Aba Loma 12 - Ulufingo Ulupya

Ubumi ubwa kumubombela u Chala

¹ Polelo bakamu bane, pachifukwa icha chisa icha Chala ichikulu nkani kukwitu, inkubalaba ukuti mwiyipe mwebene ukuti chibanje chakwiyipa icha bumi kwa Chala, ichakupaghuliliwa pambombo yache, sona ni chakumuhobosya nkani. Kuko ko kwiputa kwinyu kwa buzimu.

² Mutakeghelelaye inkalo izya bantu aba muchisu ichapasi, loli mumwitikizye u Chala ukuti andule ubumi bwinyu pakubapa inyinong'ono impya. Po mungiza mumanye ubwighane ubwa Chala, mukwiza pakumanya chicho chiza, ni chakumuhobosya nkani, sona ni chakufikapo.

³ Pachifukwa icha chisa chicho u Chala ampiye ukwendela mu chisa chache, nkunena namwe mwebosi ukuti, mutakipimaye mwebene pakuba bapamwanya nkani ukuchila namumo mubeleye. Loli mubanje bakwiyisya amoyo ghinyu ukuyana ni chipimilo icha lwitiko lwinyu, lulo u Chala abapiye.

⁴ Tuli ni vigaba ivyinji bulo mumubili ghoka, sona ivigaba vyosi ivi vili ni mbombo iyakulekana-lekana.

⁵ Umwakuyana bulo, napapo twe binji, twe mubili ghoka mwa Kilisitu, sona tumamatiziwe poka uyu na uyu ngati vyo vigaba ivya mubili ghoka ivyakulekanalekana.

⁶ Po tubaghiye pakubombezya ivyabupi ivyakulekanalekana vivyo u Chala akatupa ukuyana ni chisa chache. Nanti ichabupi chitu chakuti tunene amazyu agha Chala, tubaghiye pakubomba nu lwitiko lulo tuli nalo.

⁷ Nanti ichabupi chitu chakuti tubabombele abanji, tubaghiye pakubabombela. Nanti ichabupi chitu chakuti tumanyizye, tubaghiye pakumanyizya.

⁸ Nanti ichabupi chitu chakuti tubakazye abanji, tubaghiye pakubomba bunubu. Umuntu wesi yuyo akugabana na banji vivyo ali navyo, abombaye umwakusita ubumama. Umuntu yuyo akulongozya, alongozyanje nu moyo ghosi. Umuntu yuyo akubapelela ichisa abantu abanji, abombaye umwakuhoboka.

⁹ Ulughano lutakabanje ulwa buzimbuli. Muchibengaye chicho chibibi, loli muchilemelele chicho chiza.

¹⁰ Mughananaye nu moyo ghosi ngati mwe bakamu. Muchindinkanaye.

¹¹ Bo mukubomba, mubikayepo umoyo ghosi, sona mutakabanje bakata. Mumubombelaye u Mwene umwakwiyipa nu moyo winyu ghosi.

¹² Muhobokaye nkani pachifukwa icha lusubilo lwinyu, mubanje bafisalyoyo muntamyo nukwiputa akabalilo kosi.

¹³ Vivyo muli navyo mugabanaye na bakilisitu abamwinyu babo bakusobelwa. Mubapokelaye abayeni munyumba zyinyu.

¹⁴ Mumulabe u Chala ukuti abasaye babo bakubavwima. Naloli mumulabe ukuti abasaye, umwakuti atakabaghune, awe.

¹⁵ Hobokagha poka na babo bahobokite, lilagha poka na babo bakulila.

¹⁶ Mwivwanaye akiza mwebosi. Mutakituvyanje, loli mwangalaye poka na bantu bulo. Mutakipimaye mwebene ukuti mwe bamahala nkani ukuchila bosi.

¹⁷ Utakatanizyanje ububibi pa bubibi. Yezya pakubomba ivintu vivyo vyiza pamaso pa bantu bosi.

¹⁸ Nanti chingabombiwa, mubanje mumutende na bantu bosi.

¹⁹ Bamanyani bane, mutakatanizyanje ububibi, loli mumulekele u Chala ukuti atanizye. Pakuti Amasimbo ghakuti, “U Mwene akuti, ‘Ukutanizya ko kwane. Inkwiza pakutanizya.’ ”

²⁰ Loli ukuyana na Masimbo aghakuti, “Nanti umulwani wako ali ni zala, umupe ichakulya, nanti ali ni nyota, umupe amizi. Pakubomba bunubu kokuti ukumukozya isoni.”

²¹ Mutakitikizye ukuti ububibi bubapote, loli mubupote ububibi pakubomba inyiza.