Aba Loma 4 - Ulufingo Ulupya

Nizya lwitiko ulwa Abulahamu

¹ Po ilelo tungati choni nizya Abulahamu, umunyenya uwaluko lwitu? Nkimba akakomanapo ni choni?

² Nanti u Chala akamunena pakuba mugholosu pamaso papache pachifukwa icha mbombo zizyo akabomba, ngali ali nacho chimo icha kwituvikizyapo, loli pamaso pa Chala, awe.

³ Pakuti Amasimbo ghakuti, “U Abulahamu akamusubila u Chala, sona pachifukwa icha lwitiko lwache u Chala akamunena pakuba mugholosu pamaso papache.”

⁴ Uwambombo akupokela amalipilo ghache, bo abomba. Amalipilo ghalaghala ghatayanite ni chabupi, loli akupokela chicho abaghiye pakupokela.

⁵ Loli umuntu yuyo atakusubila imbombo zyache, loli akumusubila u Chala yuyo akumunena umuntu uwambibi pakuba mugholosu pamaso papache, u Chala akwiza pakumunena pakuba mugholosu pamaso papache, pachifukwa icha lwitiko lwache.

⁶ U Devedi akanena bunubu bo anena ukuti musayiwa umuntu yuyo u Chala akumunena pakuba mugholosu pamaso papache, kute kokuti chifukwa icha mbombo zyache akati:

⁷ “Basayiwa abantu babo ububibi bwabo bwahobokeliwa babo imbibi zyabo zyazimiwa.

⁸ Musayiwa umuntu yuyo imbibi zyache, u Mwene atakwiza pakuzibelengela!”

⁹ Nkimba ubusayiwa bubo u Devedi akabunena ubwa bantu bene babo basilimuliwe, pamo sona na babo batasilimuliwe? Pakuti twabelenga Amasimbo ghagho ghakuti, “U Abulahamu akasubila u Chala, po u Chala akamunena pakuba mugholosu pamaso papache pachifukwa icha lwitiko lwache.”

¹⁰ Nkimba zinizi zikabombiwa liyi? Nkimba bo u Abulahamu atasilimuliwe pamo bo asilimuliwa kale? Zitakabombiwa bo asilimuliwa, loli bo atasilimuliwe.

¹¹ Ukusilimuliwa kukabombiwa pisinda, ukuti chibanje chimanyilo ichakulanjizya ukuti pachifukwa icha lwitiko lwache, u Chala akamunena pakuba mugholosu pamaso papache, bo atasilimuliwe. Po u Abulahamu we munyenya uwa bantu bosi babo bakumusubila u Chala, sona akubanena pakuba bagholosu pamaso papache, napapo batasilimuliwe.

¹² Sona we munyenya uwa bantu babo basilimuliwe, kokuti kute ko ku bene babo basilimuliwe umubili, loli sona na bantu bosi babo bakukonka munyayo izya lwitiko ulwa munyenya witu u Abulahamu, bo atasilimuliwe.

U Abulahamu akupokela zizyo u Chala akamulayizya

¹³ Bo u Chala akumulayizya u Abulahamu na baluko lwache ukuti ichisu chapasi chikwiza pakuba chabo, akabomba bunubu, pate pachifukwa ichakukonka Indaghilo, loli pachifukwa chakuti akasubila nukuneniwa ukuti mugholosu pamaso pa Chala.

¹⁴ Pakuti nanti zizyo u Chala akabalayizya abantu zikupeghiwa pachifukwa ichakukonka Indaghilo, kokuti ulwitiko lwaba lwabulo, sona ilayizyo ilya Chala lite ni mbombo.

¹⁵ U Chala akukalala bo abantu bakunanga Indaghilo. Loli kuko kutaliko Indaghilo, kutaliko ukunanga Indaghilo.

¹⁶ Polelo ilayizyo ilya Chala likima palwitiko, umwakuti ilayizyo lyache lipeghiwe pakuba chabupi ichabulo icha Chala, icha baluko losi ulwa Abulahamu—te ko ku bene babo bakukonka Indaghilo izya Mozesi, awe, loli sona na bantu babo bakusubila ukuyana na mumo u Abulahamu akasubilila. Umwene we munyenya uwa twebosi.

¹⁷ Pakuti Amasimbo ghakuti, “Nakupela awe pakuba munyenya uwa inko inyinji.” U Abulahamu akapokela ilayizyo ili kwa Chala yuyo akamusubila—u Chala yuyo akuzyusya abafwe, sona nu kuvipa ivintu ubumi vivyo vite nubumi.

¹⁸ U Abulahamu akasubila nukulindilila, napapo patakabapo ni chifukwa ichakulindililila, po akaba we wise uwa inko inyinji ukuyana na Masimbo aghakuti, “Abaluko lwako bakwiza pakuba binji nkani ngati zyo ntondwa.”

¹⁹ Ulusubilo lwache lutakayingana-yinganagha, bo akwinong'ona nizya mubili, ghugho ghukaba ngati ghufuye, pachifukwa chakuti akaba amaka papipi 100, pamo bo akwinong'ona nizya bughumba ubwa muchi u Sala.

²⁰ Atakilamwa ni layizyo ilya Chala, loli akiyula nkani mulwitiko lwache nukumuchindika u Chala.

²¹ Naloliloli akasubila ukuti u Chala akwiza pakubomba zizyo akalayizya.

²² Ichi cho chifukwa ukwendela mu lwitiko lwache, u Chala “Akamunena pakuba mugholosu pamaso papache.”

²³ Amazyu aghakuti, “Akaneniwa ukuti mugholosu” ghatakasimbiliwa yuyo mwene, awe.

²⁴ Loli ghakasimbiwa sona kukwitu, aswe twe tubaghiye pakuneniwa ukuti twe bagholosu, babo bakusubila mumwache yuyo akamuzyusya kubufwe u Yesu u Mwene witu.

²⁵ Pachifukwa icha mbibi zyitu akabikiwa ukuti aghoghiwe, po u Chala akamuzyusya kubufwe, umwakuti tuneniwe pakuba bantu bagholosu pamaso papache.