Aba Loma 15 - Ulufingo Ulupya

Nizya kubahobosya abantu abanji

¹ Aswe twe bamaka mulwitiko tubaghiye pakubavwa abadedebazu pakunyamula intamyo zyabo. Tutakihobosyanje twebene bulo.

² Loli twebosi tubaghiye pakuhobosya abakamu bitu nu kubabombela inyiza, umwakuti ulwitiko lwabo lukulaye.

³ Pakuti u Kilisitu atakihobosya mwene ukuyana na Masimbo aghakuti, “Umusamu ghugho bakakusamula nagho, ghukangwila.”

⁴ Pakuti chosi chicho chikasimbiwa kale mu Masimbo, chikasimbiwa pakutumanyizya aswe, umwakuti tungaba nu lusubilo ukwendela mu bufisalyoyo nu lukazyo, lulo Amasimbo ghakutumanyizya.

⁵ U Chala yuyo akubapa abantu ubufisalyoyo nu lukazyo, abavwe ukuti mwivwanaye akiza, bo mukuchikonka ichifwanikizyo icha Kilisitu u Yesu,

⁶ umwakuti mwebosi nizyu lyoka mumuchindikaye u Chala, sona nu wise uwa Mwene witu u Yesu Kilisitu.

Amazyu Amiza ghakulumbililiwa pakasi pa bantu babo bate ba Yuda

⁷ Polelo mupokelelanaye akiza ukuyana na mumo u Kilisitu akabapokelela, umwakuti u Chala apaliwanje.

⁸ Pakuti inkubabuzya ukuti u Kilisitu akaba mubombi pakasi pa ba Yuda ukulanjizya ukuti u Chala musubiliwa, umwakuti asimikizye ilayizyo lyache, lilyo akabalayizya abanyenya babo,

⁹ umwakuti na bantu babo bate ba Yuda bope bamuchindikaye u Chala pachifukwa icha chisa chache ukuyana na Masimbo aghakuti, “Pachifukwa chinichi inkwiza pakukuchindika pakasi pa bantu babo bate ba Yuda. Inkwiza pakwimba inyimbo izyakulipala itabwa lyako.”

¹⁰ Zisimbiwe sona ukuti, “Hoboka nkani mwe bantu babo bate ba Yuda poka na bantu aba Chala.”

¹¹ Sona Amasimbo ghakuti, “Mwe bantu babo bate ba Yuda mumupale u Mwene, sona mwe bantu abaluko losi mumupale.”

¹² Sona wepe umulaghuzi u Yesaya akuti, “Weka uwa banyenya aba Yese akwiza; akwiza pakuba mulaghili uwa bantu babo bate ba Yuda; po abene bakwiza pakusubila mumwache.”

¹³ Umwenecho u Chala yuyo akutupa ulusubilo, abizuzye nu lusekelo, sona nu mutende ukwendela mukusubila kwinyu mumwache, umwakuti ulusubilo lwinyu lwendelelaye pakukula na maka agha Muzimu Umuzelu.

Ichifukwa chicho u Pabuli akasimbila nu bujivu nkani

¹⁴ Mwee bakamu bane, naloli izimenye ukuti amwe mwe bantu biza, sona nukuti muvimenye vyosi akiza, sona nukuti mungamanyizannya.

¹⁵ Loli mwakalata uyu nabasimbila nu bujivu nkani ivintu vimo, ukuti imbakumbuzye. Nasimba bunubu pachifukwa icha chisa icha Chala

¹⁶ pakunsala ukuti imbanje ne mubombi uwa Kilisitu u Yesu pakasi pa bantu babo bate ba Yuda. Ampiye imbombo iyakulumbilila Amazyu Amiza agha Chala ngati ne muputi, umwakuti abantu babo bate ba Yuda babanje chakwiyipa ichakumuhobosya u Chala, sona ni chakupaghuliliwa kukwache nu Muzimu Umuzelu.

¹⁷ Pakumamatilana kwane poka nu Kilisitu Yesu, indi ni chifukwa icha kwituvikizya nacho pachifukwa icha mbombo yiyo inkumubombela u Chala.

¹⁸ Intakwiza pakujimba pakunena nizya chintu ichinji, awe, loli zyene zizyo u Kilisitu abomba ukwendela mumwane ukuti imbavwe abantu babo bate ba Yuda pakumwivwila u Chala ukwendela mu mazyu ghane, sona na mumbombo zyane,

¹⁹ sona nukwendela mu vyika ni viswigho, sona na maka agha Muzimu Umuzelu uwa Chala. Po ukwandila mu Yelusalemu mupaka mu Ililikumu nalumbilila nkani Amazyu Amiza agha Kilisitu.

²⁰ Amasiku ghosi nkiyula nkani pakulumbilila amazyu, kuko batamumenye u Kilisitu, umwakuti ntakazenge palwalo, lulo umuntu yumo azengite kale.

²¹ Pakuti Amasimbo ghakuti, “Babo batakabuziwa nalumolumo nizya yuyo, bakwiza pakwennya; sona chicho batachivuye nizya yuyo, bakwiza pakuchivwisya.”

U Pabuli akubatika nizya kubuka ku Loma

²² Ichi cho chifukwa bwila napotwanga pakwiza kukwinyu.

²³ Loli pakuti ilelo namalizya imbombo yane muvigaba ivi, sona nukuti nalondagha nkani amaka aminji ukuti nize pakubennya,

²⁴ inkulindilila pakubomba bunubu losi ulu, bo nkubuka ku Sipeni ukuti munyavwe pa bulendo bwane, bo nangala namwe pakabalilo akanandi bulo.

²⁵ Loli losi ulu indi pabulendo ubwakubuka ku Yelusalemu ni vyabupi ivya bantu abazelu aba Chala kulakula.

²⁶ Pakuti ivipanga ivya mu Makedoniya nivya mu Akaya vikaba ni chisa nkani, umwakuti vikasangula ivyabupi pakubavwa abantu abapina pakasi pa bantu abazelu aba Chala aba mu Yelusalemu.

²⁷ Chikabahobosya nkani pakubomba zinizi, sona yikaba mbombo yabo iyakubavwa abapina. Pakuti aba Yuda bakagabana na bantu babo bate ba Yuda ulusayo lwabo ulwa buzimu, po bope abantu babo bate ba Yuda babavwanje aba Yuda ni vintu vivyo bakusobelwa ivya mubili.

²⁸ Po, bo namalizya imbombo yane iyi, sona bo nabika ivyabupi vyosi vivyo bakabasangulila, inkwiza pakubendela, bo nkubuka ku Sipeni.

²⁹ Inzimenye ukuti bo inkwiza kukwinyu, inkwiza nu lusayo ulukulu ulwa Kilisitu.

³⁰ Mwee bakamu bane mwa Mwene witu u Yesu Kilisitu, sona nukwendela mu lughano ulwa Muzimu Umuzelu, inkubalambilizya ukuti mubanje poka nane munyiputo, pakunyiputila nkani kwa Chala.

³¹ Munyiputilaye kwa Chala ukuti ampoke munyobe izya bantu abasita lwitiko aba mu Yudeya. Sona mwiputaye ukuti abantu abazelu aba mu Yelusalemu bitikizye imbombo yane

³² umwakuti mubwighane ubwa Chala ningiza kukwinyu nu buhobosu, sona nukwilagha nkani pakwangala namwe.

³³ U Chala, yuyo mwenecho uwa mutende, abanje namwe mwebosi. Ameni.