Aba Loma 2 - Ulufingo Ulupya

Ubulongi ubwa Chala

¹ Awe, we ukulonga abanji, manyi we wenu, ute na pakulyeghelapo? Pakuti bo ukulonga abanji, ukwisusya wemwene pakuti we mulongi ukubomba ivintu vilavila.

² Tuzimenye ukuti u Chala akulongela mubugholosu abantu babo bakubomba ivintu vinivi.

³ Po, awe, we muntu bulo, ukubalonga abanji, loli ukubomba ivintu vili vilavila! Nkimba ukwinong'ona ukuti ukwiza pakubulyegha ubulongi ubwa Chala?

⁴ Nkimba awe ukuchisula ichisa ichikulu icha Chala, ubufisalyoyo bwache, sona nu buchimyeka? Nkimba utazimenye ukuti u Chala uwa chisa pakuti akuyezya pakukulongozya ukuti upinduke nukuzileka imbibi zyako?

⁵ Loli pachifukwa icha bukafu ubwa moyo wako, sona nu moyo wako umusita kupinduka nukuzileka, ukwilundikila wemwene ubukali ubwa Chala, pisiku lilyo ubulongi bwache ubugholosu bukwiza pakuvumbuliwa.

⁶ Pakuti u Chala akwiza pakumupa umuntu wesi umuvwalo ukuyana ni mbombo zyache.

⁷ Abantu babo bakwendelela pakubomba ubwiza nu buchindamu, umuchizi nubumi, u Chala akwiza pakubapa ubumi ubwa bwila na bwila.

⁸ Loli abantu babo bakwiyighana bene nukukana ukwivwila ubwanaloli, loli nukubomba imbibi, u Chala akwiza pakubakalalila nukubafunda nkani.

⁹ Intamyo na mayimba vikwiza pakubawila abantu bosi babo bakubomba imbibi, ukwandila naba Yuda, po sona na bantu babo bate ba Yuda bulo.

¹⁰ Loli u Chala akwiza pakubapa ubuchindamu, umuchizi nu mutende abantu bosi babo bakubomba inyiza, ukwandila naba Yuda, po sona na bantu babo bate ba Yuda bulo.

¹¹ Pakuti u Chala atakwennya icheni icha muntu pakulonga inongwa.

¹² Abantu bosi babo banangite ukusita kumanya Indaghilo, bakwiza pakuzimila napapo batazimenye Indaghilo. Sona bosi babo banangite bo bazimenye Indaghilo, bakwiza pakulongiwa ukuyana ni Ndaghilo.

¹³ Pakuti, bate bo babo bakwivwa bulo Indaghilo babo u Chala akubanena ukuti bantu bagholosu pamaso papache, loli babo bakubomba zizyo Indaghilo zikunena, bo babo u Chala akubanena ukuti bantu bagholosu pamaso pa Chala.

¹⁴ Abantu babo bate ba Yuda bate ni Ndaghilo, loli bo bakubomba nu buntu bwabo ukuyana ni Ndaghilo, palwabo nu lwabo bakulanjizya ukuti bavimenye vivyo babaghiye pakuvibomba, napapo bate ni Ndaghilo izya Mozesi.

¹⁵ Inkalo yabo yikulanjizya ukuti zizyo Indaghilo zikunena zisimbiwe mumoyo ghabo. Umabyebye wabo akusimikizya ukuti izi zyanaloli pakuti inyinong'ono zyabo zikubasusya pamo ukubimila.

¹⁶ Ukuyana na mumo ghakunenela Amazyu Amiza ghagho inkulumbilila, umu mo mumo kukwiza pakubela, bo u Chala akwiza pakulonga inyinong'ono izyakubusyefu mwitabwa ilya Yesu Kilisitu.

Aba Yuda ni Ndaghilo izya Mozesi

¹⁷ Loli awe, nanti ukwiyitizya wemwene ukuti we mu Yuda; nanti ukusubila Indaghilo, sona nukwituvikizya mwa Chala;

¹⁸ nanti uzimenye zizyo u Chala akulonda ukuti ubombe, sona umenye pakusala chicho chiza pachifukwa chakuti wamanyila Indaghilo;

¹⁹ sona nanti naloli wamanya ukuti awe we mulongozi uwa bafwamaso, we nyale iya bantu babo bali muchisi,

²⁰ we mumanyisi uwa bantu abapunganu, sona we mumanyisi uwa bana pachifukwa chakuti uzimenye akiza nkani ukuti mu Ndaghilo ukughaghamo amahala ghosi nu bwanaloli bosi.

²¹ Awe we ukumanyizya abantu abanji, po choni chicho utakwimanyizya wemwene? Awe ukulumbilila ukuti, “Utakibaye” po nkimba choni chicho awe ukwiba?

²² Ukunena ukuti, “Utakalowaye” po nkimba choni chicho awe ukulowa? Awe we uvibengite ivifwani, po nkimba choni chicho ukwiba ivya munyumba iyakwiputilamo ivifwani?

²³ Awe, we ukwituvikizya mu Ndaghilo izya Chala, po nkimba choni chicho ukumukozya isoni u Chala pakunangannya Indaghilo?

²⁴ Pakuti Amasimbo ghakuti, “Pachifukwa icha mwemwe mwe ba Yuda, abantu babo bate ba Yuda bakumusamula u Chala.”

²⁵ Nanti ukukonka Indaghilo, ukusilimuliwa kwako kwiza, loli nanti utakukonka Indaghilo, ukusilimuliwa kwako kwa bulo.

²⁶ Nanti umuntu yuyo atasilimuliwe akwivwila zizyo Indaghilo zikunena, nkimba pamaso pa Chala atangaba ngati po muntu umusilimuliwe, napapo atasilimuliwe?

²⁷ Po umuntu yuyo atasilimuliwe, yuyo akukonka Indaghilo akwiza pakukulonga awe we muntu umusilimuliwe, sona awe we uli ni Ndaghilo zizyo zisimbiwe, naloli ukunangannya Indaghilo.

²⁸ Umu Yuda uwanaloli, ate we yula yuyo akuboneka ngati we mu Yuda pamaso pa bantu. Sona ukusilimula ukwanaloli, kute ko kuko kukubombiwa pamubili pamaso pa bantu.

²⁹ Loli umu Yuda uwanaloli we yula yuyo mu Yuda mumoyo wache. Ukusilimula ukwanaloli, ko kusilimuliwa kwa moyo, kuko kukubombiwa nu Muzimu Umuzelu, ni Ndaghilo awe zizyo zisimbiwe. Umuntu yunuyu atakupaliwa na bantu, loli nu Chala.