Imbombo 2 - Ulufingo Ulupya

Ukwiza kwa Muzimu Umuzelu

¹ Pisiku ilya Pentekositi abitiki bosi bakabungana poka munyumba.

² Umwakuchenusya bulo ichongo chikivwika ngati yo mpepo iyamaka iyakukuka ukufuma kumwanya nukwizula munyumba yosi mumo bakikalagha.

³ Po bakennya vimo vivyo vikaba ngati zyo ndimi izya moto zizyo zikanyampana nukumupalamasya umuntu wesi yuyo akaba mulamula.

⁴ Bosi bakizula nu Muzimu Umuzelu nukwanda pakunenela mundimi injeni ukuyana na mumo u Muzimu akababuzizya pakunena.

⁵ Palapala pakabapo aba Yuda babo bakikalagha mu Yelusalemu, abantu abakumwiputa u Chala, babo bakafuma muvyisu vyosi ivyapasi.

⁶ Bo bivwa ichongo chila, ichilundilo ichikulu chikabungana. Bosi bakaswigha pakuti umuntu wesi mumwabo akivwa abitiki bakunenela muneno iyabo ni yabo.

⁷ Bakaswigha nkani, sona chikabamala nkani amahala, po bakanena bakati, “Abantu banaba babo bakunena bunubu bate ba Galileya?

⁸ Nkimba zili buli-buli, ukuti twebosi twivwe bakunenela muneno izyitu ni zyitu?

⁹ Twe bamo twafuma ku Palitiya, Mediya na Elamu; ku Mesopotamiya, Yudeya na ku Kapadokiya; ku Ponti na Asiya

¹⁰ ku Filigiya na Pamfiliya, kuchisu icha Ijiputi na muvigaba ivya Libiya, papipi nu Kileni. Twe bamo twafuma ku Loma,

¹¹ aba Yuda na bantu babo bate ba Yuda babo bakapindukila ku Chiyuda, sona twe bamo twafuma ku Kileti na ku Alebiya—loli twebosi tukubivwa bakunena ineno izyitu ni zyitu izya vintu ivikulu vivyo u Chala abombite!”

¹² Bakaswigha nkani, sona chikabamala nkani amahala, nukulaluzannya ukuti, “Nkimba ichi chikung'anamula choni?”

¹³ Loli bamo bakabaseka abitiki nukuti, “Abantu banaba bakolizwe!”

Ubulumbilili ubwa Pitala

¹⁴ Po u Pitala akimilila poka na batumiwa abamwabo 11 bala. Akanena na mazyu agha pamwanya akati, “Mwee ba Yuda na mwebosi mwe mukwikala mu Yelusalemu, teghelezya kuno muleke imbabuzye ukuti ichi chikung'anamula choni.

¹⁵ Abantu banaba batakolizwe ukuyana na mumo mukubinong'onela pakuti aka ko kabalilo aka nayini koloko pandabindabi.

¹⁶ Loli izi zyo zizyo umulaghuzi u Yoweli akanena akati,

¹⁷ ‘U Chala akati: Izi zyo zizyo inkwiza pakubomba mumasiku aghabumalilo, inkwiza pakupungulila Umuzimu wane pa bantu bosi. Abana binyu abalumendo na balindu bakwiza pakulaghula, abaghosi bakwiza pakulota ivilota, bope abalumendo bakwiza pakwennya ivisetuka.

¹⁸ Pakabalilo kalakala inkwiza pakupungulila Umuzimu wane, pa bambombo bane abanavuli na bakolo bulo, nukulaghula amazyu ghane.

¹⁹ Inkwiza pakubomba ivyika kumwanya nukubomba iviswigho pachisu ichapasi. Kukwiza pakuba ibanda, umoto ni lyosi ilyinji;

²⁰ izuba likwiza kuba ni chisi, umwezi ghukwiza pakuba muchesamu ngati lyo libanda, bo isiku ikulu ilya buchindamu ubwa Mwene litafikite.

²¹ Po umuntu wesi yuyo akwiza pakumwitizya u Mwene ukuti amwavwe, akwiza pakupokiwa.’

²² “Mwee mwe ba Izilayeli ivwa kuno! U Yesu uwa mu Nazaleti akaba muntu yuyo imbombo zyache izya maka zikalanjiziwa nukusimikiziwa nu Chala kukwinyu muvyika vyosi ni viswigho vivyo u Chala akabombelagha mumwache. Amwe mwebene muzimenye zinizi pakuti zikabombiwa pakasi papinyu.

²³ U Yesu akapeghiwa kukwinyu ukuyana na mumo u Chala akabatikila nu kwinong'onela zila. Amwe mukamughogha pakumubika munyobe izya bambibi ukuti akomeliwe pachipinjika.

²⁴ Loli u Chala akumuzyusya kubufwe nukumuleka musatuke kumaka agha bufwe, pakuti zitakaba zyakuti zingabombiwa ukuti ubufwe bumupote.

²⁵ Pakuti u Devedi akanena nizya yunuyu akati, ‘Inkamwennyanga u Mwene pamaso papane akabalilo kosi; ali kunyobe yane indilo, po ntakwiza pakuyingana.

²⁶ Polelo umoyo wane wizuye nu buhobosu, sona ululimi lwane lukusekelela. Ubumi bwane pachisu ichapasi buli nu lusubilo.

²⁷ Pakuti utakwiza pakundeka muchisu icha bantu abafwe; utakwiza pakumwitikizyapo nalumolumo uwambombo wako umusubiliwa ukuti abolele mwipumpa.

²⁸ Wandanjizya izila iyakubukila kubumi, sona ukwiza pakunyizuzya nu buhobosu pamaso papako.’

²⁹ “Mwee bakamu bane, imbaghiye imbabuzye pabuzelu izya munyenya witu u Mwene u Devedi. Akafwa nukusyiliwa, po ipumpa lyache lili kuno naswe mupaka pisiku ili.

³⁰ Akaba mulaghuzi, sona akazimanya zizyo u Chala akamulayizya: U Chala akalapa ukuti weka uwaluko lwache akwiza pakupyana ubumwene bwache.

³¹ U Devedi akennya zizyo u Chala akaya pakumubombela muntazi, po akanena izya kuzyuka kubufwe kwa Kilisitu, bo anena ukuti, ‘Batakamuleka muchisu icha bantu abafwe; umuvimba wache ghutakabola mwipumpa.’

³² “U Chala akamuzyusya u Yesu yunuyu kubufwe, twebosi twe bakaboni ba vintu vinivi.

³³ U Yesu akakweziwa nukwikala kunyobe indilo iya Chala, akapokela u Muzimu Umuzelu yuyo Uwise akalayizya. Vivyo mukuvyennya nukwivwa ivyabupi vyache vivyo vyapunguliliwa papitu.

³⁴ Pakuti ate we Devedi yuyo akakwela kumwanya, loli umwene akati, ‘U Mwene akamubuzya u Mwene wane akati: Ikala apa kunyobe yane indilo

³⁵ mupaka imbabike abalwani bako kusi kunyayo zyako.’

³⁶ “Ilelo aba Izilayeli bosi naloli bamanyaghe ukuti u Yesu uyu, yuyo mukumukomela pachipinjika, we yuyo u Chala amubika pakuba we Mwene, sona we Kilisitu!”

³⁷ Bo abantu bivwa zinizi, bakapalamasiwa mumoyo, po bakamulalusya u Pitala na batumiwa abanji bakati, “Bakamu bitu, nkimba tubombe choni?”

³⁸ U Pitala akababuzya akati, “Mwebosi mupinduke nukuzileka imbibi zyinyu nukoziwa mwitabwa ilya Yesu Kilisitu. Po u Chala akwiza pakubahobokela imbibi zyinyu, nukupokela ichabupi icha Muzimu Umuzelu.

³⁹ Pakuti u Chala akabalayizya ichi amwe poka na bana binyu, sona na bantu bosi babo bali kubutali—abantu bosi babo u Mwene u Chala witu akwiza pakubitizizya kukwache.”

⁴⁰ U Pitala akababuzya na mazyu aghanji aghakubasoka akati, “Mwipoke mwebene ku lufundo lulo lukwiza pa bantu ababibi abankulilo iyi!”

⁴¹ Po abantu abinji bakasubila amazyu ghache nukoziwa. Pisiku lilalila abantu abakukwana 3,000 bakonjeleziwako ku kabukatila kabo.

⁴² Bakabika umoyo wabo pa vimanyisyo vivyo abatumiwa bakamanyizyanga, bakaba mubupoka nukumenyannya ichibama pakumukumbuka u Mwene, sona bakaba poka munyiputo.

Mumo abitiki bakikalilagha

⁴³ Abantu bosi bakizula nu bogha pachifukwa icha vyika ivyinji ni viswigho vivyo vikabombiwanga na batumiwa.

⁴⁴ Abitiki bosi bakendelela pakuba mubupoka nukugabana ivintu vivyo bakaba navyo.

⁴⁵ Bakaghulizyanga amaghunda ghabo na vivyo bakaba navyo nukugabana indalama ukuyana na mumo umuntu wesi akasobeliwanga.

⁴⁶ Isiku ni siku bakakomanagha pakabukatila mu Nyumba iya Chala, nukumenyannya ichibama poka munyumba zyabo, bakalyanga mubuhobosu na moyo aghakwiyisya,

⁴⁷ pakumupalizya u Chala, sona abantu bosi bakahoboka nabo. Isiku ni siku u Mwene akonjelezyanga ku kabukatila kabo abantu babo bakapokiwanga.