Aba Kolosi 2 - Ulufingo Ulupya

¹ Nkulonda ukuti muzimanye namumo nkubiyulila nkani, na bantu babo bali mu Labodikiya, sona na bosi abantu abanji babo batamenye pacheni.

² Chicho nkulonda chakuti amoyo ghabo ghangakaziwa, sona nukuti bamamatilane poka mulughano, umwakuti bizule na mahala aghakivwisizye aka vintu. Bunubu bakwiza pakumanya umwakufikapo nizya kubusyefu izya Chala, yuyo we Kilisitu,

³ yuyo mumwache momumo mufisiwe ubukabi ubwa mahala agha Chala nu bumanyi.

⁴ Nkunena bunubu, umwakuti patakabepo nayumo umuntu uwakubadeba na mazyu aghabuzimbuli.

⁵ Pakuti napapo intangaba poka namwe ku mubili, loli indi poka namwe mubuzimu. Sona nahoboka bo inkwennya namumo mukwendesekezya ivintu akiza, sona na mumo mukwimila mulwitiko lwinyu mwa Kilisitu.

Nizya bumi ubwenecho pakumamatilana poka nu Kilisitu

⁶ Pakuti mwamwitika Kilisitu u Yesu pakuba we Mwene, po mwendelele pakwikala mukumamatilana poka nawe.

⁷ Mwisimike na magululuzi ghinyu mumwache, mukulaye mulwitiko ukuyana na mumo mukamanyiziliwa, sona mubanje bantu abakupalizya nkani.

⁸ Muchebaye ukuti patakabepo nayumo umuntu uwakubapela pakuba bazya na mazyu aghamahala aghabuzimbuli, ghagho ghakufuma kunyiho izya bantu aba muchisu ichapasi, sona ni nyinong'ono zyabo, loli zitakufuma kwa Kilisitu, awe.

⁹ Pakuti mwa Kilisitu, u Chala akwikalamo umwakufikapo mumubili uwa muntu,

¹⁰ sona amwe mwapeghiwa ubumi ubwakufikapo pakumamatilana poka nawe. Umwene we mutu uwa balaghili bosi, sona na bamaka bosi.

¹¹ Mumwache namwe bulo mukasilimuliwa, te kusilimuliwa kwa mubili awe, loli pakuvula ubuntu ubwa mbibi, ukusilimuliwa kuko kukubombiwa nu Kilisitu.

¹² Pakuti bo moziwa, mukasyiliwa poka nu Kilisitu, sona nu lozyo lulalula mukazyuka poka nawe pakuti mukasubila mumaka agha Chala, yuyo akamuzyusya kubufwe.

¹³ Amwe kale mukaba mwe bantu abafwe pachifukwa icha mbibi zyinyu, sona pachifukwa chakuti mukaba abasita kusilimuliwa mumoyo ghinyu. Loli ilelo u Chala abapiye ubumi poka nu Kilisitu. U Chala akatuhobokela imbibi zyitu zyosi.

¹⁴ Akazimya ukalata uwa nkongole iya nongwa zyitu, poka ni ndaghilo zyache. Akazimya zyosi pakuzikomela pachipinjika.

¹⁵ Pachipinjika palapala u Kilisitu akabafyula ivilwilo abamwene na balaghili. Akabalema pakuba bakayidi nukubalongolela pamaso pa bantu bosi ukulanjizya ubupoti bwache.

¹⁶ Polelo patakabepo nayumo umuntu uwakubalonga pachifukwa icha vivyo mukulya, pamo ukung'wela, pamo nizya lusekelo ulwa chiputo, pamo Ulusekelo ulwa Kupanta kwa Mwezi, pamo nizya Isiku Ilyakutuzya.

¹⁷ Ivintu vyosi vinivi muzyezye bulo uwa vintu vikaba vichili pakubako, loli ichenecho we Kilisitu.

¹⁸ Patakabepo nayumo umuntu uwakubakanizya ukukaba umuvwalo ughu. Umwene ighanite ukwilanjizya pakuba muntu wakwiyisya, bo akwiputa ukubachindika abantumi. Akubika umoyo pavivyo akuvyennya muvisetuka. Akwituvya na pabusita ichifukwa, pakuti akukonka bulo amahala agha bantu.

¹⁹ Abantu banaba bakukana pakumamatilana poka nu Kilisitu, yuyo mutu uwa mubili. Sona mwa Kilisitu umubili ghosi ghukupokela amaka, nu kumamatilana poka impingu ni nkole, po umubili ghukukula ukuyana na mumo u Chala akulondela ukuti vikulilaye.

Nizya kufwa nu kuzyuka poka nu Kilisitu

²⁰ Amwe mukafwa poka nu Kilisitu, kokuti mwe babuke ku bulaghili ubwa mizimu iya muchisu ichapasi. Po, choni chicho mukwikala ngati po mwe bantu aba muchisu ichapasi? Nkimba choni chicho mukukonka indaghilo zizyo zikuti,

²¹ “Mutakalemaye ichi, pamo ukughonja chila, pamo ukupalamasya ichi?”

²² Vyosi vinivi vikuba visita mbombo nanti vyabomba kale imbombo, zinizi zyo ndaghilo ni vimanyisyo ivya bantu bulo.

²³ Indaghilo zinizi zikuboneka ngati po zyamahala pakuti zikubalamula abantu pakubachindika abantumi, nukubafyenga abantu ukwiyisya ukwabumyasi, sona nu kuyivya amabili ghabo. Loli pope bulo indaghilo zilazila zitakumwavwa umuntu napo panandi ukuti aleke ubuntu bwache ubwa mbibi.