Pabuli ukuti atakabuke ku Yelusalemu.

¹³ Loli u Pabuli akamula akati, “Nkimba choni chicho mukulila nukumpa ichitima? Intiyanizye kwene pakupinyiwa, loli na pakufwa bulo mu Yelusalemu pachifukwa icha Mwene u Yesu.”

¹⁴ Bo twapotwa nawe, tukamuleka bulo nukuti, “Ubwighane ubwa Mwene bubombiwanje.”

¹⁵ Bo amasiku ghitu aghakwikalila mulamula ghamala, tukiyannya nukubuka ku Yelusalemu.

¹⁶ Bope abamanyili bamo babo bakafuma mu Kesaliya bakabuka naswe nukutubika munyumba iya muntu yuyo akaba we Munasoni, kuko bakabatika ukuti twikalayeko. Umwene akaba uwa mu Sayipulasi, sona akaba weka uwa bamanyili abakwanda.

U Pabuli akumwendela u Yakobo

¹⁷ Bo twafika mu Yelusalemu, abitiki bakatupokela nu moyo ghosi.

¹⁸ Indabi yache u Pabuli akabuka naswe pakumwennya u Yakobo, po abasongo bosi aba chipanga bakabako.

¹⁹ U Pabuli akabalamuka nukubabuzya zyosi zizyo u Chala akabomba mu bantu babo bate ba Yuda ukwendela mu butumiwa bwache.

²⁰ Bo bivwa zinizi, bakamupala u Chala. Po bakanena kwa Pabuli bakati, “Mukamu Pabuli, ukwennya amasabuzani na masabuzani agha ba Yuda, babo baba bitiki, sona na mumo biyipiye pakukonka Indaghilo izya Mozesi.

²¹ Babuziwe ukuti wamanyizyanga aba Yuda bosi babo bakikalagha muvyisu ivya bantu babo bate ba Yuda ukukana Indaghilo izya Mozesi, ukubabuzya ukuti batakasilimulaye abana babo pamo bakonkaye inyiho izya Chiyuda.

²² Po nkimba tubombe choni? Naloli bakwiza pakwivwa ukuti wafika.

²³ Bomba chicho tukukubuzya. Pali abanavuli folo pano babo balapite pamaso pa Chala.

²⁴ Bukagha poka nabo nukubomba inyiho izyakwiswefya nukubalipilila ukuti babamwanje isisi kumitu yabo. Po abantu bosi bakwiza pakumanya ukuti zyosi zizyo wanena izyabumyasi, sona ukuti naloli awe ukukonka Indaghilo izya Mozesi.

²⁵ Loli abantu babo bate ba Yuda, babo baba bitiki twabasimbila ukalata pakubabuzya ukuti batakalyanje ichakulya chicho chibikiwe ku vifwani ukuti chibanje chakwiyipa, batakalyanje ibanda, batakalyanje ichinyamana chicho chanyongiwa bulo, sona batakalowe.”

²⁶ Indabi yache u Pabuli akabasenda abanavuli folo bala nukubomba nabo inyiho izyakwiswefya. Po akinjila mu Nyumba iya Chala nukubabuzya abantu amasiku aghakwiswefezya, sona ni vyakwiyipa vivyo umuntu wesi abaghiye pakubika.

U Pabuli alemiwa mu Nyumba iya Chala

²⁷ Bo amasiku seveni ghali papipi pakumala, aba Yuda bamo aba muchigaba icha Asiya bakamwennya u Pabuli mu Nyumba iya Chala. Bakasonjelezya ichilundilo chosi, po bakamulema u Pabuli.

²⁸ Bakakolomoka nkani bakati, “Mwe ba Izilayeli! Zagha mutwavwe! Uyu we muntu yuyo akubamanyizya abantu bosi kosi na kosi pakulusamula uluko lwitu, Indaghilo izya Mozesi ni Nyumba iya Chala iyi. Ukonjelezya pazinizi abinjizya sona abantu babo bate ba Yuda mu Nyumba iya Chala nukunyazya ubuzilo ubuzelu ubu!”

²⁹ (Bakanena zinizi pachifukwa chakuti bakaba bakuti bamwennya u Tulofimo uwa mu Efeso poka nu Pabuli mukaya mulamula, sona bakinong'ona ukuti akaba we Pabuli yuyo akamwinjizya mu Nyumba iya Chala.)

³⁰ Akaya kosi kala kakizula ni vyongo, sona abantu bosi bakachimbilila poka, pakumulema u Pabuli nukumuwesela kuzi kwa Nyumba iya Chala. Panapo na panapo imilyango iya Nyumba iya Chala yikighaliliwa.

³¹ Bo abantu bakuyezya pakumughogha u Pabuli, amazyu ghakatumiwa kwa songo uwa basilikali aba Chiloma ukuti akaya kosi aka Yelusalemu kizuye ni vyongo.

³² Panapo na panapo usongo uwa basilikali yula akasenda abasongo bamo na basilikali nukuchimbilila ku chilundilo kula. Bo abantu bamwennya usongo uwa basilikali na basilikali bala, bakaleka pakumukoma u Pabuli.

³³ Usongo uwa basilikali yula akafika palapala nukumulema u Pabuli, akalamula ukuti apinyiwe ni mpingu zibili nukulalusya ukuti, “Nkimba we wenu umuntu yunuyu, sona abomba cho choni?”

³⁴ Bamo muchilundilo mulamula bakakolomoka nkani ichintu choka, abanji bope ichinji, umwakuti usongo uwa basilikali akapotwa pakuchagha ichenecho chicho chikabombiwa pachifukwa icha vyongo, po akalamula ukuti bamusende u Pabuli nukumubika mwilinga.

³⁵ Bo bafika pamakwelelo agha lupaso lula, abasilikali bakamunyamulila mumwanya pakuti ichilundilo chikakalala nkani.

³⁶ Abantu bosi babo bakamukonkagha mwisinda bakakolomoka nkani bakati, “Mughoghe bulo!”

U Pabuli akwiyimila mwene

³⁷ Bo abasilikali bali papipi pakumwinjizya u Pabuli mwilinga, akamulaba usongo uwa basilikali akati, “Nkimba utanganyitikizya ukuti inenepo zimo?” Usongo uwa basilikali yula akamulalusya akati, “Nkimba uchimenye Ichigiliki?

³⁸ Nkimba ute we muntu uwa muchisu icha mu Ijiputi yuyo akandizya ivyongo nukughalongolela amavyondongo 4,000 munkolongo?”

³⁹ U Pabuli akamula akati, “Ane ne mu Yuda, nkapapiwa mukaya akamanyikwe aka Talisa muchisu icha Kilikiya. Nalamba, unyitikizye ukuti inene na bantu aba.”

⁴⁰ Usongo uwa basilikali yula akamwitikizya, po u Pabuli akimilila pamakwelelo agha lupaso nukupumizya ichongo ni nyobe zyache. Bo baba myee, u Pabuli akanena nabo mu Chihebeli akati: