Aba Hebeli 10 - Ulufingo Ulupya

¹ Indaghilo izya Mozesi zikaba muzyezye bulo uwa vintu ivyiza vivyo vikwiza. Umuzyezye ghunughu ghutakaba wenecho chifukwa ghutangefya imbibi izya bantu napapo ivyakwiyipa vili vyoka vikabikiwa umwaka nu mwaka, sona vitakubapela abantu babo bakamwiputagha u Chala pakuba bakufikapo.

² Nanti abantu babo bakumwiputa u Chala bakaswefiwanga imbibi zyabo ngali batakabapo nalumolumo nu mabyebye uwa mbibi zyabo, sona ivyakwiyipa vyosi ngali abantu bakaleka pakubika ivyakwiyipa.

³ Loli mu vyakwiyipa vinivi muli ukukumbusya imbibi umwaka nu mwaka,

⁴ ichifukwa chitangabombiwa ukuti ibanda ilya nkambaku nilya mbuzi lyefye imbibi.

⁵ Polelo bo u Kilisitu iza muchisu ichapasi, akanena kwa Chala akati, “Te vyakwiyipa pamo ivyabupi vivyo ukulonda, loli wanjanizya umubili.

⁶ Ivyakwiyipa ivya vinyamana ivyakocha pachighemo pamo ivyabupi ukuti vyefye imbibi, awe utakuhoboka navyo.

⁷ Po inkati , ‘Wee Chala wane, ane niza pakubomba ubwighane bwako. Pakuti zisimbiwe nizya ane mwibuku ilya Ndaghilo.’ ”

⁸ Ichakwanda akati, “Ivyakwiyipa pamo ivyabupi; ivyakwiyipa ivya vinyamana ivyakocha pachighemo, pamo ivyakwiyipa ukuti vyefye imbibi, awe utakuvilonda pamo ukuhoboka navyo.” (Akanena zinizi napapo ivyakwiyipa vyosi ivi vikubikiwa ukuyana ni Ndaghilo.)

⁹ Po umwene akati, “Wee Chala wane, ane indi pano, niza pakubomba ubwighane bwako.” Po u Chala akamazya ulufingo ulwakwanda nukwikazya ulufingo ulwabubili.

¹⁰ Pakuti bukaba ubwighane ubwa Chala, aswe twapeliwa pakuba bantu abazelu ukwendela mu chakwiyipa icha mubili uwa Yesu Kilisitu lyoka bulo mpela.

¹¹ Umuputi wesi uwa lufingo ulukali akwimilila pakubomba imbombo yache isiku ni siku nukubika ivyakwiyipa akinji bulo, loli ivyakwiyipa ivi vitangefya imbibi.

¹² Loli u Kilisitu akabika ichakwiyipa choka bulo ichakwefezezya imbibi, po akikala pachitengo icha buchindamu kunyobe indilo iya Chala.

¹³ Kulakula akulindilila uwise ukuti ababike abalwani bache kusi kunyayo zyache.

¹⁴ Ni chakwiyipa choka bulo akabapela abantu bosi babo bakaswefiwa imbibi pakuba bakufikapo bwila na bwila.

¹⁵ Wepe u Muzimu Umuzelu akutusimikizizya aswe nizya zinizi. Ichakwanda akuti:

¹⁶ “U Mwene akuti: Ulu lo lufingo lulo inkwiza pakufingana nabo mumasiku ghagho ghakwiza Inkwiza pakubika Indaghilo zyane mumoyo ghabo sona inkwiza pakuzisimba munyinong'ono zyabo.”

¹⁷ Po akonjelezyapo pakunena ukuti, “Intakwiza pakukumbukapo nalumolumo imbibi zyabo sona nu bubibi bwabo.”

¹⁸ Papo pali ukuhobokeliwa kwa mbibi zinizi, patakulondiwa sona ichakwiyipa ichakuhobokela imbibi.

¹⁹ Polelo bakamu bane, twe babuke nkani pakwinjila mu Chipinda Ichizelu nkani bula ukwendela mwibanda ilya Yesu.

²⁰ Iyi yo zila impya sona impelabumi, yiyo u Kilisitu akatwighulila aswe pakudumusannya pamwenda uwakuzighila, kokuti umubili uwache nu wache.

²¹ Sona pakuti tuli nu Muputi Usongo uwakwenelezya Inyumba iya Chala,

²² po zagha tupalamile kwa Chala nu moyo uwa naloli nu moyo uwa lwitiko, sona na moyo ghagho ghaswefiwe umabyebye umubibi, sona na mabili ghagho ghasukiwe na mizi amiza.

²³ Zagha tulemezye ulusubilo lwitu lulo tukwitika, pakuti tungamusubila u Chala pachifukwa chakuti, umwene akusungilila ilayizyo lyache.

²⁴ Zagha twinong'onelanaye namumo tungakazanizannya, pakughanana sona nukubombelana ubwiza.

²⁵ Tutakanyokaye-nyokaye ku nkomano zyitu ukuyana na mumo abantu bamo bakizubilila, loli aswe tukazannyanje, nkani-nkani bo tukwennya ukuti Isiku ilyakwiza kwa Mwene lili papipi.

²⁶ Nanti tukuvimbilila bulo pakunanga bo twamanya ubwanaloli, chitalipo nachimo ichakwiyipa chicho chingapeghiwa pachifukwa icha mbibi zyitu.

²⁷ Loli chene ichintu chicho chasyala kukwitu ko kulindilila nu bogha ukulongiwa nu Chala, sona nu moto uwakoghofya, ghugho ghukwiza pakubanangannya abantu babo bakususannya nu Chala.

²⁸ Umuntu wesi yuyo akanangannyanga Indaghilo izya Mozesi akaghoghiwanga ukusita ichisa nanti bulo pali abakaboni babili pamo batatu.

²⁹ Po nkimba zingaba buli-buli nu muntu yuyo akumusamula u Mwana uwa Chala? Nkimba zingaba buli-buli nu muntu yuyo akulinyazya ibanda ilya lufingo ulwa Chala lilyo likamuswefya imbibi zyache? Nkimba zingaba buli-buli nu muntu yuyo akumusamula u Muzimu Umuzelu, yuyo akumulanjizya ichisa?

³⁰ Pakuti tumumenye yuyo akanena ukuti, “Ukutanizya ko kwane, ane inkwiza pakutanizya.” Akanena sona akati, “U Mwene akwiza pakubalonga abantu bache.”

³¹ Ukuwila munyobe izya Chala umumi, cho chintu chimo ichakoghofya nkani.

³² Loli mukumbukaye amasiku aghakale ghala, bo mwapokela bulo ulukozyo. Mukumbuke amayimba aminji ghagho mukakomana nagho, loli amayimba ghalaghala ghatakabapota.

³³ Mutubalilo tumo mukasamuliwanga pabuzelu nukuvwimiwa, sona mutubalilo utunji mukagabanagha poka muntamyo na bantu babo bakayimbagha bunubu.

³⁴ Pakuti mukabapazikizyanga abantu babo bakaba mujele. Bo bafyula ivintu vyinyu, amwe mukitikizya nu buhobosu, pachifukwa chakuti amwe mwebene mumenye ukuti muli navyo ivyizapo nkani vivyo vikwiza pakubangako bwila na bwila.

³⁵ Po mulemezye nkani ubujivu bwinyu bula, pakuti bukwiza nu muvwalo umukulu nkani.

³⁶ Amwe mubaghiye mubanje bafisalyoyo, umwakuti mubombaye zizyo u Chala akulonda. Po mukwiza pakupokela zizyo akalayizya.

³⁷ Amasimbo ghakuti, “Kwasyalako bulo akabalilo akapimpa, akakuti yuyo akwiza, afike sona ate akakabe.

³⁸ Abantu bane abagholosu bakwiza pakuba nubumi pakusubila. Loli nanti yumo mumwabo akunyokela kwisinda, ntakwiza pakuhoboka nawe.”

³⁹ Aswe tute twe bantu babo bakunyokela kwisinda nukusobela, awe. Loli twe bantu aba lwitiko, sona tupokiwe.