Aba Hebeli 12 - Ulufingo Ulupya

U Chala we Tata witu

¹ Pakuti tuzyunguliliwe ni chilundilo ichikulu nkani icha bakaboni, zagha tuvyepuke ivintu vivyo vingatuzighila, sona ni mbibi zizyo zitumamatiye nkani. Zagha tuchimbile nu lweke muchipalano ichakuchimbila chicho chili pantazi papitu.

² Zagha tulolotele pa Yesu yuyo we bwandilo nu bumalilo ubwa lwitiko lwitu. Loli pachifukwa icha buhobosu bubo bukamulindilagha, akajimba nkani pachipinjika, napapo chikaba chintu chakukozya isoni, po ilelo akwikala pachitengo icha bumwene kunyobe indilo iya Chala.

³ Mwinong'one nizya Yesu yuyo akajimba nkani ni ntuko izya bantu abambibi! Po mutakalitaye nukuwa amaka.

⁴ Pakulwana ni mbibi, muchili mutafikitepo pa bwenecho ubwa kukupula ibanda lyinyu.

⁵ Nkimba mwaghaluvya amazyu aghakubakazya, ghagho u Chala akubabuzya mwe bana bache? U Chala akuti, “Wee mwana wane utakapepulaye amafundwe agha Mwene, sona utakavwitukaye, bo akukuchemela.

⁶ Pakuti u Mwene akumupa amafundwe umuntu wesi yuyo amughanite nukumufunda umuntu wesi yuyo akumwitika ukuti we mwana wache.”

⁷ Mujimbe mumayimba ukuti mumanyile inkalo inyiza. U Chala akubapa amafundwe ghanagha pachifukwa chakuti mwe bana bache. Nkimba mwana wenu yuyo atafundiwepo nu wise?

⁸ Nanti u Chala atakubafunda ukuyana na mumo akubafundila abana bache bosi, kute kokuti mwe bana bache abenecho, loli mwe basiwana.

⁹ Tukaba nabo abatata aba muchisu ichapasi babo bakatufunda, po tukabachindikagha. Nkimba tutangamuchindika u Tata witu uwabuzimu nukuba nubumi?

¹⁰ Abatata bitu aba muchisu ichapasi bakatufunda pakabalilo akapimpa bulo ukuyana na mumo bakinong'onelagha ukuti chiza, loli u Chala akutufunda ukuti tukabepo chimo ichiza, umwakuti tungagabana nawe ubuzelu bwache.

¹¹ Pakabalilo kako tukufundiwa chikuba chintu chakubaba, sona ichisita ukuhobosya. Loli pisinda pache ukufundiwa kulakula kukwela ivikomwa ivya mutende, sona nizya bugholosu ku bantu babo bakapokela amafundwe ghalaghala.

Mutakamukanaye u Chala

¹² Polelo muzikazyanje inyobe zyinyu izisita amaka, sona nu kuvipa amaka ivimpevu vyinyu vivyo vikutetema.

¹³ Muyannye izila izyakukanyamo inyayo zyinyu, umwakuti ichigaba chicho chilemaye chitakavyughuke, loli ukuti chipole.

¹⁴ Yezya nkani ukwikala mumutende na bantu bosi, sona mubanje bazelu. Pakuti ukusita ubuzelu nayumo umuntu yuyo akwiza pakumwennya u Mwene.

¹⁵ Mubanje maso ukuti atakabepo nayumo umuntu yuyo akwiza pakupotwa pakupokela ichisa icha Chala. Patakabepo nachimo ichimelwa ichakubaba, chicho chingamela pakasi papitu nukubapelela abantu abinji intamyo nu kubaba kwache.

¹⁶ Mubanje maso ukuti atakabepo umalaya, sona nu musita ukumuchindika u Chala ngati we Esabu, yuyo akaghulizya ubwakatote bwache ni chakulya icha kabalilo koka.

¹⁷ Muzimenye ukuti pisinda pache akalondagha pakupokela ulusayo kwa wise, loli akamukana pachifukwa chakuti chikaba chipala ukuti andule inyinong'ono zyache, napapo akalulondagha nkani ulusayo lula pakulila na masozi.

¹⁸ Amwe mutizite ukuyana na mumo bakizila aba Izilayeli kwighamba lilyo lingapalamasiwa, sona lilyo likwaka nu moto; ilya chisi ichakoghofya ni mpepo iyakukuka,

¹⁹ nu kulila kwa ipati, sona nizyu ilya mazyu. Bo abantu bivwa izyu lila, bakalaba ukuti batakalyivwanje sona izyu ilinji,

²⁰ pachifukwa chakuti batakajimba nu lulaghilo ulwakuti, “Nanti ichinyamana chapalamasya ighamba lila, chibaghiye chighoghiwe pakuchitiza na mabwe.”

²¹ Akabonekele kache kakaba kakoghofya nkani, umwakuti wepe u Mozesi akati, “Inkunyila nu kutetema!”

²² Loli mwiza kwighamba ilya Ziyoni na kaya akakulu nkani aka Chala Umumi, u Yelusalemu uwa kumwanya, poka ni chilundilo icha bantumi amasabuzani na masabuzani.

²³ Mwiza kulusekelo lulo abana abakatote aba Chala, bakukomana, babo amatabwa ghagho ghasimbiwe kumwanya. Mwiza kwa Chala yuyo mulongi uwa bantu bosi, sona mwiza kwa mizimu iya bantu abagholosu, yiyo u Chala akayipela pakuba yakufikapo.

²⁴ Mwiza kwa Yesu yuyo mufusya uwa lufingo ulupya, sona kwibanda lilyo likanyafiliwa, lilyo likulayizya ivintu ivyizapo ukuchila ibanda ilya Abeli.

²⁵ Po mubanje maso ukuti mutakamukanaye yuyo akunena namwe. Nanti abantu babo bakakana pakumwivwila yuyo akabasoka, bataponite ulufundo, po nkimba aswe tukwiza pakupona buli-buli nanti tutakumuteghelezya uwa kumwanya yuyo akutusoka.

²⁶ Pakabalilo kalakala izyu likachineng'ennya ichisu chapasi, loli ilelo alayizya ukuti, “Intakwiza pakuchineng'ennya chene ichisu chapasi, loli na kumwanya bulo.”

²⁷ Amazyu ghagho ghakuti, “Ukuneng'ennya sona,” ghakulanjizya pabuzelu ukuti ivipeliwa vikwiza pakuneng'ena nukwefyiwapo pabuzilo bwabo, umwakuti ivintu vivyo vitanganeng'ena vikwiza pakusyala pabuzilo bwabo.

²⁸ Pakuti twapokela ubumwene bubo butanganeng'ena, po zagha tumupalizye u Chala nukumuchindika pakulanjizya umuchizi nu bogha.

²⁹ Pakuti u Chala witu moto ghugho ghukulungulizya.