Aba Hebeli 2 - Ulufingo Ulupya

Nizya bupoki ubukulu nkani

¹ Polelo tubaghiye tulemezye nkani zizyo tukivwa, umwakuti tutakepukayeko.

² Amazyu ghagho u Chala akanena ukwendela mu bantumi aba kumwanya ghakaba ghanaloli nkani, umwakuti abantu bosi babo batakaghivwila pamo ukughasula bakafundiwa ukuyana na mumo chikababaghilila.

³ Nkimba aswe tungapona buli-buli nanti tutakulemezya ubupoki ubukulu nkani bunubu? Akaba we Mwene yuyo akafumusya tasi ubupoki bunubu, bubo bukasimikiziwa kukwitu na bantu babo bakamwivwa.

⁴ U Chala wepe akasimikizya ukwendela mu vimanyilo, ni viswigho, sona ni vyika ivyakulekanalekana pakubagabila ivyabupi ivya Muzimu Umuzelu ukuyana nu bwighane bwache.

⁵ U Chala atakabapa abantumi aba kumwanya ubulaghili ubwa chisu chicho chikwiza, ichisu chicho tukuchinena.

⁶ Loli pabuzilo bumo zisimikiziwe na mazyu aghakuti, “Nkimba umuntu we wenu ukuti umukumbukaye, umwana uwa muntu bulo, we wenu ukuti umusungaye akiza?

⁷ Pakabalilo akapimpa bulo ukumupela pakuba munandi bulo pamaso pa bantumi aba kumwanya; Ukumuvwika impumpu iya buchindamu nu muchizi,

⁸ nukumupa ubulaghili pavintu vyosi.” Ilelo amupa ubulaghili pavintu vyosi, u Chala atakachilekapo nachimochimo ukuti chitakabe pasi pa bulaghili bwache. Loli ukuyana na mumo zibeleye ilelo, tutakwennya ukuti vyosi vili pasi pa bulaghili bwache.

⁹ Loli tukumwennya u Yesu, yuyo pakabalilo akapimpa bulo akanduka munandi bulo pamaso pa bantumi aba kumwanya. Po ilelo avwalite impumpu iya buchindamu nu muchizi pachifukwa icha kuyimba kwache nu bufwe umwakuti ukwendela mu chisa icha Chala, abafwile abantu bosi.

¹⁰ Pakuti chikamubaghila u Chala yuyo mupeli, sona musungilili uwa vintu vyosi, ukuti amupele u Yesu pakuba wakufikapo ukwendela mu mayimba ghache, umwakuti abasendele abana bache abinji pakwinjila mu buchindamu bwache. Pakuti u Yesu we yuyo akubalongozezya ku bupoki.

¹¹ Pakuti yuyo akubapaghula abantu, sona na bantu babo bakupaghuliwa, bosi babili bali nu wise weka. Ichi cho chifukwa isoni zitakumulema u Yesu pakubitizya ukuti bakamu bache.

¹² Akunena kwa Chala akuti, “Nkwiza pakufumusya itabwa lyako pakasi pa bakamu bane; pamaso pa chipanga, inkwiza pakukwimbila inyimbo izya mapalo.”

¹³ Akunena sona akuti, “Nkwiza pakumulindilila.” Sona akuti, “Ane indipano, poka na bana babo u Chala ampa.”

¹⁴ Pakuti abana banaba bantu bulo, babo bali nu mubili ni banda, u Yesu umwenecho akanduka ngati bo babo nu kugabana nabo akabele kabo ukwendela mu bufwe bwache ukuti amunangannye u Satana, yuyo ali na maka agha bufwe.

¹⁵ Akabomba bunubu ukuti abasatule abantu bosi babo mubumi bwabo bosi bakaba bazya pachifukwa icha kubunyila ubufwe.

¹⁶ Pakuti chili pabuzelu bulo ukuti atakiza pakubavwa abantumi aba kumwanya, awe. Loli akiza pakubavwa abaluko ulwa Abulahamu.

¹⁷ Pachifukwa chinichi, chikalondiwa ukuti umwene abanje ngati bo bakamu bache muvintu vyosi, umwakuti abanje Muputi Usongo uwachisa, sona nu musubiliwa mumbombo iya Chala nukuba chakwiyipa ichakuhobokela imbibi izya bantu.

¹⁸ Pakuti umwene akayeliwa ukwendela mu mayimba ghache, kokuti umwene angabavwa abantu babo bakuyeliwa.