Imbombo 13 - Ulufingo UlupyaU Balanabasi nu Sabuli basaliwa nukutumiwa 1 Muchipanga icha mukaya aka Antiyokiya mukaba abalaghuzi bamo na bamanyisi: U Balanabasi, u Simiyoni (yuyo akwitiziwa ukuti we mufitu), u Lusiyasi (uwa mu Kileni), u Manayeni (yuyo akakulilagha poka nu Helodi umulaghili uwa chisu), nu Sabuli. 2 Bo bakumuchindika u Mwene nukutuzya pakulya, u Muzimu Umuzelu akababuzya akati, “Munsabulile u Balanabasi nu Sabuli ukuti babombe imbombo yiyo inkabitizizya.” 3 Po bo batuzya pakulya nukwiputa, bakabika inyobe pa Balanabasi nu Sabuli nukubatuma. Nizya Pabuli mu Sayipulasi 4 Bo u Balanabasi nu Sabuli batumiwa nu Muzimu Umuzelu bakabuka mukaya aka Selebukiya nukuloboka nu bwato pakubuka pa kasungo aka Sayipulasi. 5 Bo bafika mu Salami, bakalumbilila amazyu agha Chala munyumba izyakwiputilamo. Bakaba poka nu Yohani Maliko, yuyo akabavwanga mumbombo yabo. 6 Bakenda mupaka pa kasungo aka Pafosi, kuko bakakomana nu wamayele yumo yuyo akaba we Bala Yesu, umu Yuda yuyo akatinji ne mulaghuzi. 7 Akaba mumanyani uwa Seligiya Pabuli, umulaghili uwa pa kasungo pala, yuyo akaba muntu uwa mahala. Umulaghili uwa chisu akamwitizya u Balanabasi nu Sabuli pamaso pache pakuti akalondagha ukuti ateghelezye amazyu agha Chala. 8 Loli uwamayele yuyo akaba we Elimasi (linili likaba itabwa lyache ilya mu Chigiliki) akabasusya pachifukwa chakuti akanyila ukuti umulaghili uwa chisu yula angasubila mwa Mwene. 9 Po u Sabuli yuyo sona akitiziwanga ukuti Pabuli akizula nu Muzimu Umuzelu nukumwenelezya uwamayele yula 10 nukuti, “We mwana uwa Satana! We mulwani uwa chintu chosi ichigholosu, sona wizuye nu luko losi ulwa bumyasi nu buzimbuli. Bwila na bwila ukuyezya ukwandula ubwanaloli ubwa Mwene pakuba bumyasi! 11 Ilelo u Mwene akwiza pakukufunda, umwakuti ukwiza pakuba we mufwamaso, sona ute ukennye ubuzelu ubwizuba pakabalilo akanandi.” Panapo na panapo u Elimasi akanda pakwennya ukabefu ni chisi, akapapasya-papasya bulo ukuyezya pakulonda yumo uwakuti amuleme inyobe. 12 Bo umulaghili uwa chisu ennya zizyo zikabombiwa akasubila pakuti ichimanyisyo icha Mwene chikamuswighizya nkani. Mukaya aka Antiyokiya na muchigaba icha Pisidiya 13 U Pabuli na bamanyani bache bakenda pa bwato ukufuma mu Pafosi nukubuka mu Peliga, akaya akakulu nkani aka mu Pamfiliya. Kulakula u Yohani Maliko akabaleka nukunyokela mu Yelusalemu. 14 Bakendelela nu bulendo bwabo ukufuma mu Peliga nukufika mukaya akakulu nkani aka Antiyokiya muchigaba icha Pisidiya. Pisiku Ilyakutuzya bakinjila munyumba iyakwiputilamo nukwikala pasi. 15 Bo babelenga mu mabuku agha Ndaghilo izya Mozesi na mu mabuku agha balaghuzi, abalongozi aba munyumba iyakwiputilamo bakabatumila amazyu aghakuti, “Bakamu, nanti muli na mazyu aghakubakazya abantu aba, nena.” 16 U Pabuli akimilila, akapumizya ichongo ni nyobe yache nukwanda pakunena ukuti, “Mwee ba Izilayeli, sona namwe bantu mwe mute ba Yuda mwe mukumwiputa u Chala, munteghelezye! 17 U Chala uwa ba Izilayeli akasala abanyenya bitu nukubandula pakuba chisu ichikulu pakabalilo kako bakikalagha ngati bo bantu abayeni mu Ijiputi. U Chala akabefyamo mu Ijiputi na maka ghache, 18 nukujimba nabo amaka 40 munkolongo. 19 Akanangannya inko izya bantu seveni muchisu icha Kenani nukubapa ichisu chila abantu bache ukuti chibanje chabo ni chabo. 20 Vyosi vinivi vikasenda amaka 450. “Pisinda pazinizi akabapa abalongi mupaka pakabalilo aka mulaghuzi u Samuweli. 21 Bo abene bakulonda u mwene, u Chala akabapa u Sabuli, umwana uwa Kishi, uwaluko ulwa Benjamini ukuti abanje we mwene wabo amaka 40. 22 Bo u Chala amwefyapo, akabasalila u Devedi ukuti abanje we mwene wabo. U Chala akanena nizya Devedi akati, ‘Namwagha u Devedi umwana uwa Yese, umuntu uwa pamoyo wane, yuyo akwiza pakubomba chosi chicho ane nalonda ukuti abombe.’ 23 Akaba we Yesu, uwaluko ulwa Devedi, yuyo u Chala akamubika pakuba Mupoki uwa ba Izilayeli ukuyana ni layizyo lyache. 24 Bo u Yesu atandite imbombo yache, u Yohani akalumbilila pakasi pa bantu bosi aba Izilayeli ukuti bapinduke nukuzileka imbibi zyabo nukoziwa. 25 Bo u Yohani ali papipi pakumalizya imbombo yache, akabalalusya abantu bala akati, ‘Nkimba mukwinong'ona ukuti ane ne wenu? Inte nene yuyo mukumulindilila. Loli teghelezya! Umwene akwiza pisinda papane. Ntabaghiye napo panandi ukwinama nukusatula utupinyilo utwa nkwato zyache.’ 26 “Mwee bakamu bane, abaluko ulwa Abulahamu na bantu bosi babo bate ba Yuda babo bakumwiputa u Chala: Amazyu aghabupoki agha ghatumiwa kukwitu! 27 Pakuti abantu babo bakwikala mu Yelusalemu na balongozi babo batakamanyagha ukuti we Mupoki, pamo ukughivwisya amazyu agha balaghuzi, ghagho ghakabelengiwanga Isiku ni siku Ilyakutuzya. Loli pope bulo bakaghakwanilisya amazyu agha balaghuzi pakumughogha u Yesu. 28 Napapo batakamwagha ninongwa iyakumughoghela u Yesu, loli bakamulaba u Pilati ukuti u Yesu aghoghiwe. 29 Bo babomba zyosi zizyo Amasimbo ghakanenagha izya Yesu, bakamwisya pachipinjika nukumubika mwipumpa. 30 Loli u Chala akamuzyusya kubufwe, 31 po amasiku aminji akababonekela abantu babo bakendagha nawe ukufuma mu Galileya ukubuka mu Yelusalemu. Ilelo bo bakaboni bache pakasi pa ba Izilayeli. 32 Po tuli pano pakubabuzya Amazyu Amiza aghakuti zizyo u Chala akabalayizya abanyenya bitu 33 zyakwanilisiwa kukwitu, twe baluko lwabo pakumuzyusya u Yesu kubufwe ukuyana na Masimbo agha mu Salimo uwabubili aghakuti, ‘Awe we Mwana wane, ilelo naba ne ghuso.’ 34 Loli izyakuti akamuzyusya kubufwe ukuti atakabolele mwipumpa u Chala akati, ‘Nkwiza pakubapa ulusayo ulupaghuliwa sona ulusubiliwa, lulo inkamulayizya u Devedi.’ 35 Ukuyana na Masimbo aghanji aghakuti, ‘Utangitikizya Umubombi wako umusubiliwa ukuti abolele mwipumpa.’ 36 Pakuti bo u Devedi abomba vivyo u Chala akabatika pakabalilo kache, akafwa nukusyiliwa poka na banyenya bache, po umuvimba wache ghukabolela mwipumpa. 37 Loli izi zitakamubonekela umuntu yuyo u Chala akamuzyusya kubufwe. 38 Polelo bakamu bane, tukulonda ukuti amwe mumanye ukuti pachifukwa icha Yesu, tukulumbilila amazyu aghakuti imbibi zyinyu zingahobokeliwa, 39 sona ukuti umuntu wesi yuyo akusubila mumwache, abwaghe ubupoki ubukulu nkani bubo umuntu anganeniwa pakuba mugholosu pakukonka Indaghilo izya Mozesi. 40 Muchebaye ukuti zizyo abalaghuzi bakalaghula, zitakababonekele. 41 ‘Ennya, mwe bantu abalobezyo mwee! Muswighaye nukufwa! Pakuti vivyo nkubomba ilelo vintu vimo vivyo mutavisubiye, napapo umuntu yumo angabalingannya.’ ” 42 Bo u Pabuli nu Balanabasi bakepamo munyumba iyakwiputilamo, abantu bakabitizya ukuti bize sona Pisiku Ilyakutuzya ilinji ukuti bababuzye inyinji nizya vintu vinivi. 43 Bo abantu bepapo palukomano lula, aba Yuda na bantu babo bate ba Yuda abinji babo bakapindukila ku Chiyuda bakamukonka u Pabuli nu Balanabasi. Abatumiwa bakababuzya nukubakazya ukuti bendelele pakwikala ukuyana ni chisa icha Chala. 44 Isiku Ilyakutuzya ilinji lilalila, papipi umuntu wesi mukaya kala akiza pakuteghelezya amazyu agha Mwene. 45 Bo aba Yuda bennya ichilundilo icha bantu chila, bakizula na kabini. Akanena ukuti zizyo u Pabuli akunena zyabumyasi sona bakamusamula nkani u Pabuli. 46 Loli pope bulo u Pabuli nu Balanabasi bakanena nu bujivu bakati, “Chikaba chakulondiwa ukuti amazyu agha Chala ghalumbililiwe tasi kukwinyu. Loli pakuti mwaghakana, sona ukuti mukwinong'ona mutabaghiye pakupokela ubumi ubwa bwila na bwila, tukwiza pakubaleka nukubuka pakasi pa bantu babo bate ba Yuda. 47 Pakuti u Mwene akatupa ilamulo ilyakuti, ‘Nakubika awe pakuba lukozyo ulwa bantu babo bate ba Yuda, umwakuti abantu bosi aba muchisu chapasi bapokiwe.’ ” 48 Bo abantu babo bate ba Yuda bivwa zinizi, bakahoboka nukughapala amazyu agha Mwene. Po abantu bosi babo u Chala akabasala ukuti bapokele ubumi ubwa bwila na bwila, bakasubila. 49 Amazyu agha Mwene ghakasata posi na posi muchigaba chilachila. 50 Loli aba Yuda bakabasonjelezya aba mukaya akakulu nkani kala, sona na bakolo abantu babo bate ba Yuda abamanyikwe nkani babo bakamwiputagha u Chala. Bakanda pakumuvwima u Pabuli nu Balanabasi nukubefyamo muchigaba chabo chila. 51 Abatumiwa bakakung'unta ulufumbi munyayo zyabo pakuba chimanyilo ichakubasoka nukubuka ku Ikoniya. 52 Abamanyili aba mukaya aka Antiyokiya bakahoboka nkani, bakizula nu Muzimu Umuzelu. |